Israelhai chungthu hrilna
10
1 Israel chu grep inbuk thra tak,Kûr luoia ra ang a ni hlak.
A hung ra rawn ang peiin,
Maicham a siem rawn pei a;
A ram hmuingil ang peiin,
Lung ser lim a’n din rawn a.
2 A lungril inhlĕmnan a sip a,
Thiemnaw arbawm khum a tih.
LALPAN an maichamhai sukchimin,
An lung biekhai suksieng a tih.
3 “LALPA kan tri naw leiin,
Lal khom kan nei ve ta nawh;
Lal nei khom ni hrim inlang,
Iem a mi thawpek thei ding?”
Tiin anni chun hril an tih.
4 Thu tam tak an intiem a,
Khêlin thu an inkhàm a,
Mihai thu an thlungpui a.
Chuleiin, leilet indûr a,
Hnamtûr a tro rawn angin,
Thubuoi a suok rawn lem si.
5 Samaria chênghai chu,
Beth Avena bawngte lim leiin,
Thlaphâng takin an um a;
Mipuihai chun an sŭn a,
Thiempuhai an trap inrŭm a,
An ropuina milim chu,
Lak hmanga a um leiin.
6 Milim chu Asuria tieng,
Lal tak kuoma pèk dingin,
An fe hmangpui ding a nih.
Efraim chu inzak a ta,
Israel chun a thing milim,
La muolphopui ngei a tih.
7 Tuiin hnâwl a lĕn angin,
Samaria lal fen hmang a tih.
8 Beth Avena bawlhmun sanghai,
Israelhai suol thawna hmun chu,
Suksiet la ni vong a tih.
Hling bukin bawm khum an ta,
Mihai chun tlânghai kuomah,
“Mi sìn khum rawh” tîng an ta,
Muolhai kuoma khom mihan,
“Mi del rawh” la tîng an tih.
Israel chungthua LALPA thu puong
9 Gibea-a i suol hlak ang khan,
Aw Israel, i suol zom zar zar a,
Inthlâk thleng hrim i tum nawh.
Gibea thil suol thawtuhai kha,
Indonan a nangching ni lo maw?
10 Ka nuom pha leh hrem ka ta,
Thuo hnia an suol leiin,
Hrengthîr inbuntir dingin,
Hnam tinhai hâwr khawm ka tih.
11 Efraim chu bawngla zirtir tah,
Bu chil châk tak ang hi a na,
Inrim nawk zuola sor dingin
A thlukvŭm mawiah ringkol,
Keiin inbâttir ka tih.
Efraim-in langkawn hnûk a ta,
Langkawnah Juda thrang a ta,
Jakob-in pil tuk nawi a tih.
12 In ta din ram thar inlet unla,
Felna chî chu tu unla,
Chuoi lo hmangaina sîk ro.
In kuomah LALPA hung a,
Felna a’n surtir theina di’n,
Ama chu zong hun a nih.
13 Sienkhom rîtlona in tu a,
Khawlona ra in sìk a,
In khĕlhlip ra in fàk a.
Nangni hrâtna chu ring a,
In sipai hau in ringsan leiin,
14 Râlin hung bei an ti cheu a,
In kul sukchim vong an ta,
Beth Arbel a hung bei ni a,
Salmanin a suksiet ang khan,
Nu-nauhai chu hnuoi vuoknan,
An la hmang ding a ni si a.
15 Nangni Bethela chênghai,
In rilo bêk bêk leiin,
Chu chu in chungah tlung a ta,
Zingkar indona a’n tran pha leh,
Israel lal chu se vong a tih.