4
1 Basan bawngpui anga thâu,Samaria tlanga chêng nuhai,
Pasiehai neksawr a, tlasamhai sirdetu,
Mani pasalhai tir kalăng a,
“Dawn ding hung la rawh” tituhai,
Hi thu hi lo ngaithla ro.
2 Lalpa PATHIEN ngei chun,
A thienghlimna sâla intiemin,
“Thir kuoia ka kei hun cheu,
A la tlung ngei ding a nih;
A mong dăpa thranghai lem chu,
Ngakuoiin hnûk dok ka tih.
3 Kul bang pop hnaina takah,
La thruoi suok an ti chêu a,
Harmon tieng pei suok an ti cheu.”
Chu chu LALPA thu suok a nih.
4 “Bethelah fein va suol unla,
Gilgalah fein va suol zuol unla,
Tûk tin in thilhlanhai chawi unla,
Ni thuma peiah in sawmapakhat.
5 Lawm thu hril hlanbiekna din,
Chol thrang bei inhlàn unla,
Mani lungpuoka in inhlanhai chu,
Aw Israelhai, uongpui ro khai,
In thaw chàk zawng tak a ni si,”
Lalpa PATHIEN chun a tih.
6 “Khaw tinah trăm ka’n tlaktir ab
Khaw tinah bei hrim a um naw a,
Chuonga thil a tlung khom chun,
Ka kuom tieng in kǐr chuong nawh”
ti hi LALPA thu suok a nih.
7 “Bu sîk hun thla thum vêlah,
Raw sûr ding ka chel tăng a,
Khaw khatah kan sŭrtir khomin,
Khaw dangah ka chel tăng a;
Lo pakhatin ruotui a hmu a,
A dang chu a trawl bor bor a.
8 Tui nei ve lo khuohai chu,
Dawn ding zongin an inmai a,
Khaw hrang hrangah an tlàn a,
Khopkham an hmu zo si nawh.
Chuonga thil a tlung khom chun,
Ka kuomah in kǐr chuong nawh”
Ti hi LALPA thu suok a nih.
9 “Tlolna le hmuornain voi tam,
In lo le grep huonhai ka hrem a,
In theichang le oliv kunghai,
Thil ngèin ka’n faksiettir a,
Chuonga thil a tlung khom chun,
Ka kuomah in kǐr chuong nawh”
Ti hi LALPA thu suok a nih.
10 “Aigupta chunga ka thaw angin,
In chungah hripui ka’n lèngtir a,
In tlangvalhai kawlhnâmin ka that a,
In sakor hung manhai chen khom.
In riebuka in mithi ruong hmonin,
In hnàr ka urpek chêu a,
Chuonga thil a tlung khom chun,
Ka kuomah in kǐr chuong nawh”
Ti hi LALPA thu suok a nih.
11 “Sodom le Gomorra angin,
A thren ka suksiet cheu a,
Thuka chok lai thingthu hring angin,
A thren ka pot suok chêu a,
Chuonga thil a tlung khom chun,
Ka kuomah in kǐr chuong nawh”
Ti hi LALPA thu suok a nih.
12 “Chuleiin aw Israel,
I chungah thil thra lo tak,
Ka thaw ding a ni leiin,
Aw Israel, i Pathien chu,
Hmason dingin inpei rawh.”
13 Tlânghai hung indin suoktu,
Virthlî khom inumtirtu,
Mihriem kuoma a thu puongtu,
Zing khawvar khom sukthim a,
Tlâng sânghai sir de theitu chu,
LALPA Iengkim Pathien a ni si.