4 A zing vartrien chun Isu chu va kamah a ngîr a, sienkhom Isu a nih ti zirtirhai chun an hriet nawh. 5 Ama chun, “Ruolhai, in man am?” a ta. Anni chun, “Kan man dĕr nawh” an ta. 6 Isu chun, “Long sîr chang tieng khan dêng unla, man in tih” a ta. Chuongchun an hang dĕng a, nga an inkhum rawn leiin an hnûk suok zo tah naw a.

7 Isun a hmangai zirtir khan Peter kuomah, “Lalpa a ni saw” a ta. Simon Peterin Lalpa a nih ti a hril a hriet charin, saruoka um a ni leiin zakuo a hâk sok sok a, dîla chun a’n chawm thla a. 8 Zirtir danghai ruok chu longa chuongin, lĕn sip pûr nga chu hnûkin va kam an hung panpui a, khawmuola inthoka hnai te, tong zahni vel chauha hlaa um an nih.

9 Khawmuol an kai chun meihola mei insêm, a chunga nga le beiphek um chu an hmu a. 10 Isun an kuomah, “Tuhin in nga man kha a thren hung la ro le” a ta. 11 Simon Peter chu longah a va fe a, lên chu va kamah an hnŭk suok a, nga lien tak tak za le sawmnga pathum zet inhnaw bit hai sienkhom lên chu a’n ek dĕr nawh. 12 Isun an kuomah, “Zingbu hung fa ta ro” a ta. Zirtirhai laia tu khomin “Tu am i na?” ti an indon ngam nawh, Lalpa a nih ti an hriet si a. 13 Isu chu a hung a, bei chu a lâk a, a pêk tawl a, chuong ang bokin nga khom a pêk tawl a. 14 Mithi laia inthoka a tho nawk hnunga Isu a’n làr voi thumna a nih.

15 Zingbu an fak khop chun Isun Simon Peter kuomah, “Simon, Johan naupa, hienghai nêk hin nangin kei i mi hmangai lem am? a ta. Ama chun, “Aw Lalpa, ka ngaina che ti i hriet” a ta. Isun a kuomah, \wj “Ka beramtehai chawm rawh” a ta. 16 A voi hninaa chun Isun a kuomah, “Simon, Johan naupa, nangin i mi hmangai tak zet am?” a ti nawk a. Ama chun, “Aw Lalpa, ka ngaina che ti i hriet” a ti nawk a. Isun, “Ka beramtehai enkol rawh” a ta. 17 A voi thumnaa chun, “Simon, Johan naupa, nangin kei i mi ngaina am?” a ta. A voi thumnaah, “Nangin kei i mi ngaina am?” a ti lei chun Peter lungril a na hle a, “Lalpa, iengkim i hriet a, ka ngaina che ti i hriet annawm” a ta. Isun a kuomah, “Ka beramhai chawm rawh. 18 Thu dik tak ka hril che hi, i naupang lai chun incheiin i kawng i khit a, i nuomna tieng tieng i lêng hlak a; i hung upat hnung chun i kut phar i ta, mi dangin i kawng hrênpêk an ti che a, i nuom nawna tieng tieng thruoi an ti che” a ta. 19 Ieng ang thǐna am tuokin Pathien a la chawimawi ding ti kawk hmùna dingin chuong thu chu a hril a nih. Chu chu a hril zoin, “Mi zui rawh” a ta.

20 Peter chu a hang ngha kǐr a, zirtir, Isun a hmangai, zanbu fak laia a awm hnenga hung thlè a, “An mantirtu ding che chu tu tak am ning a ta?” titu khan a hung zui a hmu a. 21 Ama chu Peterin a hmu chun Isu kuomah, “Lalpa, ama saw teh” tiin a’n don a. 22 Isun a kuomah, “Ka hung nâwk chena um dingin ka dit khom ni sien, chu chu nanga dingin iem a trangkai a? Mi zui el rawh” a ta. 23 Chuonga a ti lei chun chu zirtir chu thi lo dingin a unauhai lai a’n thang vĕl a. Amiruokchu, a thi naw ding thu Isun ieng khom a kuomah a hril naw a, “Ka hung nâwk chena um dingin ka dit khom ni sien, chu chu nanga dingin iem a trangkai a?” a ti el a ni lem.

24 Chu zirtir chu hieng thu hretu le ziektu hi a na, a thu inhriettir hi a’n dik a nih ti ei hriet.

25 Hieng naw khom hi thil dang tam tak Isun a thaw a. A kip a kawiin ziek vong ding ni inla, chu lekhabu chu khawvel khom hin a keng ka ring nawh.