AMOS
Israel tuolbawmhai chungthu:
1
1 Juda lal Uzia inlal lai le Israel lal Joas (Jehoas) naupa Jeroboam inlal laia lir inhning hma kum hniah Tekoa beram vengtuhai laia mi pakhat Amos chun Israel chungchang thuah inlàrna a hmu a, hieng ang hin a hril a:2 “LALPA chu Zion-a inthokin,
Inring takin a hung khêk a,
Jerusalem khawpuia inthokin,
Van riel angin a hung inrŭm;
Berampuhai ran intlattirna,
Hmun hringhai a trâwl vong a,
Karmel tlang sìp a kol vong.”
Aram (Suria)
3 LALPA chun hieng hin a tih:
“Damaska suolna pathum leiin,
A nih, a suolna pali leiin,
Ka lungsen kei kir naw ning.
Bu chǐlna thîr ha zum hmanga
Gilead a chǐl hrŭt leiin,
4 Hazael inah mei insuong ka ta,
Ben Hadad kul kăng vong a tih.
5 Damaska kotpui suksieng ka ta,
Aven Ruoma lal sukhlum ka tih;
Beth Eden-a lalna cheltu khom,
Sukbohmang bok ka ta,
Aramhai chu sala intâng dingin
Kir tieng thruoi hmang an tih,”
Ti hi LALPA thusuok a nih.
Filistinhai
6 LALPA chun hieng hin a tih:
“Gaza suolna pathum leiin,
A nih, a suolna pali leiin,
Ka lungsen kei kir naw ning,
An rêngin salah a man a,
Edom kuomah a zor si a.
7 Gaza kulah mei insuong ka ta,
A kulhai kang hmang a tih.
8 Asdod lal sukhlum ka ta,
Askelona lalna cheltu khom.
Ekron chungah kut inlet ka tih,
Filistinhai an thi vong chenin,”
Chunghnungtak LALPAN a tih.
Tura
9 LALPA chun hieng hin a tih:
“Tura suolna pathum leiin,
A nih, a suolna pali leiin,
Ka lungsen kei kir naw ning,
Unauna thuthlung bawsein,
A manhai chu salah a zor si.
10 Tura kulah mei insuong ka ta,
A kulhai kang hmang a tih.”
Edom
11 LALPA chun hieng hin a tih:
“Edom suolna pathum leiin,
A nih, a suolna pali leiin,
Ka lungsen kei kir naw ning,
Lunginsietna nei dêr lo a,
A unau kawlhnâma hnot a,
A lungsen inkeidei lo a,
A chok a’n hlaptir zing leiin.
12 Temanah mei insuong ka ta,
Bozra kul kăng vong a tih.”
Amon
13 LALPA chun hieng hin a tih:
“Amon suolna pathum leiin,
A nih, a suolna pali leiin,
Ka lungsen kei kir naw ning,
A ramri zauna dinga,
Gilead nuhmei nau pai lai,
An phing a dawt thlĕr leiin.
14 Raba kul chu rawng ka ta,
Indona ri so chur chur le
Thrawngaleivir hrâng karah,
Kulhai chu kăng vong a tih.
15 A lal chu salah man an ta,
A khawnbawlhai leh thruoi an tih.”