Jona lungsenna
4
1 Jona ruok chu a lawm naw hle a, a lung a sen a. 2 LALPA kuomah, “Aw LALPA, hi hi an naw maw ina ka um laia ka hril ta kha? Hi lei hi an nawm Tarsis tieng inrang taka ka tlàn hmang kha. Nang chu Pathien, mi lâinatu le lunginsiettu, lung inuoi le hmangainaa sip, sietna intlungtir ding laka kut kei kîr hlak mi i nih ti ka hriet an nawm. 3 Tu hin LALPA, ka hringna hi la el rawh, ka ta dingin hring nêkin thi a thra lem” a ta. 4 LALPA chun, “Lungsen theina san ding iem i nei hrim hrim a?” a ta.5 Jona chu khawpuia inthokin a suok a, khawpui sak tieng panga chun a thrung a, chu taka chun sawlbuk a bawl a, khawpui chunga thil hung tlung ding chu hmu tumin sawlbuk hlima chun a nghâk a. 6 LALPA chun Jona lu zar hlie a, a rinumnaa inthoka sukhadam dingin ûm a’n zàmtir a, ûm hlim lei chun Jona chu a lawm hle a. 7 Amiruokchu, a tûk khawfingchat laiin Pathienin ûm zung fatu dingin thil nge a ruot a, chu chun ûm chu a rêt a, a hung vuoi ta a. 8 Ni a hung insàng chun Pathienin khawsak thli lum tak el a hung tir a. Jona lû chu ni intrĕngin a em a, luhâiin a chău a. Thi hiel nuomin Pathien kuomah, “Ka ta ding chun dam nêkin thi a thra lem” a ta.
9 Pathien chun Jona kuomah, “Ûm zâm thuah lungsen theina san i nei hrim hrim am a ni?” a ta. Jona chun, “Nei e, thi pha hiel khopin ka lung a sen a nih” a ta. 10 LALPA ruok chun, “Hi ûm, nangma inrimpui le chawm lien khom ni lo, zan khat thila hung uma zan khat thila boral nawk el hi i lainat a. 11 Ninevi khuo, khaw ropui tak, a sûnga mani voi le chang khom la hre thei lo mi nuoi khat le singhni chuong le ran ruol tam tak umna hi, ka lunginsiet naw ding am a ni?” a ta.