DANIEL
Thuhma
Daniel lekhabu hi Thuthlung Hlui Baibul ei hmang laia bu sawmhni pasarina, bung 12 le chang 357 a sei, kum 605-535 B.C hun laia thil tlung le chanchin hrilna le hun la hung um ding, Jentel lalram la hung ngir ding le tlu se ding thu dam, kum sang rorel la um ding le chu hnunga chatuon rorêlna la hung um ding thua a ziektuin inlàrna a hmuhai thu ziekna lekhabu a nih. Daniel ziek ni dinga ngai pawl an um a, Daniel thi hnung, kum zahni liem hnunga ziek ni dinga ring pawl an um bok. Daniel chu 605 B.C khan Babulon sala intâng dingin an thruoi ve a, mi fel, indik le var a ni leiin kum sawmsari lai ding lal hrang hrang Nebukadnezzar, Belshazzar, Daria le Kura hai hnuoiah ngirhmun poimaw tak chelin sin a thaw a nih.
Daniel lekhabu hi thruong hnia thre thei a nih. (1) Daniel le a ruolhai chanchin le Pathien an ringna le a thu an zawmna leia an hmelmahai chunga hnèna an chang dan chanchin. (2) Daniel-in inlàrna a hmuhai le an mihai nêksawrtu le Pathien hmêlmatuhai tawpna chu sietna a nizie le a la ni pei dingzie thu hrilna a nih. Daniel lekhabua inlarna a hmu threnkhat le Thupuong lekhabua Johan inlarna hmu threnkhathai chu pawi kawm thin ang an ni leiin hril kop an hlaw hrim a nih.
A thu tlangpuihai
Daniel le a ruolhai (1:1-6:28)
Daniel inlàrna hmuhai (7:1-11:45)
Sahrâng palihai (7:1-28)
Beramchal le kel (8:1-9:27)
Van mi tir a hung inlang (10:1-11:45)
Hun tawpa thil tlung dinghai (12:1-13)