3 “Nangni leiin in thlahai chu zilhau ka tih. Hlànbieknaa in ran inhlàn èk chu in hmaiah tât pher ka ta, chu pum chun lak hmangin um in tih. 4 Levi kuoma ka thuthlung chu a ngîr zing theina dingin ka zilhau cheu a nih ti hi chu pha chun la hrieng in tih” ti hi Iengkim LALPA thu suok a nih. 5 “Ka thuthlung, hringna le thlamuongna thuthlung chu Levi kuomah ka pêk a, chu chun inzà a phur leiin a mi’n zâ hrim a, ka hming nasa taka inzain a mi tri a. 6 A băuin zirtirna indik a sâk suok a, a hmŭra inthokin thu indik lo a suok ngai nawh. Ringum tak le ngîl takin a mi zui a, mi tam tak chu an suolnaa inthokin a’n lamlĕttir a. 7 Thiempu hmûr chun hrietna a pâi ding a na, a băua inthokin mihaiin zirtirna thucha an zong hlak ding a nih, ama chu Iengkim LALPA tirko a ni si a. 8 Nangni ruok chu lampuia inthokin in pèt hmang a, in zirtirna chun mi tam tak in insuithluktir a, Levi le ka thuthlung siem chu in bawsiet a nih” ti hi Iengkim LALPA thu suok a nih. 9 “Ka lampuihai in hraw naw lei le dàn thilah thlei bik in nei leiin mi po po hmaah hmusit le endongah ka siem chêu a nih” tiin.

10 Ei rêngin Pa pakhat chauh ei intlăng a ni naw am a ni? Pathien pakhat siem vong ei ni naw am a ni? Ieng leia pi le puhai thuthlung sukporchè a, unau le unau ei inhlèm hlak am a na? 11 Juda chu a depdè leiin Israel ram le Jerusalemah thil tirdakum a thaw a, ram dang milim pathien betu chu nuhmeiin a nei a, LALPA hmangai hmun thienghlim chu a sukporchè ta si a. 12 Hieng thil thawtu chu tu khom ni sien, Iengkim LALPA kuoma thilhlân hung chawitu khom ni sien, ama chu Jakob sungkuoa inthokin LALPAN sât thla raw se.

13 “In thilthaw dang pakhat chu mitthlia LALPA maicham in infar khum hi a nih. A ngaithlak ta naw cheu lei le kuta thilhlân in hung chawihai chu lawmumah a ngai ta naw leiin in trap khĕk a. 14 Nangni chun “Ieng leia a pom naw ning a ta?” dam in la ti ta deu deu! A san chu, LALPA hrietpuia i vanglai nuhmei chu ringum taka inkoppui tlat dinga thu tiem siin i thuthlungna, i nuhmei lakah i ringum si nawh.

15 “LALPA chun pumkhatin a siem a ni naw am a ni? Taksa le thlarauah a ta an nih. Ieng leia pumkhata a siem am a na? Pathien ngaisak mi, chi thlatu ding a zong lei a nih. Chuleiin, in nun vong thra unla, in vanglai nuhmei lakah depdè naw ro.

16 LALPA Israel Pathien chun, “Inmâk hi ka theida a nih” a tih. “Nuhmeihai rawng taka soisak khom ka theida a nih. Chuleiin, in nun vong thra unla, in nuhmei chungah ringum ro” ti hi Iengkim LALPA thu suok a nih.

17 In thuin LALPA a suksawl zozai tah. Sienkhom nangni chun, “Iengtin am kan suksawl hrim hrim a?” in tih. “A mithmua thil suol thawtu taphot chungah LALPA a lawm” ti amanih, “Khaw lam indik taka rorêltu Pathien chu a um a?” ti amanih in hril vet hi a ngai nghok a nih.