Ninevi chungpikna
3
1 Thisen insuo hmang khawpui,Khêl le inroknaa sip,
Chatlak loa sa sè nei zing chu,
A chung a va hang pik de aw!
2 Vuokna hmol an ri zot zot,
Tawlailir ke a thûm chur chur,
Sakor ruol an tlan puot puot,
Tawlailir an sukchawl thut!
3 Sakor chungchuong mihaiin
Hma norin an tlan chur chur,
Kawlhnâm an vai de zok zok,
An fei hmor a tle zor zor.
Thi le hliem an inthal rum a,
Ruong tiem seng lo an deng vum,
Ruongah an inpal thlu nok nok.
4 Chuong po po chu dawithiemnu,
Mi zawr thiem le hurkawngnu’n,
A nawchizor le dawithiem leia
Hnamhai bawia a siem lei a nih.
5 Iengkim LALPA chun a hril:
“Nang hi ka do chê a nih.
I puonbil chu i hmai chenin,
Hlîm tungpek ka ti che a,
Hnamhai hmaah i saruokna,
Lalramhai hmaah i muolphona,
Ka phor lang vong ding a nih.
6 Chir thuin thèng ka ti che a,
Hmusit taka suknomnain,
Ennuomah siem ka ti che.
7 A hmu che taphothai chun,
‘Ninevi a ram tah ie!
Tuin am sûn tang an ta?
Nangma sûntu ding khaw lam,
Mi ka hmu zo ding a na?’
Tiin tlansan an ti che”
8 Nile vadungin a huol vel,
Thebesa nêkin i thra lem maw?
Vadung chu a kulpui a na,
Tui chu a kul bang a nih.
9 Tluk ruol loa a hratna chu,
Ethiopia le Aigupta an na,
Put le Libia-in an thrangpui bok a.
10 Sienkhom manin a um a,
Salah an intăngtir a,
Kotthlêr tin tontira chun,
Nautehai chu vaw nawiin,
Indar nuoiin an peihawn a.
Aisanin mi thrahai an insem,
Mi lunhai khaidietin an khit.
11 Nang khom hung inrui i ta,
Hmêlma laka inbîkna ding le
Inhumhimna ding zong i tih.
12 I kulpuihai po po chu,
Theichang hmin hmasa angin,
An hang sawi hning met pha leh,
A sawitu bauah tlang a tih.
13 I sipaihai hi en ta,
Nuhmei ruol vong an ni hi!
I hmêlmahai ta dingin,
I kot a’n hong heihuoi a,
A kalna thingtluonhai hlak,
Meiin a kang siet ta si.
14 An inhuol ding che a nih,
I dawn ding tui chawi khawl la,
I kul banghai suknghet rawh.
Pilpok siemin buotsai la,
Lung charna ding rawt nawi la,
Trêkleiin bang thol rawh.
15 Chuonga i siem lai ngei chun,
Meiin lem hmang a ti che a,
Kawlhnâmin that an ti che;
Khauin thlai a fak ral angin,
An lem hmang ding che a nih.
Khauthrikthri anga insukpungin,
Khau hon angin insukpung rawh.
16 Vana arasi neka tamin,
I sumdawng mihai i sukpung a,
Sienkhom khau hon ang elin,
A ram an fak kol zo a,
Chu zoah an vuong hmangsan.
17 I vêngtuhai chu khau hon ang,
I mi lienhai khom khau hon ang;
A dei pha leh bangah an fu a,
A lum pha an vuong hmang a,
An fèna chin hrie an um nawh.
18 Aw Asuria lal, i vengtuhai an in,
I mi thrahai an inlusu zo tah;
I mihai tlângah an tlan dar a,
Thruoi khawmtu ding an um nawh.
19 I hliemna hi thipui khop a na,
Ieng khomin sukdam naw nih.
I tlùk siet dan thu hre taphotin,
Lawmin an kut an ben a;
I rawngzie tuor ruol lo kha,
Tu am tuor lo an um a?