3
1 “Ngai ta, ka tirko ka hung tir a,Ka hmaah lampui buotsai a tih.
In zong rop hlak LALPA chu,
A tempulah hung inlang thut a ta,
Thuthlung tirko in nghàkhlà chu,
A hung inlang ding a nih,”
Iengkim LALPA chun a tih.
2 Sienkhom a hung inlang ni chu,
Tuin am tuor zo a ta?
Ama a hung inlang pha chun,
A hmaah tu’m ngir ngam a ta?
Ama chu rawtuina mei ang le
Puon sawptu sabon ang a nih.
3 Tangkaruo raw thiengtu le
Thlit fimtuah inthrung a ta,
Rangkachak le tangkaruo angin,
Levi thlahai sukthieng a ta,
A hmaa thil inhlàntu ding,
LALPAN mi fel nei tang a tih.
4 Tien lai hun le ni ang khan,
Judai ram le Jerusalema
An thil hung inhlànhai chu,
LALPAN lo pom tang a tih.
5 Ro rêl dingin hung hnai ka ta,
Dawithiemhai, uire hmanghai,
Thukhêla inkhâm chînghai,
Inhlawfahai hlaw hlêppĕk a,
Hmeithaihai le fahrahai nêksawr a,
Ram dang mihai chu thlier a,
Indik taka ro relpêk ngai loa,
Mi trina nei lohai chunga chun,
Hrepuitu truonrangah thrang ka ta,
An chungthu rêl nghal ka tih”
Iengkim LALPA chun a tih.
Sawma pakhat pek thu
6 “Kei hi danglam lo LALPA,
Ka ni leiin aw Jakob thlahai,
In bohmang naw a ni hih.
7 In pi le pua inthok khan,
Ka thu ruothai nghatsanin,
Ka thu in zawm nuom si nawh.
Ka kuomah hung kir unla,
In kuomah hung kir ka tih”
Iengkim LALPA chun a tih.
Nisienkhom, nangni ruok chun,
“Iengtin am ei kir ding?” in tih.
8 Tu’n am Pathien a rok hlak?
Sienkhom in mi rok hlak si.
Chuong a ni sà khom chun nangnin,
“Iengtin am kan rok che?” in tih.
“Sawma pakhat le thilhlânah tie!
9 Nangnin in mi rok leiin,
Trongse hnuoiah in um a,
Hnam pumin trongsie in phur.
10 Ka ina bu tamna dingin,
In sawma pakhat kim takin,
Ka bu inah hung hlù lût ro.
Van tukverhai hongpĕkin,
Malsawmna tiem seng lo hiel,
Ka vŭr ding le ding naw cheu,
Mi hang infie hrim hrim ro”
Iengkim LALPA chun a tih.
11 “Fa se theitu po po chu,
Keimain khap vong ka ta,
In huona grêp rahai chu,
A hlam tril hrim um naw nih,”
Iengkim LALPA chun a tih.
12 “Chuongchun, hnamhai po poin,
Hamthra la ting an ti cheu,
Ram ditum i ni ding a ni si,”
Iengkim LALPA chun a tih.
Pathienin lunginsiet a tiem
13 “Ka chungah in trong inrum”
Tiin LALPA chun a hril.
Chuong a ni sa khom chun nangnin,
“I nâk kal zawng iem kan hril?”
Tiin in mi la don kir a.
14 “Pathien rongbawl ei ti hi,
Thilthlawn mei mei a lo nih.
A mamaw thilhai thaw a,
Iengkim LALPA hma bula,
Lusun anga ei kun hin,
Ieng am hlawkna ei hmu a?
15 Mi chapo an engthawl a,
Suol thawtu an hmuingil a,
Pathien chotu khom an him”
Tia in hril hlak hi annawm!
16 LALPA trituhai ruok chu,
Inbein an inrawn khawm a,
LALPAN ngaithla’n a lo hriet a;
LALPA tri le inzàtuhai chu,
Hriet zingna lekhabua chun,
A mithmuah an inchik hlak.
17 Iengkim LALPA chun a tih:
“Ka rohai ka khawm pha chun,
Anni hi ka rochan ning an tih.
A rongbawltu a naupa ta dinga,
Pain ro a hlàpèk hlak angin,
Anni khom hlàpêk ka tih.
18 Chu phâ chun mi fel le rilo,
Pathien rongbawltu le tu naw chan,
Hang inthlauzie hmu nawk in tih.