JOEL
Khàu intâm ding thu
1
1 Pethuel naupa Joel kuoma LALPA thu hung tlung chu:2 Upahai, lo ngaithla unla,
A rama chênghai po poin,
In na lo dâw seng ro khai.
In pi le puhai huna khom khan,
Hieng hi a tlung ta hlak am a ni?
3 Chu thu chu in nauhai hril unla,
In nauhaiin an nauhai hril hai sien,
Suon tin inhril sawng pei ro.
4 Khàu honpui făk mahla chu,
Khàuthrikthriin an făk a,
Khàuthrikthri făk mahla chu,
Tuktulungin an făk a,
Tuktulung făk mahla chu,
Thil ngêina an făk zo a.
5 Zu ruihai, tho unla, trap ro!
Uoiin dawntuhai, trap khêk ro,
In uoiin thar chu trà ro,
Dawn ding in nei ta si nawh.
6 Ka ram hung rûntu hnam chu,
An hràtin an tam hle a,
Ka ram an hung rûn tah ie!
Sakeibaknei ha ang an nei a,
Keipui ngho ang an nei bok.
7 Ka grep huon an chìl siet a,
Ka theichang bil an suksiet a,
A kâuhai an hmal thlak a,
A zârhai a hung rop zo tah.
8 Nunghakin a pasal huol lai,
A sŭn angin nang khomin,
Saiip silin trap ve rawh.
9 LALPA ina inhlàn ding,
Bu le uoiin a um ta nawh;
LALPA hmaa rongbawltu,
Thiempuhai lung a’n vai zo.
10 Lohai an suksiet vong a,
Hnuoi inhilin a hung chàr a,
Buhai an hung rop vong a,
Uoiin thar a kang chat a,
Oliv hriek a suok ta nawh.
11 Loneitu le grêp chingtuhai,
Beidong takin trap khêk ro.
In huit le barli bilhai trà ro,
Sǐk ding in nei ta si nawh.
12 Grêp kŭng a vuoi zo ta a,
Theibufai hai, tûm thing hai,
Epul le thing hrim hrim khom,
A rêngin a trawl zo a,
Hringmi lunglawmnahai chu,
An lo vuoi hmang zo ta si.
Sim dinga kona
13 Thiempuhai, saiip sila sûnin,
Maichama rongbawltuhai, trap ro.
Pathien hmaa rongbawltuhai,
Saiip silin hung unla,
Zankhawvarin zâl tlep ro,
In Pathien ina inhlàn ding,
Bu le uoiin a um ta nawh.
14 Bu ngheiin umni kham unla,
Inkhawmpui lien buotsai unla,
LALPA Pathien ina hung dingin,
Upahai le a rama chêng po po,
An rêngin inchà khawm unla,
LALPA koin khêk suok ro.
15 Chu ni chu a chung a pik ie!
LALPA ni chu a hnâi ta si a;
Iengkimthawthei chun sietna,
A hung intlungtir ding a nih.
16 Ei mithmu ngeiah bu le bâl,
Lak hmangpekin ei um a,
Ei Pathien ina ei hlimna le
Ei lawmnahai a chuoi zo tah.
17 Hnuoia thlai chi a trawl zo a,
Bupanghai khom a triek zo a,
Bu in khom a tlu ram zo a,
Bu hlektê khom a um ta nawh.
18 Tlatna hmun ding invâiin,
Beidongin bawng ruol an inbu a,
Beram ruol an hril a hai.
19 Aw LALPA, nang ka ko che,
Meiin ram hring a lem zo a,
Rama thing a kăng zo tah.
20 Nangma ngaiin ramsahai,
An inthuok hlop hlop a nih;
Tui hnàr po po a kang zo a,
Ran tlatna hmun hring po po,
Meiin a kàng ram zo tah.