14
Simna le tungdingna1 LALPA i Pathien kuomah,
Aw Israel, kîr nawk ta rawh;
I suolna i tlŭk sietpui a ni hi!
2 Hienga thupha hung chawiin,
LALPA kuomah kîr nawk rawh:
“Kan suolna po po ngaidam la,
Ngilnei takin mi lo pom rawh,
Bawngchal hung inhlan nĕka,
Bau ngeia inpakna hlanbiek,
Kan hung inhlan theina dingin.
3 Asurian a mi hum thei nawh;
Indo sakorin a mi san thei nawh.
Kan kutsuok milimhai kuomah,
‘Kan pathienhai in nih’ tiin,
Hril nawk ta ngai nawng kan tih.
Fahrahai chun i kuom a’nthok,
Lunginsietna an dong hlak si.”
Israel ta dinga LALPA tiem nun thar
4 An petekna sukdam ka ta,
Ka lungsenna la kieng ka ta,
Tiem chin boin hmangai ka tih.
5 Israel daidaw ning ka ta,
Lili angin hung vul a ta,
Lebanon sidar thing angin,
Nghet takin zung phan a ta,
6 Dawn thar hung insuong a ta,
Oliv tuoi angin mawi a tih,
Lebanon sidar anga rimtuiin.
7 Ka hlimah chêng nawk a ta,
Bu kûng anga hung tral tharin,
Grêp angin hung vul a ta,
Lebanon uoiin thra ang elin,
A hming hung inthang a tih.
8 Efraim chun milim pathien,
Inzawlpui zing ta naw ni a,
Keiman donin enkol tang ka tih.
Keiman fâr thing hring angin,
Ama chu zar hlieng ka ta,
A ràhai malsawm ka tih.”
9 Tu am a na mi var chu?
Hieng thil hi man phak a tih.
Tu am a na lungmit nei chu?
Ama chun hre thiem a tih.
LALPA lampui chu a’n dik a,
Mi felhan an hraw hlak a,
Sienkhom mi rilohai chu,
Chu chun an insui thluk hlak.