Israel hremna
9
1 Aw Israel, hlim naw rawh,Hnam danghai hlim chiri angin,
Lawmin chiri ve naw rawh;
I Pathien i uiretsan a,
Hrizawl tina i’n zorna man chu,
I thil thlâkhlâ tak a ni si.
2 Hrizawl le grep săwr khurah,
I khopkham hmu naw ti nih,
Uoiin thar tlung bok naw nih.
3 LALPA ramah cheng zing loin,
Efraim chu Aiguptaah kîr a ta,
Asuria-ah bu porche fang a tih.
4 LALPA kuomah dawn thilhlan,
Uoiin bun suok naw ni hai a,
An thil inhlànah lawm naw nih.
Ruokngha sa kîltu ang elin,
An bu fa phot porche’ng an tih.
Anni chauh fàk ding a na,
LALPA inah hung lut naw nih.
5 LALPA kŭt nihai a tlung pha,
Ieng am in thaw ta ding a na?
6 Sietna an tlansan khomin,
Aiguptan an ruong inhlawm a ta,
Memfis-ah phum tawl an tih.
An rothil tangkaruohai chu,
Chîmbukin bawm khum a ta,
An puon in zarna hmunhai chu,
Hlingin la bâwm sip a tih.
7 Hremna ni a hung tlung mĕk,
Suol man intĕlna ni ding chu,
Israelhan lo hre mol raw hai se.
In bawsietnahai chu tamin,
In helna a nasa êm leiin,
Zawlnei khom invêtah in ngai a,
Thlarau mi khom intlaw bilingah.
8 Zawlnei chu, ka Pathien mi,
Efraimhai ralvêngtu a na,
Sienkhom a fena photah,
A awkna ding châng an kam a,
Pathien inah an lo tai a.
9 Gibea cheng lai ni ang khan,
Porchèna tieng an tla inthûk a,
Pathienin an rîtlona a hriet a,
An suol leiin la hrem a tih.
10 “Israel ka hmu tir khan,
Thlalĕra grep hmu ang ka na,
In thlatuhai ka hmu tir khan,
Theichang lĕra a ra hmasa,
A hmin tìr hmu ang ka nih.
Sienkhom Bal Peor an tlung a,
Milim inzapuium tak hmaah,
An hung inhlân ve el ta a,
An milim ngainathai ang bokin,
Tirdakum an hung kai ve ta si.
11 Efraim ropuina chu vate angin,
A lo vuong hmang dai ta si a;
Nau pieng um naw ni hai a,
Nau von um naw ni hai a,
Nau pai um bok naw ni hai.
12 Naupang nei an ni khomin,
An nauhai lu sûn an ta,
Dama hlà hrim nei naw ning.
Anni ka nghatsan phâ chun,
An chungpikna zuol a tih.
13 Efraim chu Tura ang boka,
Ram thra taka phun a nih.
Sienkhom Efraim nauhai chu,
That ding chaua a nei an nih.
14 Aw LALPA, an ta dingin,
Iem a na i thawpek ding chu?
Nau insiet hlak sŭl pe la,
Nene vuoi tui nei lo leh.
Israelhai chunga LALPA rorel
15 “Gilgala an rîtlonahai lei khan,
Ka theida tawl ta hrim a;
An thil suol thawhai leiin,
Ka in a’nthok hnot suok ka ta,
Hmangai zing ta nawng ka tih,
An hotuhan an mi helsan si.
16 Efraim hna a tlol zo a,
A zung chen a vuoi zo a,
Ra hrim insuo ta naw nih.
Nau a hring a ni khomin,
A nau dit èm èm hai chu,
Keiman sukhlum tho ka tih.”
17 A thu an awi naw leiin,
Ka Pathienin hnâwl tawl a ta,
Hnam tin lai vakvai an tih.