3 Isun a don a, “Hi pa hin suol a thaw nawh, a nu le pa khomin an thaw bok nawh, amaah Pathien sinthaw a’n lang theina ding a ni lem. 4 Sŭn a ni lai hin a mi tirtu sin ei thaw ding a nih. Tu khomin sin an thaw thei naw hun zăn a hung tlung ding a nih. 5 Khawvela ka chăm sungin khawvel ĕntu ka nih” a ta. 6 Chuonga a hril zo chun hnuoiah chil a sâk a, a chilin pilpok a siem a, mitdel mita chun a bel a, 7 “Siloam dîlah va phî thla rawh” a ta. Siloam chu ‘Tir’ tina a nih. Chuongchun a fe a, a va phi fai a, mit varin a hung kîr tah a.

8 An tuolbawmhai le kha hmaa a kutdaw lo hmu hlak hai chun, “Hi pa hi kutdawa inthrung hlak kha a ni naw’m a ni?” an ta. 9 Threnkhatin, “Kha pa kha ni e” an ta, mi dangin, “An nawh ie, a angpui a ni lem” an ti bok a. Ama chun, “Kha pa kha ka nih” a ta. 10 Anni chun, “Anleh, ieng tin am i mit a hung var leh?” an ta. 11 Ama chun, “Mi pakhat Isu an ti khan pilpok a siem a, ka mitah a bel a, ‘Siloam dîlah va phî thla rawh’ a ta, chuongchun ka va phi fai a, ka hmu thei el a nih” a ta. 12 Anni chun, “Ama chu khaw la’m a um?” an ta. Ama chun, “Ka hriet nawh” a ta.

13 Chuongchun, mitdel ni hlak kha Farisaihai kuomah an thruoi a. 14 Isun pilpok siema a mit a sukvar ni kha Sabat a na. 15 Chuleiin, Farisaihai khomin mit varna a hmu dan chu an indon a. Ama chun, “Ka mitah pilpok a bel a, ka phi fai a, ka hmu thei el a nih” a ta. 16 Farisai threnkhat chun, “Chu pa chun Sabat an ser naw leiin Pathien kuoma inthoka suok ni naw nih” an ta. Threnkhat ruok chun, “Misuolin ieng tin am hieng ang thilmak hi thaw thei a ta?” an ti bok a, anni rawi karah inthrèna a hung suok ta a. 17 “Ama chu ieng angin am i ngai, i mit a sukvarpek si che a?” tiin mitdel chu an indon nawk a. Ama chun, “Zawlnei a nih” a ta.

18 A nu le pa an ko hma chun mitvarna changtu chu kha hmaa mitdel ngei a ni thu le mitvarna a chang thu chu Judahai chun an awi nuom tlat naw a. 19 A nu le pa kuoma chun, “Hi pa hi in naupa, mitdel saa pieng in ti kha a ni? Iengtin am tuhin a hung hmu thei ta a?” tiin an indon a. 20 Anni chun, “Hi pa hi kan naupa a nih ti kan hriet. Mitdel sain a pieng ti khom kan hriet. 21 Nisienlakhom, iengtin am tuhin a hung hmu thei tah ti kan hriet naw a, a mit sukvartu khom kan hriet bok nawh; ama kha indon ro, puitling a ni ve tah annawm, aman ama chungthu chu hril raw se” an ta. 22 Judahai an tri leiin a nu le pa chun chuong ang chun an ti a nih; Judahai chun, “Ama chu Krista a nih” tia pom taphot chu sunagoga inthoka hnawl ding tia thu an lo rĕl ta sa a ni si a. 23 Chu lei chun a nih a nu le pain “ama kha indon ro, puitling a ni ve tah annawm” an ti chu ni.

24 Chuongchun, mitdel ni hlak chu an ko nawk a, “Pathien chawimawi rawh.^an Hi mipa hi misuol a nih ti kan hriet” an ta. 25 Ama chun, “Misuol a ni le ni naw ka hriet nawh, thil pakhat ka hriet, mitdel ka ni hlak a, tuhin ka hmu thei tah” a ta. 26 Anni chun, “Iengtin am a thaw chea i mit a hung var el chu?” tiin an indon nawk a. 27 Ama chun, “Ka hril vong ta chêu annawm, in hriet nuom si nawh. Ieng dinga tuta in hriet nuom nawk tlat? Nangni khom a zirtir ni ve in nuom a ni?” a ta. 28 Anni chun an hal a, “Nanga phiengsen hi ama zirtir i na, keini chu Mosie zirtirhai kan nih. 29 Pathienin Mosie a biek ti kan hriet, hi pa ve hi khaw lai mi am a na ti kan hriet hrep nawh” an ta.

30 Ama chun a don a, “Chu tak chu a nih a makna chu! Khaw lai mi am a nih ti in hriet naw a, sienkhom ka mit a sukvar tlat si. 31 Pathienin mi suol thu a ngaithlak ngai nawh ti ei hriet; Pathien ngaisaktu, a ditzawng thawtuhai thu ruok chu a ngaithlak hlak. 32 Khawvel insieng tira inthokin mitdel saa pieng mit an sukvar nawk ti tu khomin an hriet ngai nawh. 33 Hi pa hi Pathien kuoma inthoka suok ni naw sien chu ieng khom thaw thei naw nih” a ta. 34 Anni chun, “Nang, suol letdĕra piengin keini i mi hril vei maw!” an ta. Chuongchun, an hnot suok tah a.

35 An hnot suok ti Isun a lo hriet chun a zong suok a, “Pathien Naupa i ring am?” a ta. 36 Ama chun, “Pu, ama chu tu am a na? Ring ka tih” a ta. 37 Isun a kuomah, “Ama chu i hmu zing tah, a betu che hi a nih” a ta. 38 “Lalpa ka ring ie” tiin a chawibiek nghal a. 39 Isun a kuomah, “Rorêl dinga hi khawvela hung ka nih, mitdelhai mit a hung varna ding le mitvarhai mit a hung indelna dingin” a ta.

40 An bula um Farisaihaiin chu thu chu an hrietin, “Keini khom mitdel kan ni ve a ni?” an ta. 41 Isu chun, “Mitdel in ni chun suol leia inthiem nawna lungril nei naw ti niu; tuhin chu ‘Kan hmu thei’ in ti tlat leiin inthiem nawna suol chu nangniah a um zing a nih” a ta.