Israel hremna
9
1 Maichama ngir lai LALPA chun,Ka kuomah hieng hin a hril:
“Tempul sŭtpui lĕr vaw rak la,
Truong hung nghor hning dur durin,
An lu chungah chim thla sien,
A del hlum mahlahai chu,
Keiman kawlhnâmin that ka tih.
Pakhat khom suok naw ni hai a,
Pakhat khomin pumpel naw nih.
2 Seol chen kuo hreu sien khom,
Ka bânin pot suok tho ka tih;
Van chen lawnhai sien la khom,
Hnûk thla nawk vong tawl ka tih.
3 Karmel sìpah inbihai sien khom,
Pĕl suokin man tawl ka tih;
Tuipui mongah inbihai sien khom,
Rûlpui inchuk hlumtir ka tih.
4 Hmêlman salah man sien khom,
Sât hlum dingin thu pêng ka ta,
Anni chu sukhlum dingin,
Ieng lai khom melkâi ka tih.
5 Lalpa, Iengkim LALPA chun,
Hnuoi a them a, a’n tui zop a,
A sunga chênghan an sŭn a.
Aigupta rama Nile vadungpui,
Liena a kiem nawk duok angin,
Ram pum chu pawngin a tlum.
6 Van sangah lal in a bawl a,
Hnuoi hi bulthrutah a hmang a,
Tuifinrieta tuihai chu ko-in,
Hnuoi chunga a’n sŭrtir hlak.
A hming chu LALPA a nih.
7 LALPA chun Israelhai kuomah,
“Nangni hi Ethiopia mihai leh,
Ka ta dingin angkhat in ni?
Aigupta rama inthokin Israelhai,
Kaftor-a inthokin Filistin mihai,
Kir-a inthokin Aram mihai,
Ka thruoi suok tawl an naw maw?
8 “Lalpa PATHIEN mit chu,
Ram suol chungah a fu a,
Hnuoi a’nthokin sukbo ka ta,
Jakob sungkuohai ruok chu,
An rêngin inram vong naw ning”
Ti hi LALPA thu suok a nih.h
9 Keima ngeiin thu pêng ka ta,
Leidara bu an sĕp ang elin,
Hnam danghai laia inthokin,
Israelhai chu sêp suok ka ta,
A mal hlek khom tla dar naw nih.i
10 Ka mihai laia mi suol po le,
‘Sietnan mi nang naw ni a,
Mi nang teu naw nih’ tihai chu,
Kawlhnâmin sukhlum ka tih.
Israel tungding nawkna
11 “Davida bawkte chim chu,
Chu ni chun tungding ka ta,
A’n awngnahai thol ka ta,
A chimhai rem thrang ka ta,
A ngaiin indin nawk ka tih.
12 Edom rama hlaa la umhai le,
Ka hming puttu hnamhai chu,
Anni chun nei nawk an tih” tiin,
A thaw theitu LALPAN a hril.
13 LALPA chun hieng hin a tih:
“Busîktuhai le lokeituhai,
Grep chìngtuhai le sâwrtuhai
An inphaman zat hun ding le,
Tlânga inthokin uoiin thar,
A hung far thla huou huou a,
Muol tina a luong hun ding
Nihai chu a hung tlung mek ie.
14 Saltàng ka mi Israelhai chu,
Hung thruoi kir nawk tang ka ta;
Khaw ram hnung indin tharin,
Umhmun bêngbel nawk an tih.
Grep chînga uoiin dawnin,
Huon siemin a ra tlàn an tih.
15 Phawi dok nawk ta lo dingin,
Anni ka pĕk rama ngei chun,
Israelhai chu phun ka tih” ti hi,
LALPA Pathien thu suok a nih.