4 Isu kuoma chun, “Zirtirtu, hi nu hi a uire lai taka man a ni a. 5 Mosie mi pek Dan ang chun hieng ang nuhmei hi lunga deng hlum ding a na, nangin iengtin am i ngai a?” an ta. 6 Chu chu a hĕkna ding an hmu theina dinga khal âwk an tumna a nih. Sienkhom, Isu chu a kûn a, a kutpàrin hnuoiah thil a ziek a. 7 Chuonga an hnaw sek sek lei chun a hang dăk a, an kuomah, “Nangni lai suol nei lo in um chun dêng hmasa raw se” a ta. 8 A kûn a, hnuoi a ziek nawk a.^b

9 A thu hril an hrietin, a upa taka inthoka tranin pakhat khatin an inrel hmang a, a tawpah Isu le nuhmei ngîr chauh chu an um tah a. 10 Isu chu a hang dăk a, “Nuhmei, khaw lai am an um zo ta a? Thiem naw inchangtir che tu khom an um naw a ni maw?” a ta. 11 Ama chun, “Pu, an um nawh” a ta. Isu chun, “Kei khomin thiem naw ka’n changtir naw che. Fe la, suol nawk ta ngai naw rawh” a ta.^c

12 Isun an kuomah thu a hril nawk a. “Kei hi khawvel ĕntu ka nih, tu khom a mi zui chu inthimah lêng top naw ni a, hringna var nei lem a tih” a ta. 13 Farisaihai chun, “Mani thu a nih i hril, i thu hril a’n dik nawh” an ta. 14 Isun, “Keima thu inhriettir lang khom ka thu inhriettir chu a’n dik a nih, ka hung suokna le ka fèna ding ka hriet si a; nangni chun ka hung suokna le ka fèna ding chin in hriet nawh. 15 Nangni chun mihriem dân hmangin thu in rĕl a, kei ruok chun tu chung thu khom ka rĕl nawh. 16 Lo rĕl khom ni ta lang, ka thu rêl chu indik a tih, a rêltu chu keima el ni loin kei le mi tirtu Pa kan ni si a. 17 In Dana ngĕi khom, hrepuitu mi pahni thu chu pom tlâk a nih ti ziek a um. 18 Keiin ka thu ka’n hriettir a, a mi hrepuitu chu mi tirtu Pa a nih” a ta. 19 Anni chun “Khaw lam i pa chu?” an ta. Isun, “Nangnin in mi hriet nawh, ka Pa khom in hriet nawh. Kei mi hrie ni unla chu, ka Pa khom in hriet ta ding bah” a ta. 20 Chuong thu chu Tempul thawlawm bawm siena bula a zirtir laia a hril a nih. Tu khomin an la man chuong nawh, a hun a la tlung naw leiin.

21 Isun an kuomah, “Ka fe hmang ding a na, nangnin mi zong in ta, in suolna leh thi’ng in tih; ka fèna dingah nangni hung thei naw ti niu” a ti nawk a. 22 Judahai chun, “‘Ka fena dingah nangni hung thei naw ti niu’ a ti hi ama le ama inthat a tum ni’ng a ti?” tiin an indon tuo a. 23 Isu chun hril zom peiin, “Nangni chu hnuoi tienga inthoka hung suok in na, kei chu chung tienga inthoka hung thla ka na; nangni chu hi khawvela mi in na, kei chu hi khawvela mi hi ka ni nawh. 24 Chu lei chun annawm, ‘In suolna leh thi’ng in tih’ ka ti kha; Keima chu ka nih ka ti hi in awi si naw chun in suolna leh thi hrim in tih” a ta. 25 Anni chun, “Tu’m i na ?” an ta. Isun, “A tirin ka hril ta chêu an naw maw? 26 In chungchang thua hin hril le rĕl ding tam tak ka nei; ieng po khom ni sien, a mi tirtu chu mi indik tak a na, a kuoma inthoka ka hriet chauh khawvel kuomah ka hril hlak” a ta. 27 An kuomah Pa thu a hril a nih ti an hriet si nawh.

28 Isu bokin an kuomah, “Mihriem Naupa hi in khai kăng phâ leh tu am ka nih ti le keima thuin thil ieng khom ka thaw naw a, Pain a mi hril ang peiin ka hril chauh a nih ti hung hre ta’ng in tih. 29 A mi tirtu chu ka kuomah a um a, makhata um dingin a mi thlathlam ngai nawh, a lawmzawng ka thaw pei hlak leiin” a ta. 30 Chuong thu chu a hril lai zingin mi tam takin ama chu an ring tah a.

