Khau hon le mei
7
1 Lalpa PATHIEN chun inlârna a mi’n hmutir a. Khauthrikthri honpui a buotsai lai chu ka hmu a. Hi hi lal chanpuol, ran bu at hnunga hlo thar a hung mawng nawk hun lai a nih.a 2 Khau honin chu rama hlo hna chu an fak kol rìt hnung chun keiin, “Aw Lalpa PATHIEN, ngaidam rawh. Jakob chu a chîn tham vei leh, iengtin am dam khawsuok zo a ta?” tiin ka khêk a. 3 Chuongchun LALPA chu a’n lamlet a. LALPA chun, “An leh, hi thil hi tlung ta naw nih” a ta.Mei hmu thu
4 Lalpa PATHIEN chun inlàrna dang a mi’n hmutir nawk a. Lalpa PATHIEN chun mihai hremna dingin mei a ko a, tuipui inthŭk khom a kăng inhil vong a, ram khom a lem puot puot a. 5 Chu phing leh kei chun, “Lalpa PATHIEN, suktawp dingin ka ngen che. Jakob chu a chîn tham vei leh iengtin am dam khawsuok zo a ta” tiin ka khêk a. 6 LALPA chu a’n lamlet a. Lalpa PATHIEN chun, “Hi thil khom hi ni ta naw nih” a ta.
7 Chun, hi thil hi a mi’n entir a: LALPA chu bang ngil taka rem bulah a ngîr a, a kutah enremna thirmŭm a chawi a. 8 LALPA chun ka kuomah, “Amos, iem i hmu a?” a ta. Kei chun, “Enremna thirmŭm” ka ta. LALPA chun, “En rawh, ka mi Israelhai lai enremna hi ka sie ding a na, tu khom hlà bik nei naw ning.
9 Isak hmun sanghai sukram ka ta,
Israel hmun thienghlimhai khom,
A rêngin sukchim ka ta,
Jeroboam sungkuo do dingin,
Ka kawlhnâm inlet ka tih”
tiin.
Amos le Amazia
10 Bethel khuoa thiempu Amazia chun Israel lal Jeroboam kuomah, “Amos hin Israel sungkuohai lai a phierruk che a, a hrilhai po po lem chu a ram khomin dawl zo naw nih.
11 Amos chun hieng hin a tih:
“Jeroboam chu kawlhnâmin that an ta,
Israelhai chu salah intâng ngei an tih,
An rama inthoka hmun hla takah”
tiin.
12 Amazia chun Amos kuomah, “Aw nang zawlnei, fe la, Judai ram tieng kir nawk la, chu taka chun i fak ding hlaw la, thu hril rawh. 13 Bethel khuoa ruok hin chu thu hril nawk ta naw rawh, lal hmun thienghlim le a tempul umna a ni si a” a ta.
14 Amos chun Amazia kuomah, “Zawlnei ka ni naw a, zawlnei naupa khom ka ni bok nawh. Kei chu beram vengtu ka ni a, theichang bil khom ka enkol bok hlak. 15 Sienkhom, beram ka vĕng laiin LALPA chun a mi lăk a, ka kuomah, ‘Fe la, ka mi Israelhai kuomah thu hril rawh’ a mi ti a. 16 Chuleiin tu hin LALPA thu chu lo ngaithla rawh. Nang chun Israel kal zawng le Isak sungkuo kal zawnga thu hril ta lo dingin i mi ti a. 17 LALPA ruok chun hieng hin a hril: ‘I nuhmei chun khawpuiah nawchi zor a ta, i naunu le naupahai chu kawlhnâmin that an ta, i ram chu inkhiin insem dar vong an ta, sakhaw dang bie, hnam danghai ramah nang chu thing i ta, Israel thlahai chu matheiloin an rama inthoka hla takah sala thruoi hmangin um an tih’ a tih” tiin a hril a.