NAHUM
Ninevi chunga LALPA lungsenna
1
1 Ninevi chungthua Elkos mi Nahumin inlàrna thu a hmu thu inziekna bu chu a nih.2 LALPA chu Pathien thîkthusie,
Phuba la hmang a nih;
LALPA chun lungsen takin,
A phuba chu a lâk hlak a,
LALPA chun ama dotuhai chu,
A thungrul ngĕi ngêi hlak a,
A hmêlmahai laka khom,
A lungsen a’n tûr zing hlak.
3 LALPA chu lung inuoi a na,
Nasa taka thilthawthei a na,
LALPA chun mi suol tu khom,
Hrem loin a’n suo ngai nawh.
LALPA lampuiin a hraw chu,
Thrawngaleivir le thlipui a na,
Sûm hi a pilvut pal khŭk a nih.
4 Tuipui a hal a, a kang chat a,
Vadung po po a kang zo a,
Basan le Karmel tlang a trăwl a,
Lebanon tlang vul mawi a chuoi.
5 A hmaah tlanghai an inhnǐng a,
Muolhai an intui zop a,
Hnuoi le a sunga chenghai chu,
A hmaa chun an inthin a.
6 Tun am a lungsen hmason a,
A lung inling tuor zo ding?
A lungsen chok inhlap chun,
Lungpuihai khom a hlap dar.
7 LALPA chu a thra a,
Buoi huna himna kul nghet a na,
Ama ringzotuhai a ngaisak hlak.
8 Ninevi chu tui lien sangin,
Inchîm piltir vong a ta,
Ama dotuhai chu thlăn thimah,
An rêngin hnot lut a tih.
9 LALPA an phiernahai chu,
Aman suktawp vong a ta,
Buoina um nawk ta naw nih.
10 Hling bukah intâng an ta,
An uoiin indawn rui an ta,
Meiin bupawl a lem angin,
Anni chu lem hmang a tih.
11 Aw Ninevi, nangmaa inthokin,
LALPA chunga thil suol phiertu,
Thurawn rilo petu a hung suok.
12 LALPA chun hieng hin a tih:
“Anni chu tam tak niin,
Inkoppui neihai sien khom,
Săm thlûkin la um an ta,
La bohmang vong tawl an tih.
Sukrinum hlak lang chê khom,
Aw Juda, sukrinum ta nawng ka che.
13 An ringkol inbattir che chu,
I rînga inthokin hlîp ka ta,
I kol bun peihawn ka tih.”
14 Ninevi, i chungthuah,
LALPAN hieng hin thu a pêk:
“I hming la hung puttu ding,
Thla hrim hrim nei naw ti nih.
Tempula i milim ker le siemhai,
A rêngin suksieng ka ta,
I thlăn ding buotsai ka tih,
Mi suol tawp i ni si a.”
15 Tlânga inthoka chanchin thra,
Hung intluntu kè mawi saw, en ta,
Inremna thu intluntu kè mawi saw!
Aw Juda, i kûthai chu inser la,
I thu intiemhai chu hlen rawh.
Mi rilohan rûn ta naw ni che,
Suksiet dèrin um an tih.