Efesi khuoah Paula
19
1 Korinth khuoa Apolo a um kârin Paulan tlangram biel hraw tlangin Efesi khuo a hung tlung a. 2 Chu taka chun zirtir threnkhat a hmu a, “Ringtu in ni hlim khan Thlarau Thienghlim in chang am?” tiin an don a. Anni chun, “Chang lo e, Thlarau Thienghlim a um ti khom kan hriet nawh” an ta. 3 Paula chun, “Chuong a ni chun, ieng baptisma am in chang leh?” tiin a’n don a, anni chun “Johan baptisma kha” an ta. 4 Paula chun, “Johan khan sim inentirna dingin baptisma a’n changtir hlak a, a hnunga hung ding Isu chu lo ring dingin Israel mihai a hril hlak a ni kha” a ta. 5 Chu chu an hrietin Lalpa Isu hmingin baptisma an chang a. 6 Chuonga Paulan an chunga kut an nghat lai chun Thlarau Thienghlim an chungah a hung tlung a, trong hriet loin an trong a, Pathien thu an hril a. 7 An rêngin patling sawm le pahni lai an nih. 8 Paula chu sunagog-ah a’n khawm hlak a, thla thum zet huoi takin thu a hril a; mi lungril tawk zawng takin Pathien ram thu chu a hrilpui hlak a. 9 Sienkhom anni laia threnkhatin lulul insuoa an ring nuom tlat naw lei le Lampui thu chu vantlang hmaah an hrilsiet leiin, Paula chun a zirtirhai chu thruoiin a’n sonsan a, thuhrilna bûk Turanna an tia chun ni tin Pathien thu a hrilpui lem tah hlak a. 10 Chuong ang chun kum hni lai a thaw a, chuleiin Asia biela um, Judahai le Grikhai po po chun Lalpa thu chu an hriet phà tah a nih.Skeva nauhai
11 Pathienin Paula kut hmangin thilmak chungchuong tam tak a thaw hlak a. 12 A rawmol hmang le a puon bât lai chen chu damnawhai kuomah an chawi a, an hung dam a, ramhuoi tirdakumhai khom an suok a. 13 Juda mi threnkhat, thlarau thra naw hnot suok thiem, ram tina invakhai chun, “Paula hril hlak Isu hminga suok dingin thu ka pêk che” tiin ramhuoi paihai chungah Lalpa Isu hming an lam hlak a. 14 Juda thiempu lal pakhat Skeva khomin chuong anga thaw ve hlak nau pasal pasari a nei a. 15 Ramhuoi tirdakum chun an kuomah, “Isu ka hriet, Paula khom ka hriet, nangni hi tu hrim am in na?” a ta. 16 Ramhuoi tirdakum paitu chun anni chu a baw a, an rêngin a hnè a, a sop hrep tawl a, chu ina inthok chun saruok le hliemin, thisen kai hnuongin an tlàn suok a.
17 Chu thu chu Efesi khuoa Judahai le Grik mihai po poin an lo hriet chun an rêngin an tri a, Lalpa Isu hmingin ngaisang a hlăw phá hle a. 18 Ringtu tam tak chu hungin an thil suol thawhai tlâng hrietah an inpuong a. 19 Dawithiem tam takin an dawi lekhabuhai an hung chawi khawm a, vantlang hmaah an raw a. Dawi bu ziel an raw hmang po hlutzie an sut chun drakma singnga hûa vel a nih. 20 Chuong ang khop chun Lalpa thu chu indarin, a hung hrăt deu deu pei a nih.
Efesi khuoa buoina
21 Chuong thil hnunga chun Paulan Makedonia ram le Akaia ram fang suok zeta Jerusalema fe dingin lungril a siem a. “Chu taka ka fe zo pha Rom khawpui ka sir bok ding a nih” a ta. 22 Chuongchun, ama thrangpuitu pahni, Timothe le Erasta hai chu Makedonia tieng a lo infetir hmasa a, ama chu Asia ramah iemani chen a la um hri a.
23 Chuong lai chun Lampuib leiin buoina a suok nasa hle a. 24 Tangkaruo ser mi, mi themthiem tam tak ruoia tangkaruoa pathien nu Artemi tempul lem siemtu Dimetri a um a, a hlâwk ĕm êm a. 25 Ama chun chuong tienga sumdawngtu po po chu a ko khawm a, an kuomah, “Puhai, hi sin hi ei sum hnăr a nih ti in hriet a. 26 Efesi khuoa chauh ni loin Asia ram po po deuthawah, hi Paula hin kuta siem pathienhai chu Pathien an ni nawh tiin mi tam tak a hnè a, a thruoi kawi zo tah ti nangni ngeiin in hmu a, in hriet a. 27 Ei sumdawngna hi a sukpawi el chauh khom ni loin, pathien ropui tak Artemi tempul hi mihaiin hung ngainêp an ta, Asia ram pum le khawvelin an biek hlak hi, a ropui ĕm êm vei leh, tlawm a tih ti inlâu a um bok a nih” a ta.
28 Chuong thu an hriet chun namên loin an lung a sen a, “Efesi mihai, Artemi hi a ropui” tiin an khĕk a. 29 Chuongchun, a khuoin an buoi ta vong a. Mipui chun Makedoniaa inthoka Paula hung zuitu Gaia le Aristarka hai chu an man a, inthuruolin ennuom siemna inah an kei lut a. 30 Paula chun mipui hma son a nuom a, sienkhom zirtirhaiin an dang a. 31 Asia ram hotu lienhai laia threnkhat chu Paula ruol thra an na, anni khom chun mi an hung tir a, ennuom siemna ina chun fe ve naw hrâm dingin an ngên bok a. 32 Mipui hlak chu an pung khawmna san khom hre mumal loin an pawng buoi a, a thren thu khatin an khĕk a, a thren thu dangin an khêk bok a. 33 Judahai chun Aleksandar chu hma tieng an nor phei a, mipui threnkhatin a thiemna thu hril dinga an hei khĕk khum leiin to dingin a kutin mipui chu a zăp a, a thiem thu hang hril a tum a. 34 Nisienlakhom, ama chu Juda mi a nih ti an hriet phing leh, darkar hni ding lai “Efesi mihai, Artemi hi a ropui” ti ngotin an khêk nawk ta thruop thruop el a.
35 Efesi khuoa Ziektuc chun mipui chu a khap dei a, an kuomah. “Efesi mihai, Artemi ropui tak le a lim thienghlim, vana inthoka hung tla tempul enkoltu chu Efesi khaw mihai hi in nih ti hi khawvelah tu’m a hre naw an um? 36 Chuleiin, hieng thil hi thu dik, sêl ruol lo a nih ti in hriet hnung chun to unla, thu hnung ding dawn loin ieng khom thaw naw ro. 37 Hieng in mi hung thruoihai hi tempul rok hmang an ni naw a, ei pathien hming hrilsetu khom an ni bok nawh. 38 Chun, Demetri le a ruolhaiin tu laka khom thu poi an nei chun thubuoi hrilna ding a’n hong zing a, ram optuhai khom an um a, an thubuoi chu anni kuomah hung intlun raw hai se. 39 Chu bâk hril ding an nei chun vantlang inkhawm pangngaia hril fel ding a nih. 40 Voisuna thil tlung hi hel tumna leia buoina siemah mi’n tum an tih ti khom inlâu um tak a nih, ei pung khawmna san hril ding mumal khom ei nei bok si naw a” a ta. 41 Chuong thu a hril zo chun pung khawmhai chu a’n trîntir tah a nih.