Israel laka thuhretu
3
1 Aiguptaa inthoka ka hung thruoi suok, aw Israel sungkuohai, in chungthua LALPA soiselna cheu hi lo ngaithla ro:2 Khawvela sungkuo po po lai,
Nangni chauh ka thlang chêu a,
Chuleiin, in suolna po po lakah,
Ka hrem tawl ding chĕu a nih.
3 An inthukop si naw chun,
Mi pahni an intlon hlak am?
4 A sase inhûkpui loin,
Ram hnuoiah sakeibaknei,
A’n rŭm hlak hrim am a ni?
Sa sè nei loin a pûkah,
Keipui a’n ngur hlaka maw?
5 Châng an kam nawna hmunah,
Vate a’n awk hlak am a ni?
Awk ding um nawna hmunah,
Châng an kam hlak hrima maw?
6 Khawpuiah râlkhêl tawtawrawt,
A hung inri ruoi ruoi pha leh,
Mi tin an tri hlak an naw?
LALPA thu loin khawpuiah,
Sietna a tlung hlak am a ni?
7 A siehlaw zawlneihai kuomah,
A thilthaw tum hril lawk loin,
Chunghnungtak LALPA chun,
Ieng khom a’n tlungtir ngai nawh.
8 Sakeibaknei a’n rŭm ie,
Tu am a na tri lo ding?
Chunghnungtak LALPA a trong,
Tu am hril sawng lo ngam ding?
Samaria siet ding
9 Asdod kul le Aigupta kulah,
Hieng ang hin thu puong dar ro:
“Samaria tlângah fe khawm unla,
Chu taka an buoi râpthlăk dan le
Inpâwngnêkna tlung chu thlîr ro.
10 An thil rok le lakpêkhai chu,
Lal inah an bŭm hnĕr hnûr a,
Thil dik thaw hrim an tum nawh”
Ti hi LALPA thu suok a nih.
11 Chuleiin, Lalpa PATHIEN-in
Hieng ang hin a hril a nih:
“Ram chu hmêlma’n rûn a ta,
Kulhai chu sukchim a ta,
Lal inhai chu rok a tih.”
12 LALPA chun hieng hin a tih:
“Sakeibaknei băua inthoka
Beram mal pahni amanih,
A nakâwr pakhat amani bĕk,
Berampun a’n chù thlàk angin,
Samaria le Damaskaa um,
Khum kil le puonri hnuoia inbi,
Israelhai chu sansuokin um an tih”a
13 Iengkim LALPA Pathien,
Jehovah chun hieng hin a hril:
14 “Hi thu hi ngaithla unla,
Jakob sungkuo hmaah puong ro:
A suol leia Israel ka hrem ni chun,
Bethela maichamhai hrem ka ta,
Maicham kihai suktliek ka ta,
Hnuoiah tla zap neng nung a tih.
15 An phalbi le nipui inhai,
A ruolin sukchim vong ka ta,
An saiha inhai suksieng ka ta,
In ropuihai sukram ka tih.”