31 Ama ringtu Judahai kuoma chun Isun, “Ka thuah in um zing chun ka zirtirhai ni takzet in tih. 32 Thutak hrieng in ta, thutak chun inzalêntir a ti chêu” a ta. 33 Anni chun, “Abraham thlahai kan nih, tu bawia khom kan la um ngai nawh. ‘Inzalêntir a ti chêu’ iengti tia i ti am a na?” an ta. 34 Isun an kuomah, “Thu dik tak ka hril chêu hi, tu khom suol thawtu chu suol bawi a nih. 35 Bawi chu sungkuoah a thrang zing nawh, naupa ruok chu kumkhuoin nau a ni zing. 36 Chuleiin, Naupain a’n zalêntir chêu chun zalên tak tak ta’ng in tih. 37 Abraham thlahai in nih ti ka hriet. Amiruokchu, mi that in tum si, ka thuin nangniah hmun a chang naw leiin. 38 Keiin ka Pa kuoma thil ka hmu chu ka hril hlak; nangni ruok chun in paa inthoka in hriet chu in thaw hlak” a ta.

39 Anni chun, “Kan pa Abraham a nih” an ta. Isun, “Abraham nauhai in ni chun Abraham thaw ang thaw’ng in tih. 40 Tu ruok hin chu, Pathien kuoma inthoka thutak hretu le hriltu cheu hi, mi that in tum si! Abrahamin hieng thil hi a thaw ngai nawh. 41 In pa thaw ang in thaw ve a ni hi” a ta. Anni chun, “Sawn kan ni nawh, pa pakhat chau kan nei, Pathien ngei chu” tiin thrang an khaw a. 42 Isu chun an kuomah, “In pa chu Pathien ni sien, mi hmangai in tih, Pathiena inthoka hung ka ni si a. Hi taka ka um hi ka thua hung ka ni naw a, amain a mi tir lei a nih. 43 Ka thu hril hi ieng leia in hriet thiem naw? Ka thu in man fuk thei naw lei a nih. 44 In pa Diebol nauhai in na, in pa lawmzawng thaw in nuom hlak. Ama chu a tira inthokin tuolthattu a na, thutakah a ngîr ngai naw a, amaah thutak a um bok nawh. Khêlhril hi a piengpui trong hrim a na, a khêlhlip a, khêl po po pa a nih. 45 Thutak ka hril lei chêuin in mi ring naw a ni hi. 46 Ka suolna hrie nangni lai tu’m in um? Thutak ka hril chêu hi, ieng leia in mi ring naw? 47 Pathien mi chun Pathien thu a ngaithlak hlak; nangni ruok chun ka thu in ngaithlak nawh, Pathiena inthoka suok in ni naw leiin” a ta.

48 Judahai chun, “Nang hi Samari mi, ramhuoi zawl kan ti che kha kan lo ti indik hle an naw maw?” an ta. 49 Isu chun, “Ramhuoi zawl ka ni nawh, ka Pa ka chawimawi a ni lem; nangni ruok chun in mi sukpâwi si. 50 Mani ropuina ka zong nawh, sienkhom a zongtu pakhat a um a, ama chu rorêltu a nih. 51 Thudik ka hril chêu hi, tu khom ka thu vongtu chun kumkhuoin thina intem ngai naw nih” a ta. 52 Chu zet chun Judahaiin, “Tuhin chu ramhuoi zawl ngei i nih ti kan hriet chieng tah. Abraham a thi tah a, zawlneihai khom an thi tah a, nang hlakin, ‘Tu khom ka thu vongtu chun kumkhuoin thina intem ngai naw nih’ dam i ti vĕl a. 53 Kan thlatu Abraham nêkin i ropui lem am a ni? Ama khom a thi tah, zawlneihai khom an thi tah. Nang, a tua inruot rêng rĕng che?” an ta.

54 Isun a don a, “Mani inchawimawi ni lang, ka mawiin thu fûn naw nih. ‘Kan Pathien’ in ti ve, ka Pa chu mi chawimawitu a nih. 55 Nangnin ama chu in hriet si nawh, kei chun ama ka hriet. ‘Ama chu ka hriet nawh’ ti lang, nangni ang boka khêlhlip ning ka tih. Ama ka hriet a, a thu ka vong hlak. 56 In thlatu Abraham kha ka ni hmu ding a ni leiin a hlim êm ĕm a, a hmu ta ngei a, a lawm hrim a nih” a ta. 57 Judahai chun, “Nang kum sawmnga khom la tling lo che, Abraham i hmua maw?” an ta. 58 Isun, “Thudik tak ka hril chêu hi, Abraham pieng hma khomin ka um tah” a ta.

59 Ama dĕngna dingin lung an rŭt a, sienkhom Isu ân bi a, Tempula inthok chun an rel suok tah a.