Korinth khuoah
18
1 Iemani chen hnungah Paulan Athens khuo a suoksan a, Korinth khuoah a fe a. 2 Chu taka chun Juda mi pakhat Akuila a hmu a, ama chu Ponto rama pieng a nih. Rom lal Klaudia-in Juda mi po po Rom khuo suoksan dinga thu a pĕk leia a nuhmei Prisilla leh Italy rama inthoka hung tlung hlim an nih. 3 Paula chun anni chu a va sir a, ama ang boka puon in siemtu an ni ve leiin a tlung chil a, sin a thawpui hlak a. 4 Sabat ni po leh Sunagog-ah thu a hril a, Judahai le Grikhai chu inringtir tumin thrang a lâk a.5 Makedoniaa inthoka Sila le Timothe an hung tlung thlâk chinah Paula chu thuhril rongbawlna tieng a’n pumpek a, Isu kha Krista chu a nizie Judahai a’n hriettir hlak a. 6 Nisienlakhom, Judahaiin ama chu nasa taka kala an biek sisaw leiin Paulan a puon a thin a, “In thisen maw chu in lu chungah tla raw se. Chu mawphurna laka inthok chun kei chu ka fihlîm. Tuta inthok chu Jentelhai tieng ngha tang ka tih” a ta. 7 Chu taka inthok chun a fe suok a, sunagog bul ela um Tita Justa, Pathien ngaisak mi ina chun a lût a. 8 Sunagog hotu Krispa le a sunghai po poin Lalpa an ring a, a thu hril ngaithlatu Korinth khuoa mi tam tak khomin an ring bok a, baptisma an chang tah a.
9 Zan khat chu Paulan inlărna a hmu a, Lalpa chun a kuomah, “Tri naw rawh, ma loin thu hril pei rawh. 10 Kei i kuomah ka um leiin, sukna ding chein i chungah tu khomin kut thlâk naw ni hai, hi khuoa hin mi tam tak ka nei si a” a ta. 11 Paula chu anni lai chun Pathien thu hrilin kum khat le thla ruk a châm a.
12 Gallio chu Akaia ram optu a ni laiin Judahai chun inthuruolin Paula chu an bei hron a, rorêltu hmaah an thruoi a. 13 “Hi pa hin kan Dan kal zawnga Pathien be dingin mi a thlêm hlak a nih” an ta. 14 Paula chun hang don a tum a, sienkhom Gallio chun Judahai kuomah, “Aw Judahai, hi thil hi thil indik lo amanih le dan bawsietna thil chu ni sien, in thu ka ngaithlak ding a na. 15 Nisienlakhom, thu le hming le nangni Dan chungchanga in buoina thu el a ni chun nangnin ngaituo ro, kei chuong thila chun inrol naw ning” a ta. 16 Rorêlna ina inthok chun a’n suoktir a. 17 Sienkhom mi dang po po chu sunagog hotu Sosthen chunga chun an truong a, an man a, rorêlna ina chun an vuok a. Chu khom chu Gallio chun ienga khom a ûksak chuong nawh.
Antiokei-ah Paula a kîr
18 Paula chu Korinth khuoah sawt tak a chăm hnungin unauhai maksanin Suria ram panin longin a suok a, Prisila le Akuila hai pahniin an zui a. Longa an chuong hma chun, a hmaa thu a lo tiem tah angin Paula chun Kenkriei-ah a lu a’n vawtir a. 19 Efesi khuo an tlung a, chu taka chun Prisila le Akuila chu a maksan a. Ama ruok chu sunagog-ah a lut a, Judahai chu Pathien thu a suipui a. 20 Anni chun la châm hri dingin an thlo a, sienkhom a remti naw a. 21 “Pathienin rem a ti chun in kuomah ka la hung nawk ding annawm”a tiin thra takin a’n thla tawl a, Efesi-a inthok chun longin a suok nawk a. 22 Kaisari a tlung a, chu zoah kohranhai chibai bûk dingin Jerusalemah a hang fe a, Antiokei tieng a kîr nawk a. 23 Antiokeia iemani chen a chawl hnungin a suok nawk a, Galati ram le Frugia ram a fang suok a, ringtuhai chu a suknghet pei a.
Apolo rongbawlna
24 Juda mi pakhat, Apolo, Alexandria khuoa pieng chu Efesi khuoah a hung a. Ama chu lekha thiem, Pathien Lekha thu hre tak a na. 25 Lalpa lampui thuah inchuktirna thra tak dong tah a ni leiin Isu chanchin chu thrahnem ngai tak le chieng taka hrilin mi a’n chuktir hlak a; nisienlakhom, Johan baptisma chauh a la hriet a. 26 Sunagoga khom thu huoi takin a hril a, Prisila le Akuilan a thu hril an hriet chun an inah an thruoi a, Pathien lampui chu ngun takin an hril fie a. 27 Akaia ramah a fe tum ti an hriet chun unauhaiin an thrangpui a, ama an lo lawm lut theina dingin zirtirhai kuomah lekha an ziekpek a. A zuk tlung chun ringtuhai chu Pathien lunginsietna zarin nasa takin a thrangpui a. 28 Isu chu Krista a nizie Pathien Lekha thu hmangin mi a’n chuktir a, vantlang hmaah Judahai chu a sêl dong hlak.