2 LALPA chun, “‘Ka hmangai cheu a nih’ a ta, nangni ruok chun, ‘Ieng tik khan am i mi hmangai a?’” in ti a. “Esau kha Jakob unaupa a ni naw am a ni? Sienkhom, Jakob chu ka hmangai a, 3 Esau ruok chu ka theida a, a tlâng hluo chu rausan hmunah ka siem a, a rochan chu thlalĕra sihalhai ka pêk a ni kha” ti hi LALPA thu suok a nih.

4 Edom mihai chun, “Suksietin ei uma chu ei ram tlu se tah chu indin thar ei tiu” an ti khom a ni thei. Sienkhom, Iengkim LALPA thu suok chu hi hi a nih: “Indin thra khom ni hai sien keiin thriek nawk tho ka tih. ‘Ram Rilo’ ti hming put a ta, LALPA lunginsenna chu an chungah fu zing a tih. 5 Chu chu in mit ngeiin hmung in ta, ‘Israel ram puo tieng khom LALPA chu a ropui ie!’ la ting in tih” tiin.

6 “Naupa chun a pa a chawimawi a, siehlaw chun a pu a chawimawi. Kei hi pa ka ni chun, khaw la’m ka phu ang chawimawina chu in mi pĕk hlak a? Hotu ka ni chun khaw la’m ka phû ang inzàna chu in mi’n entir hlak a? Aw thiempuhai, nangni hi in nih ka hming sukpawitu chu!” ti hi Iengkim LALPA thu suok a nih. “Sienkhom nangni chun, ‘Ieng kongin am i hming kan sukmuolpho a?’ tiin in indon hlak. 7 Ka maichămah sa porche in sie zing lai khomin, ‘Iengti kongin am kan sukporchè che a?’ in tih. Chuonga in ti chun LALPA dawkan chu hmusitumah in siem a nih. 8 Hlànbiekna dinga ran mitdel in hung lak kha thil indik lo a ni naw am a ni? Ran kebai le natna nei in inhlàn kha thil indik lo a ni naw am a ni? In ram optu kuomah inhlàn tum hrim ta u. In chungah a lawm in ring am? A lo hlutsak chêu in ring hrim hrim a ni?” ti hi Iengkim LALPA thu suok a nih.

9 “In chungah za ngai dingin Pathien ngĕn mol ro. Sienkhom, chuong ang thilhlân in hung chawi si chun, ieng leiin am ditsakna a’n hmutir ding chêu a na?” ti hi Iengkim LALPA thu suok a nih.

10 “Ka maichămah a thlăwna mei in inkhŭk nawna dingin tempul kot lo khartu ding mi um inla chu thra ding maw! In chungah lawmna hrim ka nei naw a, in kuta inthoka thilhlân ieng khom pom naw ning” ti hi Iengkim LALPA thu suok a nih. 11 “Nisa suoknaa inthoka a tlàkna chena hnamhai lai ka hming hi ropui a tih. Hmun tinah rimtui le thilhlân thienghlimhai ka hmingin hung chawi an tih, ka hming hi hnamhai lai a ropui ding a ni si a” ti hi Iengkim LALPA thu suok a nih.

12 “Nisienlakhom nangnin, ‘LALPA dawkan chu a va porchè de! An thil inhlànhai khom chu inzàpui a va hang um de!’ in ti hin ka maicham in suktirdakum a nih. 13 Chun, ‘A va hei nghokum de aw’ tiin hmusit takin hnâr in hnawt khum bok hlak” tiin Iengkim LALPA chun a hril. “Ran sil-ong dam, kebai dam le natna nei dam in hung inhlàn hin, in kuta inthokin ka lo pom ding am a ni?” LALPA chun a tih. 14 Mani ran ruol laia hmêl hemna nei lo a chal nei zing a, chu chu inhlàn dinga thu intiemkam bok sia ran hmêl hem LALPA kuoma inhlàn lemtu chu trongsie phurin um raw se. Kei hi lal ropui tak el ka na, ka hming hi hnam tin lai khom an trisim ding a