Hnamhai chungthu relna
3
1 “Chuong ni le chu huna chun,Juda le Jerusalem vangneina,
Ka tungding nawk ding a nih.
2 Jehosafat Ruoma chun,
Hnam tinhai ko khawm ka ta,
Ka rochan, ka mi Israelhai,
Hnam tin laia hnot dartu le,
Ka ram sem dartu hnamhai chu,
An chungthu la rêl ka tih.
3 Thrum vawra ka mihai insemin,
Nawchizor inchawkna dingin,
Pasaltehai an hmang a,
Dawn ding uoiin inchawknan,
Nuhmeitehai an zor bok.
4 “Aw nangni Tura le Sidon le Filistin ram biel po pohai, ieng leia hienga in mi khing am a na? Ka thilthawhai kha mi thungrul in tum am a ni? Mi thungrul in tum a ni chun ka chunga in thaw ang char chu inrang takin in lu chungah bun lêt ka tih. 5 Ka tangkaruo hai, ka rangkachak hai le ka rohlu tak takhai chu lain in tempulah in hlu lŭt a. 6 Juda mihai le Jerusalem mihai chu an rama inthoka hla taka an inson hmang theina dingin Grik mihai kuomah in zor a.
7 “Ngai ro, in zorna hmuna inthok khan anni chu hung chok tho ka ta, in thilthaw chu in lu chungah hung bun lêt an tih. 8 In naunu le naupahai chu Juda mihai kuomah zor ka ta, anni chun kawl kila um Sabea mihai kuomah zor an tih” ti hi LALPA kamsuok thu a nih.
9 Hi thu hi hnamhai lai puong ro:
Indo dingin in buotsai ro!
Pasalthrahai kha chok tho ro!
Râl do thei chin hung hnai unla,
Hma tieng norin bei ro khai!
10 In lo keina lăngkawnhai kha,
Kawlhnâma hmang din sut unla,
Thei kau tanna chemkuoihai kha,
Feia hmang dingin sut ro.
Mi hrat naw khomin “Takchapa!
“Ka hrât a nih” ti raw hai se.
11 Nangni a sèvĕla hnam po pohai,
Inhmaw takin hung tlàn unla,
Chu taka chun pung khawm ro.
Aw LALPA, i pasalthra ruol chu,
Hung tir thla tawl ta raw khai!
12 Hnamhai chun inchok phûrin,
Jehosafat Ruom pan raw hai se;
Chu taka chun inthrung ka ta,
Hnamhai chungthu rêl ka tih.
13 An suolna a râpthlâk ĕm a,
In kawitehai kha vilik ro,
Bu sik dingin a hmin tah.
Grep sawrkhura sir săwr angin,
A kuong sipin sir săwr ro,
Uoiin bĕla liem zûr zŭr khopin.
14 Mipui an pungkhawm luoi luoi,
Rorêlna ding ruoma chun;
LALPA ni chu a tlung hnai tah,
Rorêlna ding ruoma chun.
15 Ni le thla inthim a ta,
Arasi khom de ta naw nih.
16 LALPA chu Zion-a inthokin,
Hung inrûm dur dur a ta,
Jerusalema inthokin,
Van inrum angin inrûm a ta,
Hnuoi le van inthin a tih.
A mihai ta ding ruok chun,
LALPA chu an inhumhimna,
Israel thlahai kulpui ning a tih.
Pathien mihai ta dinga malsawmna
17 Chu ni a hung tlung pha chun,
Kei, LALPA in Pathien ngei hi,
Ka tlang thienghlim Zion-ah,
Ka chêng ti hre ta’ng in tih.
Jerusalem chu thienghlim a ta,
Hnam danghan rûn ta ngai naw nih.
18 “Chu nia chun tlânghaiin,
Uoiin thar insuong an ta,
Muol tina chun nene tui,
Hung put thla huou huou a ta;
Ruom tinah tui luong a tih.
LALPA ina inthokin,
Tui hnar inchik suok a ta,
Sitim ruom chawm hnawng a tih.
19 Judahai chungah nunrawnga,
Poi tawk lo thisen an insuo leiin,
Aigupta chu ram vong a ta,
Edom chu thlalerah inchang a tih.
20 Judai ram chu kumkhuoin,
Hluoin um zing tang a ta,
Suona inthoka suon nawk peiin,
Jerusalem chu hluong an tih.
21 An thisen phuba lang ka tih,
Ka la lăk nawhai phuba chuh,b
Ziona chêng LALPA ka ni si a!