Israel siet ding thu
6
1 Zion-a ngai ngam taka khawsa,Samaria tlânga hima inngaihai,
Hnam chunghnung tak milien ruol,
Israel sungkuo pan hlak hai chu,
In chung a va hang pik ngei de!
2 Kalne-ah fe unla, va en ta u;
Chu zoah Hamath khaw ropuiah;
Chu taka inthokin Filistin ram,
Gath khuoa chun fe thla ro.
Israel ram le Judai ram nêkin,
An changkang lem am a ni?
In ram nêkin a lien lem maw?
3 Sietna ni ding chu sie hla siin,
In thilthawin buoi in pot hnai.
4 Saihaa chei khumah zâlin,
Thrungna nêmah inzam kuolin,
Beram te le bawng tuoi thau,
A’n hnik hnikin ruoi in thre a.
5 Davida anga tringtrang keiin,
Mani hla in insiem chop a.
6 Nopui ngata uoiin dawnin,
Hriek thra tawpin in inchùl a.
Josefaa siet tuokna ruok chu,
In invoi ve hrim hrim nawh.
7 Chuleiin, sala fe hmasahai lai,
Nang khom salah fe veng i ta,
Ruoi kîla i’n ri bung bung kha,
Suktawpin um tang a tih.
Israel chapona tirdakum
8 Iengkim LALPAN hming sâlin,
Hieng ang hin a hril a nih:
“Jakob chapona ka tirdak a,
A lal in thrahai ka theida a,
Khawpui le a sunga um po po,
An rêngin inmantir ka tih.”
9 In khatah mi thi bang sawm,
An maksan a lo ni khomin,
An rêngin thi tho tho an tih.
10 Laina ruong inkhawmtuhan,
In sunga intomhai kuomah,
“A dang khom an la um am?”
Tia an hung indon pha a,
“An um ta nawh” titu chun,
“To rawh, LALPA hming lam pal ei tih”
Tiin a la hril ding a ni si a.
11 LALPA chun thu a pêk a,
In ropui chu nor chim unla,
In tè chu nor phit vong ro.
12 Lungpui khokrokna hmunah,
Sakor a tlân hlak am a ni?
Chu taka chun bawngchalin,
Lo a kei ngai hlaka maw?
Nangnihai rorêl ruok hi chu,
Indikna chu thina tûrah,
Felna ra chu khâknaah,
In inchangtir lem si a.
13 Lo Debarb in hnè kha suongin,
“Karnaim khuo la thei khopin,
Ei hràt a nih” in tih an naw?
14 “Aw nangni Israel sungkuohai,
Do ding cheu hnam chok tho ka ta,
Hamath kawn le Arabah ruom kara,
Mi po poin nêksawr an ti cheu”
LALPA, Iengkim Pathienin a tih.