MATHAI
Isu Krista thlatuhai
1
1 Abraham naupa, Davida naupa Isu Krista thlatuhai inthla sawng dan chu hieng ang hi a nih:2 Abrahamin Isak a thla a, Isakin Jakob, Jakobin Juda le a unauhai, 3 Judain Tamar lakah Perez le Zera, Perez-in Hezron, Hezronin Aram, 4 Aramin Aminadab, Aminadabin Nason, Nasonin Salmon, 5 Salmon le a nuhmei Rahabin Boaz, Boaz le a nuhmei Ruthiin Obed, Obed-in Jesai, 6 Jesaiin Lal David.
Davida’n Uria nuhmei lakah Solomon a thla a, 7 Solomonin Rehoboam, Rehoboam-in Abija, Abija-in Asa, 8 Asa-in Jehosafat, Jehosafatin Joram, Joramin Uzia, 9 Uzia-in Jotham, Jothamin Ahaz, Ahaz-in Hezekia, 10 Hezekia-in Manase, Manase-in Amon, Amon-in Josia, 11 Josia-in Babulon sala an intăng lai velin Jekoni le a unauhai a thla a.
12 Babulon sala inthoka an suok hnungin, Jekoni-in Sealthiel, Sealthiel-in Zerubabel, 13 Zerubabelin-in Abiud, Abiud-in Eliakim, Eliakim-in Azor, 14 Azor-in Zadok, Zadokin Akim, 15 Akim-in Eliud, Eliud-in Eleazar, Eleazar-in Mathan, Mathan-in Jakob, 16 Jakob-in Josefa, Mari pasal, Mari lakah Isu Krista chu a hung pieng a nih.
17 Chuongchun, Abrahama inthoka Davida chen inkarah suon sawm le suon li an um a, Davidaa inthoka Babulon sala an thruoi hun chen inkarah suon sawm le suon li an um a, Babulon sala an thruoia inthoka Krista chen inkarah suon sawm le suon li bok an um a nih. 18 Isu Krista hung pieng dan chu hieng ang hi a nih: A nu Mari chu Josefa nuhmei huol a na, nupaa an um hmunkhat hmain Thlarau Thienghlimin nau a’n pâitir ti hriet a hung ni tah a. 19 A pasal huol Josefa chu mi fel tak a ni leiin tlâng hrieta sukmuolpho a nuom naw a, a rûka thrè el a tum a. 20 Nisienlakhom, chuonga a ngaituo hnung chun a mangah Lalpa vantirko a hung inlăr a, a kuomah, “Josefa, Davida naupa, Mari hi i nuhmei dinga thruoi intîm naw rawh, a nau pai chu Thlarau Thienghlim laka mi a nih. 21 Naupa nei a ta, a hmingah Isu i sak ding a nih; ama chun a mihai chu an suolhai laka inthokin a sandam ding a ni si a” a ta.
22 Hieng thil tlung po po hi Lalpan zawlnei hmanga a lo hril tah chu a hung tlung kimna ding a nih:
23 “Nunghak thienglâmin nau pai a ta,
Naupa nei a ta,
A hmingah Immanuel sak an tih”
tiin. Immanuel chu “Ei kuomah Pathien a um” tina a nih.