Israel chunga Pathien hmangaina
11
1 Naupang a ni lai a’nthok khan,Israel chu ka hmangai a,
Aigupta rama inthokin,
Ka naupa chu ka ko suok a.
2 Sienkhom ka ko rawn po leh,
Israel chun a mi’n hlat zuol.
Baal hmaah an inthawi a,
Milim hmaah rimtui an inhlàn.
3 Efraim chu a bânah chel a,
Lawn dan zirtirtu ka nih;
Sienkhom ka keitlei a nizie,
Anni chun an hriet si nawh.
4 Ngilneina hruolhruia keiin,
Hmangaina hruiin ka thlung a;
An ringkol bàt ka hlippĕk a,
Kûnin bu ka’n bà tawl a.
5 Chuong chu a ni sà khomin,
An inlamlĕt nuom naw leiin,
Aiguptaah kìr nawk an ta,
Asuria lal hnuoiah kûn an tih.
6 An khawpuiah chemsen inlengin,
Kul kotkharhai suksieng an ta,
An thil tumhai suktawp an tih.
7 Ka mihai chun mi nghatsan lui,
An tum tràwk tráwk tlat leiin,
Chunghnungtak ko hai sien khom,
Aman lo ŭksak naw nih.
8 Aw Efraim, iengtin hrim am,
Thlauthla thei ka ti che a?
Aw Israel, iengtin hrim am,
Inthlà thei ka ti che a?
Adma khuo le Zeboim khuo,
Ka suksiet ang khan nang khom,
Ka suksiet ve ding che maw?
Ka lungril i hluo tlat a,
Ka hmangaina che a zuol.
9 Ka lung inling inkei deiin,
Efraim sukbo ka tum khom,
Hlen tum nawk ta naw ning.
Mihriem ni lo, Pathien ka na,
Nangni Mi Thienghlim ka na,
Lungsen pumin hung naw ning.
10 LALPA chu zui tang an ta,
Keipui angin inrûm a tih.
Chuong anga a’n rûm zàtin,
Khawthlang tienga inthokin,
A têhai chu inthin pumin,
Hung tlàn khawm dal dal an tih.
11 Inthin pumin hung an ta,
Aigupta vatehai ang le
Asuria thruva` angin,
An in lum inhluotir ka tih”
Ti hi LALPA thu suok a nih.
Israel suolna
12 Efraim chun thukhêl ringot,
A mi hril kuol ngat ngat a,
Israel sungkuohai hlak chun,
An mi hlĕm ngat ngat thung.
Juda chu Pathien lakah,
A hel rumintang hle a nih,
Mi Thienghlim ringum lakah.