7 Darkar thum vêl hnungah a nuhmei chu thil umzie hre dêr loin a hung lŭt ve a. 8 Peter chun a kuomah, “Mi hril rawh, ram man chu hieng zât char hi maw in lak?” a ta. Ama chun, “Ni e, hieng zât char hi” a ta. 9 Peterin, “Iem a ta Lalpa thlarau fie tuma in inthuruol? En rawh, i pasal phûmtuhai khomin kotkhar bul an hung tlung nawk ta saw; nang khom zawn suok ve’ng an ti che” a ta. 10 Chu char chun a ke bulah a tlu a, a thi ta nghal a. Tlangvalhai chu an hung lŭt a, ama chu thiin an hung hmu a, an zawn suok a, a pasal bula chun an phŭm ve tah a. 11 Kohran mi po po le chuong thu hre taphot chu namen loin an tri a.

12 Tirkohai chun mipui lai inchikna thilmak tam tak an thaw pei a. Anni rawi chu lungruol takin Solomon tuolpŭka chun an inkhawm hlak a. 13 Mihaiin an ngaisâng hlea chu tu khom anni lai an thrang ngam hri naw a. 14 Chuong sa khom chun, Lalpa ringtuhai chu a nuhmei a pasalin an hung pung tiel tiel a. 15 Chuongchun, Peter inlon vel hlim bĕkin a hlie beiseiin mihai chun an damnawhai chu kotthlêrah an zawn suok a, khum le zàmpherah an inzăl thlek thluk a. 16 Jerusalem sè vêla inthok khomin mi an hung a, damnawhai le ramhuoi tirdakum manhai chu an hung thruoi a, chuonghai po po chu an hung dam ta vong a.

17 Chun, thiempu laltak le a thawpuihai po po, Sadukai pawla mihai chun an thǐk ĕm êm a. 18 Chuongchun an man a, vantlang lung inah an khum a. 19 Nisienlakhom, zanah Lalpa vantirko pakhatin lung in korkhar chu a hung hong a, a thruoi suok a. 20 “Fe unla, Tempulah va ngîr unla, mipuihai kuomah hringna thu le a umzie po po hi va hril ta ro” a ta.

21 Hrila an um ang chun an fe a, vartrienah Tempulah an lŭt a, mi an inchŭktir a. Thiempu laltak le a thawpuihai an hung tlung chun Israelhai rorêlna inpui Sanhedrin inkhawm an ko nghal a, tirkohai chu lung ina inthoka va thruoi dingin mi an tir a. 22 An mi tirhai chu an fe a, sienkhom lung inah anni chu an hmu si nawh. 23 An hung kìr nawk a, “Lung in chu him taka inkhârin, a vêngtuhai khom kotkhăr bula ngîr kan hmu a, nisienlakhom kan hang hong a, a sungah tu khom kan hmu nawh” tiin an hung hril a.

24 Tempul kaptein le thiempu lalhaiin an hriet chun, “Ieng ti lei am ning a ta aw?” tiin an buoi hle a. 25 Chuong lai chun mi pakhat a hung a, “Ngai ta u, lung ina in mi khumhai khan Tempula son mi an zirtir zing annawm” a hung ta. 26 Tempul kaptein chu a rawihai leh an va fe a, tirkohai chu thawluina thrang loin an hung thruoi a, an man lui chun mipuiin lungin an dĕng an trî si a.

27 An hung thruoi tlung chun Sanhedrin hmaah an inngirtir a. 28 Thiempu laltak chun an kuomah, “Hi hminga inchuktir ta dĕr lo dingin thu khauh takin kan pêk chêu a. Sienkhom, in thu zirtirin Jerusalem a sip tah a, hi pa thisen maw hi kan chungah intlaktir trĕp trêp in tum a ni hi” tiin an suosal a. 29 Peter chun, “Mihriem thu nĕkin Pathien thu kan zawm lem ding a nih. 30 Thinga khai kanga in sukhlum tah Isu kha ei thlatuhai Pathien chun a keitho nawk tah a. 31 Israelhai chu an suol insimtira a ngaidam theina dingin ama ngei kha Pathienin lal le sandamtu ni dingin a chang tieng a chawimawi tah a. 32 A thu zawmtuhai kuoma Pathien pêk Thlarau Thienghlim le keini hi a thu hrepuituhai chu kan nih” tiin a don a.

33 Chuong chu an hrietin an lung a khei hle a, tirkohai chu sukhlum an tum a. 34 Nisienlakhom, Farisai pakhat, a hming Gamaliel, Dan zirtirtu, mi po po ngaisang chu Sanhedrina chun a ngîr a, tirkohai chu insuoktir vak dingin anni vêngtuhai chu a hril a. 35 Rorêltuhai kuoma chun, “Israel mihai, hieng mihai chunga in thilthaw tuma hin fimkhur ro. 36 Kha hma deu khan Theuda chu mi ropui tak nia insâlin a hung a, mi zali velin an zui a. Ama chu an that a, a zuituhai khom an indar vong a, ieng khom an ni ta nawh. 37 Chu hnung chun, intiempui lai khan Galili rama mi Juda kha a hung nawk a, ama khomin mi a hîp hle a. Nisienlakhom, ama khom an that a, a zuituhai po po khom an indar nawk vong a. 38 Chuleiin, tuhin ka hril cheu hi, hieng mihai hi tawk naw ro, inumtir mei mei ro. Hieng an thil thaw tum le an thilthawhai hi mihriema inthoka suok a ni chun bo nawk el a tih. 39 Pathiena inthok a ni ruok chun dang thei naw ti niu; Pathien dodal ni lem hlauh rawi in tih” a ta. 40 Chuongchun, a thû chu an zăwm a, tirkohai chu an ko a, an vuok a, Isu hminga thu hril ta dêr lo dingin thu an pĕk a, an insuo tah a. 41 Zirtirhai chu Sanhedrina inthok chun an suok a, Hming leia muolphona tuor tlaka ruot an ni leiin an lawm hle a. 42 Isu chu Krista a nizie thu ni tinin Tempul le in tieng inchuktir le puong dar an ma chuong nawh.