Ninevi-ah Jona a fe
3
1 LALPA thu chu Jona kuomah a hung tlung nawk a: 2 “Tho la, khaw ropui tak Nenevi-a chun fe la, thu ka hril che hi tlanginsampui rawh” a ta. 3 Chuongchun Jona chu a tho a, LALPA thu ang chun Ninevi khuoa chun a fe a. Ninevi chu khaw poimaw tak el a na, a lienzie chu kea inzina ni thum lam a nih. 4 A ni khatnaa chun Jona chun khawpuiah, “Ni sawmli hnungah Ninevi hi sukbohmang ning a tih” tiin tlâng a’n sam a. 5 Ninevi mihai chun Pathien an ring a, bu nghei an puong a, a lien taka inthoka a chîn tak chenin saiip an sil a.6 Ninevi khaw lalin chuong thu chu a hang hriet chun a lalthrungphaa inthokin a tho a, a lal thuom a hlîp a, saiip a sil a, pilvut lai a’n thrung a. 7 Ninevi khuoa mihai ta dingin thupêk a’n suo a: Lal le a khawnbawlhai thupĕk angin, mihriem amanih, ran amanih, beram ruol le bawng ruol amanih tu khomin fain an dawn ding a ni nawh. 8 Mihriem le ransahai khomin saiip sil raw hai se. Mi tinin inrang takin Pathien ko raw se. Mi tinin mani lampui thra naw le tharum hmanga thisen insuona chu bansan raw se. 9 Ei bohmang nawna dingin Pathien chu inlamletin, a zangaina nasa tak lei chun a lungsenna nasa taka inthok chun in kei kir naw nih ti tuin am a hriet?” tiin.
10 Pathienin an thilthaw chu a en a, an lampui suolhai an nghatsan a hmu chun anni chu a lunginsiet a, an chunga sietna intlun dinga a hril chu a thrul ta a.