Peter le Korneli
10
1 Chun, Kaisari khuoa chun mi pakhat Korneli, Italian Regiment an tia sipai zahotu a um a. 2 Ama chu Pathien ngaisak mi, a sunghai po po leh Pathien tri mi, inphal taka retheihai somdawl mi le Pathien kuoma trongtrai rop mi a nih. 3 Ni khat chu chawhnung dar thum velah chieng takin inlârna a hmu a. Pathien vantirko a kuomah hung a, “Korneli” a hung ta. 4 Korneli chun mit âr intraa ama chu enin, “Iem a na, Lalpa?” a ta. Vantirko chun, “I trongtrainahai le mi pasiehai kuoma i thilpekhai kha Pathienin a hriet zing a. 5 Tuhin Jopa khuoah mi tir la, mi pakhat Simon Peter chu inkotir rawh. 6 Ama chu tuipui kama savun siemtu Simon ina tlung a nih” a ta. 7 A betu vantirko chu a liem charin Korneli chun a siehlawhai laia mi pahni le sipai pakhat, Pathien ngaisak mi tak chu a ko a. 8 Anni chu thil umzie iengkim a hril zo chun Jopa khuoah a tir a.9 Chun, a zîngah sŭn chang lai, khuo an tlung tawm lai chun Peter chu trongtrai dingin in chungah a lawn tung a. 10 A phîng a trâm ta hle a, bu fak a nuom a, fak rong an bawl lai chun zêlin a um a. 11 Van inhong a hmu a, puon hlap lien tak ang bawm, kil lia inkhit, hnuoi tienga hung inkhai thla lai chu a hmu a. 12 Chu sunga chun ran ke pali nei chihai,a bokvâka intawl le intel chi le chungleng vate chi tinrêng a um a. 13 Rawlin, “Tho la, that la, fa rawh” a hung ta. 14 Peter ruok chun, “Ni lo e, Lalpa, thil inthieng lo ka fak ngai nawh” a ta. 15 Rawl chun, “Pathienin a sukthieng tah chu thieng naw ti naw rawh” a hung ti nawk a. 16 Chuong ang chun voi thum a hung ti a, bawm chu van tienga khai tungin a um nawk tah a.
17 Chuonga Peterin a thil hmu maktia a ngaituo lai chun Korneli mi tirhai khan Simon in zong suokin a kotkhar bulah an lo ngîr a. 18 “Hi taka hin Simon Peter a tlung am?” tiin an hung indon a. 19 Peterin a thil hmu a ngaituo lai chun Thlarauin a kuomah, “Mi pathumin an zong che. 20 Tho la, trum thla la, ieng khom ringhlel loin anni chu zui rawh; anni chu ka hung tir an nih” tiin a hril a. 21 Chuongchun, Peter chu a trum thla a, an kuomah, “In zong pa chu kei hi ka nih. Iem a na in hungna san?” a ta. 22 Anni chun, “Sipai zahotu Korneli mi tir kan nih. Ama hi mi fel, Pathien tri mi, Judahai po po inzà kâi a na, vantirko thienghlimin ama chu a biek a, i thuhril a ngaithlak theina dingin, a ina nangma fiel ding chein a hril a nih” an ta. 23 Peter chun anni chu a ko lut a, an riektir tah a. A zinga chun anni chu Peter leh an suok a, Jopa khuoa unau threnkhatin an zui bok a.
24 A zing nawk chun Kaisari chu an tlung a. Korneli chun a laibunghai le a ruolthrahai fiel khawmin Peter chu an lo nghak zing a. 25 Peterin in a lut ding chun Korneli chun a lo hmuok a, a ke bulah bokkhupin chibai a bûk a. 26 Peterin ama chu a kei tho a, “Tho rawh, kei khom mihriem el ka ni ve hi” a ta. 27 Ama leh inbe zing pumin Peter chu inah a lut a, mi tam tak lo um khawm chu a hmu a. 28 An kuoma chun, “Judahai ta dingin Jentelhai le insir paw le anni kan a thieng nawzie chu nangni ngeiin in hriet a. Nisienlakhom, tu khom thieng naw le porchè ka ti ding a ni nawzie Pathienin a mi’n hmutir a. 29 Chuleiin, in mi fielna ka hriet charin sêl dĕr loin ka hung a nih. In mi hung fielna san iem an ta le?” a ta.
30 Korneli chun, “Voisun hi ni lina a ni tah a, tu ang hun chawhnung dar thumah ka trongtrai laiin, ngai ta, mi pakhat puon var sil ka bulah a hung ngîr thut a. 31 ‘Korneli, i trongtraina le i thilpêkhai Pathienin a hriet zing. 32 Jopa khuoah mi tir la, Simon, Peter an ti chu inkotir rawh. Tuipui kama savun siemtu Simon inah a tlung a nih’ a ta. 33 Chuleiin, i kuomah mi ka hung tir nghal a nih; i hung thei hi a thra ngot el. Tu hin Lalpan thu a pĕk taphot chê chu ngaithla dingin Pathien hmaah kan rêng hin kan lo um khawm a nih” a ta.
34 Peter chun, “Pathienin mi ditsak bik a nei nawzie ka hriet chieng tah. 35 Hnam tin lai tu khom ama tria thil indik taka thaw taphot chu a lawmzawng mi an nih. 36 Israel nauhai kuomah Pathien chun thu a hung intlun a, remna Chanchin Thra chu Isu Krista hmangin a hung puong ngei a, sienkhom Isu chu mi po po Lalpa a nih. 37 Johanin baptisma thu a hril hnunga Galili rama inthoka intrana Judai ram puma thil hung tlung kha lo hre ta ngei in ta. 38 Nazaret Isu chu Pathienin Thlarau Thienghlim le thilthawtheinain a’n thuom a, Pathien chun a umpui zing a, thil thra thawa inzin vêlin Diebolin a soisak po po a sukdam pei a. 39 Judai ram le Jerusalema a thilthaw po po hretu kan nih; ama chu kraws-ah hemdein an sukhlum a ni kha. 40 Nisienlakhom, Pathienin ni thum niah a kei tho a, hmu theiin a’n lârtir a. 41 Mi tin hmua ruok chu a’n lâr nawh, Pathienin hretu dinga a lo ruot lawk keinihai chauh hin kan hmu a; a tho nawk hnung khan fain kan dawn tlang si a. 42 Chu chu tlang insampui ding le Ama chu mihring le mithi chunga rorêltua Pathien ruot chu a nih ti mihai inhriettir dingin thu a mi pĕk a nih. 43 Zawlnei po po khomin ama ring taphot chu a hming leiin an suol ngaidam ning a tih ti an lo hril hlak a ni kha” a ta.
Jentelhan Thlarau Thienghlim an chang
44 Chuong thu chu Peterin a hril lai zingin a ngaithlatuhai po po chungah chun Thlarau Thienghlim a hung tlung a. 45 Sertanhai laia ringtu Peter hung zuituhaiin Thlarau Thienghlim thilpĕk Jentelhai chunga khom buok a ni ve chu mak an ti hle a; 46 trong hriet lo dama thu hrila Pathien an inpâk chu an hriet si a. 47 Peterin, “Hieng mihai hin eini ang bokin Thlarau Thienghlim an dong si a, tuia baptisma an chang tuin am a khap thei a?” a ta. 48 Chuongchun, Isu Krista hminga baptisma inchang dingin thu a pêk a. Chuong thil hnunga chun ni iemani zât bêk la châm dingin an thlo a.