Ninevi siet ding
2
1 Ninevi, rûntu ding che a hung,Kulbing vêng la,
Lampui vêng la,
Insingsa la,
Takchapa! ti’n thrang khaw rawh.
2 Israel ropuina ang bokin,
Jakob ropuina khom chu,
Suksetuhaiin sukramin,
A grep kung suktlaran sien khom,
LALPA chun tungding a tih.
3 A sipaihan phaw sen an chawi,
A senlârin an inthuom a.
An tawlailir buotsai ni chun,
A thirhai chu a tle zok zok a,
Fâr fei ngul an chawi fuk a.
4 Tawlailirhai chu kotthlêrah,
A suk a tungin an tlăn a,
Meiser angin an inhlap a,
Kawl angin an inlep zok zok.
5 A mi huoi thlanghai a ko a,
Petek nok nokin an hung tlăn a.
Kul bei dingin an baw rok rok a,
An inphĕnna ding an siem.
6 Va kam ep kotpui an hong a,
Lal in chu a tlu ta ruop a.
7 A khuoa cheng po po chu,
Sala thruoi di’n thu an pek a,
Bawinuhai chun awm inchumin,
Vathru angin an inrŭm a.
8 Ninevi chu dil sat thre angin,
Mipui an trĕ ta huk el a,
“Ngir ro, ngir ro” ti’n an khêk a,
Ngha kîr tu khom an um nawh.
9 Tangkaruohai kha lapek ro!
Rangkachakhai kha lapek ro!
A rosum tamzie hlak chun,
Tawpintai a nei si nawh!
10 An rok a, an suom a,
Saruok kĕlin an siem a!
An lunglai a zop, an khŭp a zoi,
An kawng inthin hlop hlopin,
An hmai khom a dâng zo vong.
11 Sakeibakneihai bu zawl,
Tri nei loa an khawsakna,
Keipui le keichal ruolin,
An tehai an chawm tleina chu,
Khaw lai am a um ta a?
12 Keichalin a tehai tlai khop,
A sa se a bŭm rem rum a,
A koppui chawmna dingin,
A sa man chu a rêk hlum a,
A pûk chu a sa sein a hnaw sip a,
A bu zawl chu sa ruong ngotin.
13 Iengkim LALPA chun,
“Ngai ta, ka do chê a nih.
I tawlailirhai chu khu lui luiin,
Ka raw hmang vong ding a na,
I têhai kawlhnâmin that an ta,
Hnuoia hin sa se ding hrim,
Maksanpek nawng ka ti che.
I palaihai rawl hrim hrim,
Hriet ni ta ngai naw nih”
Tiin a lo puong ta si a.