Moab
2
1 LALPA chun hieng hin a tih:“Moab suolna pathum leiin,
A nih, a suolna pali leiin,
Ka lungsen kei kir naw ning,
Edom lalhai rŭ po po chu,
Chinai lung ang ela a raw leiin.
2 Moab-ah mei insuong ka ta,
Keriot kul kăng vong a ta,
Buoina râpthlâk tak suok a ta,
Indo ri le tawtawrawt ri karah,
Moab chu suksietin um a ta,
3 Rorêltu sukhlum ka tih,
A mi lienhai po po leh.”
Juda
4 LALPA chun hieng hin a tih:
“Juda suolna pathum leiin,
A nih, a suolna pali leiin,
Ka lungsen kei kir naw ning,
LALPA dan chu an hnawl a,
A thupekhai an vong naw a,
An pi le puhai milim biekin,
Anni chu a thruoi hmang leiin.
5 Judai ramah mei insuong ka ta,
Jerusalem kul kăng ram a tih.”
Israel chunga Pathien rorèl
6 LALPA chun hieng hin a tih:
“Israel suolna pathum leiin,
A nih, a suolna pali leiin,
Ka lungsen kei kir naw ning,
Mi felhai tangkaruoin an zor a,
Mi retheihai holrok pheikhokin.
7 Hnuoia pilvut ang topin,
Pasiehai lu an sir sop a,
Nêksăwrhai an thlei bik a,
Pafain nunghak an intrawm a,
Ka hming thienghlim an sukpawi.
8 Dakhama silpuon an lak chu,
Silin maicham bul tinah an zàl a,
Mi an inchawitir uoiin chu,
An Pathien inah an dawn hlak.
9 “An hmaa um Amor mihai,
Sidar thing anga insâng le
Saisaw thing anga detdohai chu,
Keiman ka sukboral a,
An rà le zung ka sukhlum.
10 “Aiguptaa inthoka la suokin,
Thlalĕrah kum sawmli thruoiin,
Amor-hai ram ka pêk cheu a.
11 In nauhai lai zawlnei ding,
In tlangvalhai lai Nazirita ding,
Ka’n din suok tawl cheu kha.
Aw nangni Israel thlahai,
Chuong chu in ni nawa maw?”
ti hi LALPA thu suok a nih.
12 Sienkhom Nazarit mihai chu,
Uoiin dam in lo indawntir a,
Zawlneihai thu hril ding chen,
In lo khappĕk hlak si a.
13 “Bu rik tak phur tawlailirin,
Thil a chǐl nâwi riep angin,
Ka chǐl năwi ding chĕu a nih.
14 Truonrang tlân suok naw ni a,
Mi hrât thàrumin zo naw ni a,
Pasalthra khom insanhim naw nih.
15 Thal kăptu che hman naw nih,
Ngal hrât tlân suok bok naw nih;
Sakor chungchuong mi khomin,
A hringna hum bik naw nih.
16 Chu ni chun mi huoi tak khom,
Saruokin tlan hmang a tih.”