6 Asia rama thu hril lo dinga Thlarau Thienghlimin a ti leiin Paula le a’n zinpuihai chun Frugia le Galati ram po po chu an fang suok a. 7 Maisia ramri an va tlung a, Bithunia ramah lut an tum a, chu khom chu Isu Thlarauin a phal naw a. 8 Chuongchun, Maisia ram chu an fe thleng a, Troas khuo an tlung thla a. 9 Paulan zànah inlârna a hmu a, Makedonia rama mi pakhat ngîrin, “Makedonia ramah hung kai la, mi hung san rawh” tiin a lo ngĕn a. 10 Inlărna a hmu zo chun an kuomah Chanchin Thra hril dingin Pathienin a mi ko niin kan^a hriet a, Makedonia rama fe kan tum ta nghal a.

11 Troas khuoa inthokin longin kan suok a, tluong takin Samotraki khuo kan tlung a, a zingah Neapoli khuo kan tlung nawk a. 12 Chu taka inthok chun Filipi khuoah kan fe a, chu khuo chu Makedonia biela khaw poimaw tak,^b Rom sorkar khuo a nih. Chu taka chun ni iemani zat kan chăm a. 13 Sabat ni chun kul kotkhar puo tieng va kamah trongtraina hmun remchang zongin kan fe a, chu taka chun inthrungin nuhmei hung inkhawmhai kuoma chun thu kan hril a. 14 Thuatir khaw mi, nu pakhat Ludi, Pathien tri mi, puon senduk zortu chun kan thu hril a hung ngaithlak ve a. Paula thu hrilhai zawm dingin Lalpan a lungril a hongpek a. 15 A sunghai leh baptisma an chang a, “Lalpa ring takzeta in mi ruot chun ka inah hung tlung ro” tiin a mi ngĕn a, a mi thlo tăng tah a.

16 Ni khat chu trongtraina hmun pana kan fe laiin bawi nunghak pakhat, ramhuoi zawl, aisan thiem hin a mi’n tuokpui a. A aisan thiemna chu a puhai chun an hlawkpui hle a. 17 Chu nu chun Paula le keini chu a mi zui a, “Hieng mihai hi Pathien Chunghnungtak siehlawhai an na, sandamna lampui an hril chêu a ni hi” tiin a khêk a khêk a. 18 Chuong ang chun ni tam tak a thaw a, Paula chun a ngai thei ta naw a, a ngha kîr a, ramhuoi kawla chun, “Isu Krista hmingin thu ka pêk che; a sunga inthok khan hung suok rawh” a ta. Chu char chun ramhuoi chun a suoksan ta nghal a.

19 Suok neituhai chun an sum hnăr a chât dĕr tah tih an hrietin Paula le Sila chu an man a, bazar hmun, mi pungkhawmnaa chun an hnŭk lŭt a, 20 rorêltuhai hmaah an thruoi a, “Hieng mihai hi Juda mi an na, ei khuo an sukbuoi a nih. 21 Eini Rom mihai zawm le thaw ve thieng lo dan dang an inchuktir a nih” an ta. 22 Chuongchun, mipuihai khom chu tirkohai bei ding chun an hung inthok ve a. Rorêltuhai chun an zakuo hlippek a, hmola vaw dingin thu an pĕk a. 23 An vuok hrep hnung chun lung inah an khum a, vêngtuhai kuomah anni chu him taka vêng dingin thu an pĕk a. 24 Chuong ang khopa thu an pĕk khauh lei chun anni chu rip sungrilah an khum a, an keah thir kol an inbuntir a.

25 Zan rila chun Paula le Sila chu Pathien kuomah an trongtrai a, hla an sak a, tâng danghaiin an ngaithlak a. 26 Thawk le khatah lir nasa tak, lung in thrut lungphum chen inhning dur dur khopa nasain a hung inhnǐng a, lung in kotkhar po po chu a hung inhong a, tânghai kol bun khom a hung insût vong a. 27 Lung in vengtu a hung har chun tânghai chu an tlân suok vong tah sawnin, a kawlhnâm a phawi a, insun hlum a tum a. 28 Paula chun inring takin, “Ieng khom inlaw naw rawh, kan rêngin hi taka hin kan la um vong annawm!” a ta. 29 Chu phing leh khawnvar a lam a, a’n chawm lut a, tria inthin pumin Paula le Sila ke bula chun a bokkhup a. 30 Anni chu tuolah a thruoi suok a, “Puhai, sandam ka ni theina dingin ieng am thawng ka ta?” a ta. 31 Anni chun, “Lalpa Isu ring la, chuongchun sandam ning i tih, nang le i sunghai leh” an ta. 32 Ama le a ina um po pohai kuoma chun Lalpa thu an hril a. 33 Chu zan chun, chu darkar lá là chun anni chu a thruoi a, an vuokna hliemhai chu a sawppek a, an sungin baptisma an chang ta nghal a. 34 Chun, a inah a thruoi a, fak ding a pêk a, Pathien an ring tah leiin an sungkuo chun an hlim ta ĕm êm a.

35 A tûk zingkâr chun rorêltuhaiin, “Kha mihai kha insuo rawh” tia lung in vengtu hril dingin vengtu an tir a. 36 Lung in vêngtu chun an thu chu Paula a hril a, “Rorêltuhai chun insuo ding cheuin mi an hung tir a, tu hin suok unla, thlamuong takin fe ta ro” a ta. 37 Nisienlakhom Paula chun vengtuhai kuomah, “Rom mi kan ni si a, thiem naw chang khom kan ni naw a, vantlang hmaah an mi vuok a, lung inah an mi khum a. Tu hin dei zota mi’n suo el an tum rok a ni? Ni top naw nih; anni ngei hungin mi hung thruoi suok raw hai se” a ta. 38 vengtuhaiin chuong thu chu rorêltuhai an va hril a, Rom mi an nih ti an hriet chun an tri ta hle a. 39 Suklawm tumin an hung a, thupha an chawi a, an thruoi suok a, an khuoa inthoka suok dingin an ngĕn a. 40 Chuongchun, lung ina inthok chun an suok a, Ludi inah an fe a, unauhai an hmu chun an thlamuong a, chu zoah an suok tah a.