5 Nisienlakhom, Judahaiin an thǐk a, khawlaia mi suol invâk khaw hrâwl mei mei hai chu an inpung khawm a, a khaw phêkin an chawk buoi a. Paula le Sila chu mipui hmaa thruoi suok tumin an zong a, Jason in an va thrawng a. 6 Anni chu an hmu zo naw phing leh Jason le a unau threnkhathai chu khawtlang hotuhai hmaah an hung hnŭk lŭt a, “Khawvel chok buoituhai kha hi taka khom hin an hung a, 7 Jason hin a lo intlungtir vei a. Hienghai hin an rêngin, ‘Lal dang a um, Isu an ti chu’ tiin Kaisar thu kalin thil an thaw hlak a nih” tiin an khêk a. 8 Chuong thu chu an hrietin mipui le khaw hotuhai chu an chi-ai hle a. 9 Jason le ama ruola an hung thruoi mi danghai chu an aia hrên ding dakham an insietir hnungin an insuo tawl tah a.

10 Unauhai chun Paula le Sila chu a zân a zânin Beroi khuoah an infetir a. An tlung chun Judahai sunagog-ah an inkhawm a. 11 Anni chu Thesalonika mihai nêk chun an lo inhong lem a, Paula thu hrilhai chu phûr takin an dong a, an dik le indik naw chiengna dingin Pathien Lekha thu ni tin an tiem hlak a. 12 Juda mi tam takin an ring tah a, Grik mi challang tam tak khomin, a nuhmei a pasalin, an ring bok a.

13 Nisienlakhom, Thesalonikaa Judahaiin Beroi khuoa khom Paulan Pathien thu a hril ti an hriet chun an hung a, mipui an infui por a, an sukbuoi nawk tah a. 14 Chuongchun, Paula chu longa infetir dingin tuipui kam tieng unauhai chun an fepui ta nghal a. Sila le Timothe ruok chu Beroia chun an la châm pei a. 15 Paula thruoituhai chun Athens khuo chen an va’n thla a, Beroi tieng an kir nawk chun Sila le Timothe hai chu an rang thei ang taka hung dinga hril dingin Paula chun thu a’n cha a.

16 Paulan Athens-a a lo nghak lai chun chu khuo chu pathien lima sip a nih ti a hmuin a’n voi tawl hle a. 17 Chuongchun, sunagog-ah Judahai le Grik mi, Pathien ngaisak mihai chu Pathien thu a suipui hlak a, vantlâng pung khawmnaa hunghai khom a hmu taphot chu ni tin thu a hrilpui bok hlak a. 18 Chun, Epikurian^a pawla mi threnkhat le Stoik^b pawla mi var threnkhathai leh khom an insĕl a. Threnkhatin, “Hi nasêtumpa hin iem a hril lie?” an ta. Isu thu le thonawkna thu a hril leiin a thren chun, “Hnam dang pathien thu hriltu a ni awm ie” an ta. 19 Chuongchun, an thruoi a, Areopagi-ah^c an fepui a, “Hi zirtirna thar i hril hi iem a na, ngaithla thei kan ti? 20 Kan hrieta ngei thu dangdai tak i hung hril a, chuong thil umzie chu hriet kan nuom” an ta. 21 Athens mihai le ram dang mi, a khuoa chênghai chun thil dang thlu lêk loa thil thar hril le ngaithlâk an chǐng hlak hrim a nih.

22 Paula chu Areopagia hunghai hmaa chun a ngîr a, a hril a, “Nangni Athens khaw mihai, iengkimah sakhaw mi tak in nih ti ka hriet. 23 Ka lêng malama chibai inbŭk ka en laiin maicham pakhat chungah, “Hriet lo Pathien ta ding” ti inziek ka hmu a. Hre loa chibai inbuk hlak thu chu keiin ka hung hril chêu a ni hi. 24 Pathien, khawvel le a sûnga umhai po po siemtu chu, hnuoi le van lal a ni leiin, kuta siem tempula hai a chêng ve naw a. 25 Thil tlasam hlak, mihriem kuta rong bawlpêk ngai khom a ni bok nawh; ama ngei chu iengkim kuoma hringna hai, inthuokna hai le thil po po petu a ni lem si a. 26 Hnuoi chung hmun tina chêng dingin thlatu pakhata^d inthokin hnam tin a’n din a, an ta dingin hun bihai thliekpĕkin, an umna ding ramrihai a khangpĕk a. 27 Pathien an zong a, an dap an dap a, an dap fuk hlauh theina dingin a thaw a nih; ama chun a mi hlat naw seng si a. 28 Ama leiin ei hring a, ei chăng a, ei um a ni si a. Nangni laia hlaphuoktu threnkhat khomin ‘Eini khom a thlahai ei nih’ tia an hril ang kha a nih. 29 Chuongchun, Pathien thlahai ei ni si chun, Pathien chu rangkachak amanih, tangkaruo amanih, lung amanih, mihriem themthiemna le remhrietnaa inthoka ser suok ang hi ni dingin ei ngai ding a ni nawh. 30 Khang anga mihriem ei mawl lai khan Pathien chun a mi en khŭm hlak a, tu ruok hin chu hmun tina chêng mi po po hi sim ta dingin thu a mi pĕk a nih. 31 Ama mi ruot ngeiin khawvel pumpui indik taka ro a rĕlpêk hun ding ni chu a ruot fel tah a; a ruot ngei ti mi tin kuoma sukchiengna dingin ama chu mithi laia inthokin a keitho tah a nih” a ta.

32 Mithi laia inthoka tho nawkna thu an hriet chun a threnin an nuisan a, a thren ruok chun, “Hi thu hi ngaithlak nawk kan nuom” an ta. 33 Chuongchun, Paula chu anni laia inthokin a suok a. 34 Threnkhatin Paula chu an zui pei a, an ring tah a. Chuonghai lai chun Areopagi-a rorêltuhai laia mi Dionisia hai, nuhmei pakhat Damari hai le mi dang tam tak an thrang ve.