Khau hon
2
1 In inrălring theina dingin,Zion-ah tawtawrawt mût unla,
Ka tlâng thienghlima chun mût ro.
LALPA ni chu a tlung mĕk a,
Hnâi tea um a ni ta a,
A ram mi po po inthin raw se.
2 Chu ni chu pikin zîng a ta,
Sûm inthimin băwm khum a tih.
Khaw varin tlâng a tuom angin,
Kha hmaa la hmu ngai lo,
Sipai honpuia hung thlahai chun,
A ram phêkin hung tuom an ta,
Chuong ang chu a hnung khomin,
Hmu nawk ni ta ngai naw nih.
3 Meiin ram a kăng fai angin,
An hma zawn fa zo pei an ta,
An liem hnunga an hnuhma chu,
Ringmu angin kol vung a tih.
An tlung hma chun a ram chu,
Eden huon ang el ning a ta,
An pĕl hnung chun a ram chu,
Thlalĕr ram fil ang ning a ta,
Ieng khom hlà nei naw ni hai.
4 Sakor angin an inlang a,
Sakor chungchuong angin an tlàn.
5 Tawlailir anga thûm chur churin,
Tlang sîpah an kat sup sup a,
Bupâwl kâng intrêk ang el le,
Indo dinga sipai tam tak,
Insingsa mup mup ang an nih.
6 A hmu taphot thlaphăngin,
An hmêl a dâng hlâwp hlâwp a.
7 Ral hrât angin hma an nor a,
Sipai angin bangah an lawn.
Mani zawn seng an pan a,
Râl dâihai an nĕr thleng a,
Pêt hmang tu khom an um nawh.
8 Tu khom innêk buoi loin,
Ngîl takin hma an tawn a,
Ral daihai an nêr thleng a,
Ieng khomin a dang zo nawh.
9 Khawpuiah an tlàn lut a,
Kul bang hrŭlah an tlàn a.
Mi inah an lawn kai a,
Rûkru angin tukverah an lŭt.
10 An fena tieng taphotah,
Hnuoi inhningin van an thin a,
Nisa le thlàpá an inthim a,
Arasi hrim hrim a de nawh.
11 A sipai ruolhai chu thruoiin,
LALPA chun thu a pêk a,
Tiem seng lo sipai a nei a,
A zuitu an tam êm êm.
LALPA ni chu a ropui a,
A râpum ĕm êm bok a,
Tuin am dawl zo an ta?
Sim dinga ngenna
12 “Tu hin bu ngheia trapin,
Lungril po po leh hung kir ro’
Ti hi LALPA thu suok a nih.
13 In hăk lai silfen ni loin,
In lungril pot thlêr unla,
LALPA in Pathien kuomah kîr ro.
Ama chu lunginsietna hau,
Lainatnaa sip Pathien,
Lung inuoi le hmangainaa sip,
Sietna intlun dinga a ti khom,
Inlamlĕt hlak mi a ni si a.
14 Ama chun hung ngha lĕtin,
Lainata mal sawm chêuin,
LALPA in Pathien ta dinga,
Bu le dawn thilhlân dinghai,
Pe nawk nawng a ti cheu ti,
Tuin am hre thei a ta?
15 Zion-ah tawtawrawt mût unla,
Umni khamin bu nghei unla,
Inkhawmpui thienghlim ko ro.
16 Mipuihai ko khâwm unla,
Inkhawmpui chu inthien unla,
Upahai khom ko khâwm unla,
Nene ne lai chen khom ko ro.
Moneitun a pindan suoksan sien,
Mo khom hung suok bok raw se.
17 LALPA siehlaw thiempuhaiin,
Tempul bathlăr le maicham inkârah,
Hieng hin trap hla inzawt raw se:
“Aw LALPA, i mihai hi hum la,
Hnam dang nuizat le bieksaw-ah,
I rochan hnam hi phal naw rawh.
Ieng leiin am hnam danghaiin,
“Khaw lam an Pathien chu teh!”
An mi tikhum ding a na? tiin.
LALPA donna
18 LALPAN a ram invoi a ta,
A mihai lunginsiet a tih.
19 Hieng hin LALPAN don a tih:
“Bu le uoiin thar le hriek hai,
In tlai hlè khop peng ka ti cheu;
Hnam danghai nuizatbŭrah,
Siem ngai ta nawng ka ti cheu.
20 “Hmar tienga in doralhai chu,
Hla takah hnot hmang ka ta,
Ram trawl le filah hnot lut ka ta,
A hmasa pawl Tuipui Thi ruomah,
A danghai Thlang Tuipui kamah.
An rim chu thu vut vut a ta,
Vàn ur tung a tih” tiin.
LALPAN thil ropui a thaw chieng,
21 Aw ram, nang tri dêr naw la,
Hlima lawmin um lem rawh,
LALPAN thil ropui a thaw chieng.
22 Aw ramsahai, tri dêr naw ro,
Ran tlatna hmunhai hung hringin,
Thinghan ra thar insuong an ta,
Theichang le grep kŭnghai khom,
Inbâwr lei luoiin ràng an tih.
23 Aw Zion mihai, hlim ro,
LALPA in Pathienah lawm ro,
Favang ruo khom a hun takah,
A hung pĕk chêu a ni hih.
A hma angin favang le thrâl ruo,
A hun tawkin a pêk bok cheu hi.
24 Hrizawlah bu vûm thûr a ta,
Uoiin le hriek sawrkhurhai,
Sip liem zûr zŭr nawk a tih.
25 “Nangni laia ka sipai hung tir,
Khau honpui le khauthrikthrihai,
Tuktulung le thil ngehaiin,
An fak siet zăt hŭ po kha,
A kum tĕlin rul ka ti chêu.
26 Fak ding hauin tlai in ta,
Thil mak thawpek hlaktu cheu,
LALPA in Pathien hming chu,
Inpâkin chawimawi tang in ta,
Ka mihai chu sukmuolphoin,
Um ta hrim hrim naw ni hai.
27 Israelhai lai ka um ti le
LALPA in Pathien chu ka nizie,
Tu dang hrim an um nawzie,
Chu pha chun hre tang in ta,
Ka mihai chu sukmuolphoin,
Um ta hrim hrim naw ni hai.
LALPA ni chu
28 Chu hnunga chun keimain,
Ka mihai po po chungah,
Ka Thlarau buok khum ka ta,
In naunuhai le naupahaiin,
Ka thu dongin hril an ta,
Upahan mangah mang an ta,
Tlangvalhan inlàrna hmung an ta,
29 Bawinu le bawipa chunga chen,
Chu ni chun ka Thlarau buok ka tih.
30 Chung tieng vanah thilmakhai,
Hnuoi chungah thisen le mei,
Meikhu intûr ngul el hai chu,
Ka hung inlangtir ding a nih.
31 LALPA ni ropui tak le
Pangzatum tak tlung hmain,
Nisa thimah inchang a ta,
Thla thisenah inchang a tih.
32 LALPA hming lam taphot chu,
Sandamin la um an tih;
LALPAN a lo hril ang khan,
Zion tlang le Jerusalema,
Dam khawsuokhai laia mi,
LALPA kohai chu him an tih.