4 Peter chun thil hung tlung danhai chu a ni ang takin a hrilfie tran tah a: 5 “Jopa khuoah ka um a, ka trongtrai laiin zêlin ka um a, bawm, puon hlap lien tak ang, kil lia khit, vana inthoka ka umna bula hung inkhai thla ka hmu a. 6 Ka en zing a, hnuoia mi ran ke pali nei hai, bokvâka intawl le intel chi le chungleng vate hai a sunga chun ka hmu a.

7 “Chun, rawlin, ‘Peter, tho la, that la, fa rawh’ a mi tiin ka hriet bok a. 8 Kei chun, ‘Ni lo e, Lalpa, thil inthieng naw le tirdakum ieng khom ka bauah a lût ngai nawh’ ka ta. 9 Vàna inthoka rawl chun, “Pathienin a sukthienghlim tah chu nangin thieng naw ti naw rawh’ a mi ti nawk a. 10 Chuong ang chun voi thum a um a, van tieng khai tung a ni nawk tah a. 11 Chuong lai chun mi pathum, Kaisaria inthoka an hung tirhai chu ka tlungna in kotkhar bulah an lo ngîr ta zing a. 12 Rin dèr loa anni zui nghal dingin Thlarauin a mi hril a. Hieng unau parukhai khom hin an mi zui ve a, Korneli inah kan lŭt a. 13 Ama chun a inah vantirko a hmu thu le a kuomah, ‘Jopa khuoah mi tir la, Simon Peter inkotir rawh, 14 ama chun thu hril a ti che a, a thu hril lei chun nang le i sunghai po po sandamin um in tih’ a ti thuhai a mi lo hril a. 15 Thu chu ka hang hril tran a, Thlarau Thienghlim chu, a tira ei kuoma a hung tlung ang bok khan, an chungah a hung tlung a. 16 Lalpan, ‘Johanin tuiin a baptis hlak a, nangni ruok chu Thlarau Thienghlima baptis ning in tih’ a tihai dam kha ka hriet suok nawk a. 17 Lalpa Isu Krista ei ringa inthoka Thlarau Thienghlim ei dong ang kha Pathienin a pêk ve si chun, kei telul hin Pathien chu ka kal thei ding am a ni?” a ta. 18 Chuong thu an hriet chun soisĕlna ding an hriet tah naw a, “Chuong a ni chun Pathienin Jentelhai khom sima hring dingin a phalpĕk ve an tah chu” tiin Pathien an inpâk a.

19 Stefan leia sukdùdàna tuokhai chu Foiniki rama dam, Kupra thlierkara dam, Antiokei khuo chenin an tlàn dar a, Judahai kuoma chauh Pathien thu an hril a. 20 Anni laia threnkhat chu Kupra thlierkara mi le Kurini khuoa mi an na, chuonghai chun Antiokei an tlung chun Grik mihai kuoma khom Lalpa Isu Chanchin Thra chu an hril ve tah a. 21 Lalpan anni chu a thrangpui a, mi tam takin an ring a, Lalpa tieng an ngha tah a.

22 Jerusalem kohranin an chanchin an lo hriet chun Barnaba chu Antiokeiah an tir a. 23 A zuk tlung chun Pathien lunginsietna sinthaw chu a zu hmu a, a lawm hle a, anni chu ringum taka Lalpa chel tlat dingin a’n fui tawl a. 24 Barnaba chu mi thra tak, Thlarau Thienghlim le ringnaa sip a na, mi tam tak chu Pathien kuoma thruoi lut an hung ni tah a. 25 Chun, Barnaba chu Saula zong dingin Tarsa tieng a fe nawk ta a. 26 A hang hmu chun Antiokeiah a hung thruoi a, kum khat zet kohran mihai kuomah an pahni chun an khawsa a, mi tam tak an zirtir hlak a. Antiokei khuoa hin a nih zirtirhai chu ‘Kristien’ an ti hmasa takna chu.

27 Chuong lai chun Jerusalema inthokin zawlnei threnkhat Antiokeiah an zu fe a. 28 Anni laia pakhat Agaba chu a ngîr suok a, Thlarau inhriettirin Roman lalram sunga trămpui mitsim tlak ding thu a hril lawk a (Klaudia^a inlal laiin trăm chu a tla ta ngei a). 29 Zirtirhai chun an thei ang tawk senga thaw khawmin Judai rama unau umhai chu thrangpuina thon an tum a. 30 An tum ang chun an thaw khawm a, upahai kuomah Barnaba le Saula kutah an thon a.