Inlàrna: thei hmin bawm
8
1 Lalpa PATHIEN chun inlàrna a mi’n hmutir nawk a. Thei hmina sip bawm ka hmu a. 2 Ama chun, “Amos, ieng am i hmu a?” a ta, kei chun “Thei hmin umna bawm” ka ta. LALPA chun ka kuomah, “Ka mi Israelhai tawp hun ding chu a tlung ta a; tu khom hlà nei ta naw ning” a ta. 3 Lalpa PATHIEN chun, “Tempula chawibiekna hla chu lusun hlaah inchang a ta, hmun tinah mithi ruong dêng dar pheng phung an ta, siksikrieu inhrâm a tih!” a ta.4 Nangni mi pasiehai sirde a,
A rama tlasamhai suksetuhai,
Hi thu hi lo ngaithla ro.
5 Nangni chun nghâkhlâ takin,
“Thla thar kût bo vat vat sien,
Bu zor kâr nghakhlà a um tah.
Chawlni hi bo vat vat sien,
Beiphit zor kar nghàkhlà a um.
Inkhǐna chin hmang ei ta,
A man tieng sukpung ei ta,
Bŭkna lem hmangin hlĕm ei tih.
6 Busi le rŭt pol zor ei ta,
Sumin mi rethei inchawng ei ta,
Tlasam chu holrok bun khatin”,
tiin in lungrilin in ti hlak.
7 LALPA chun, “An thilthawhai kha theinghil nei hrim hrim nawng ka tih” tiin Jakob Suongtawlol hming chu sâlin thu a’n khàm a:
8 Hi lei hin lir inhningtirin,
A rama chênghai po po,
Ka sukthlabàr naw ding maw?
Nile vadung anga hung lienin,
A ram phêkin hung chǐm a ta,
Aiguptaa Nile vadungpui,
Liena a kiem nawk duok angin,
Ram pum insângin tlum a tih.a
9 Lalpa PATHIEN-in a hril:
“Chu ni chun sunchang lai tak,
Nisa intlâktir ka ta,
Sun pachang lai zing siin,
Hnuoi hi hung inthim a tih.b
10 Kûta in ruoi thrèhai chu,
Ruokngha sa inchangtir ka ta,
In hla sakhai po po khom,
Trap hlaah inchangtir ka tih.
Saiip insiltir ka ti chêu a,
In lu vaw kol vong ka tih.
Nau mal sŭn anga rinumin,
In ni kha takin liem a tih.”
11 Lalpa PATHIEN-in a hril:
“Ram puma tràm ka tir ding chu,
A hung tlung mĕk zing a nih.
Bu le bâla trămna amanih,
Tuia dangchârna amanih ni loin,
LALPA thu hriet châkna tienga,
Trămna le dangchârna a nih.
12 LALPA hriet châka zongin,
Tuifinrieta inthoka tuifinrietah,
Sim le hmârah tlân vĕl an ta,
Sienkhom hmu zo naw ni hai.
13 “Nunghak tlangval hrat lai khom,
Dangchârin thidang an tih.
14 Samaria pathien lim hming sâla,
‘Aw Dan, i pathien hringna sâlin’
‘Beersheba pathien hringna sâlin’
Tia inkhâmtuhai chu tlûng an ta,
Tho nawk ta ngai naw ni hai”.