Jona trongtraina
2
1 Ngapui sunga inthok chun LALPA a Pathien kuomah Jona chu a trongtrai a. 2 Hieng hin a hril a:
Ka beidongin LALPA ka ko a,
Ama chun a mi hung don a.
Thlan rila inthokin thrangpuitu ka ko a,
Nangin ka kona rawl i lo hriet.
3 Tui inthûk takah i mi pei lŭt a,
Tuipui li ril inthûk taka chun,
Tui fawnin an mi’n huol vĕl a,
I tui fawn le insokhai chun,
An mi vŭr khum hlup hlup a.
4 ‘I mithmua inthokin,
Nangin i mi hnot hmang a,
Sienkhom i in thienghlim tieng,
Hung ngha nawk ka tih’ ka ta.
5 Tuiin a mi chǐm vĕl a,
Inthuok harsa ka ti a,
Tuipuiin a mi sǐn khum a,
Tui hlohan ka lû an tuom a.
6 Tlâng thrut rawt chen ka tla thla a,
Kumkhuoa hnuoi ril nghak dingin.
Sienkhom aw LALPA ka Pathien,
Khuorkhurûm monga inthokin
Ka hringna i lâk suok si.
7 “Ka hringna a liem trêpin,
LALPA ka hung hriet che a,
I tempul thienghlima chun,
Ka trongtrainan a hung nang che.
8 “Milim hmangna bo betuhai chun,
Lunginsietna an dong ding chu,
Chàn phanain an hmang hlak.
9 Kei ruok chun lawmthu hrilin,
I kuomah hung hlànbiek ka ta,
Ka thu tiemhai khom hlen ka tih.
Sandamtu chu LALPA a ni si”
tiin.
10 Chun, LALPA chun ngapui chu thu a pêk a, Jona chu khawmuolah a luok suok ta a.