AMOS
Thuhma
Amos lekhabu hi Thuthlung Hlui Baibul ei hmang laia bu sawmthumna, bung 9 le chang 146 a sei, kum 760-750 B.C inkâr vêla zawlnei Amos ziek a nih. Zawlnei Amos hi Judai ram khaw chikte Tekoa beram vengtu a na, thiempu amanih zawlnei amanih nau khom a ni naw a, sienkhom Pathienin hmar tieng Israel lalrama a thu hriltu dinga a tir a nih.
Hi lekhabua hin Pathien poisa lo hnam le Israelhai hmêlma Suria hai, Filistin hai, Tura mi hai, Edom mi hai, Amon hai, Moab hai le Juda mipui hai chu Pathienin a hrem dingzie thuin a tran phot a. A tawpah, tira a umna san tak, Israel hnamhai chunga Pathien rorêlna hung tlung ding thu, Asuria lalin a hung rùt fai vong ding thu chu hmai trim dêr loin a hril piep piep el a. A râpthlăk taluo leiin thiempu Amazia lem chun a hril pei ding chu khap a tum hiel a nih (7:10-13). Sienkhom Pathienin hril dinga a tihai chu intîm dêr loin a hril tho. A tawpah Israel tungding nawkna dinga beiseina thuin a khar a. Amiruokchu, an suolna laka inthoka an sim chuong si naw leiin, rorêlna indik le felna chu a ramah vadung tui anga luong dinga a beisei ang hrimin (5:24) kum sawmthum hnungah (721 B.C) Pathien rorêlna chu a mihai chungah a hung tlung indik a, Asuria lalin a hung rŭn a, hmar tienga Israel lalram chu a sukchimit a, that mahlahai chu salah a thruoi a, Israel hnam sawm chun an lalram an chàn bàkah an hnam khom tu chen hin sui thei loin an riral ta vong a nih.
A thu tlangpuihai:
Israel tuolbawmhai hremna thu (1:1-2:5)
Israel chunga rorêlna (2:6-6:14)
Inlàrna panga (7:1-9:15)