8
1 Israel thiem naw changna“Ka thuthlunghai bawse a,
Ka dàn lakah an hel leiin,
Hmêlmahai chun mupui angin,
LALPA in chung an hung vĕl a,
Râlkhêl tawtawrawt mût ro.
2 Israelhai chun ka kuomah,
“Aw kan Pathien kan hriet che”
Tiin an hung khĕk hlaka chu,
3 Thil thra a hnâwl tlat si leiin,
Hmêlmahan hnot thlûr an tih.
4 Ka thu la hrim hrim loin,
Annin lal an insiem a,
Ka remtina thrang dêr loin,
An hotu ding an inruot a.
Anni insuksietna dingin,
Tangkaruo le rangkachakin,
Milimhai an insiem bok.
5 Aw Samaria, i bawngte limbiek,
Ka lung kheitu kha hnawl rawh.
Ieng chen top am insukporchè,
In la tum zing ding a na?
6 Israel kut themthiemhai siem,
Milim chu Pathien a ni dĕr nawh.
Samaria-a bawngte milim chu,
Suknawi vong la ning a tih.
7 Thli an tu a,
Thrawngaleivir an sǐk.
Bu kûngin vŭi nei naw ni a,
Bu sǐk ding hrim um naw nih.
Lo sǐk ni ta hrim sien khom,
Ram dang mihan fa zo an tih.
8 Israel chu lem zoin a um a,
Tlâktlăina nei lo bêl angin,
Hnamhai lai a lo inchang tah.
9 Ram sabengtung mal tla angin,
Asuria ramah an hang fe a,
Efraim chu ngaizawng kuomah,
A lo hang inzor ta si a.
10 Hnam dang lai inzor sien khom,
Tuhin la khawm nawk ka tih,
Lal hrât sawrdèna hnuoiah,
An zŭr hlum ding an ta si a.
11 Efraim chun suol thawina din,
Maicham tam tak a bawl a,
Sienkhom suol sukpung zuoltu,
Maicham an inchang lem si.
12 Ka dan ziekpek treu lang khom,
Hnam dang ta ding an sawn tlat a.
13 Ka ta dinga thilhlanhai chu,
Inthawina dingin an hmang a,
A sahai chu an fak a,
Sienkhom LALPA a lawm nawh.
An ritlona hre zing ka ta,
An suol leiin hrem ka ta,
Aiguptaah kîr nawk an tih.
14 Israel chun a Siemtu nghilin,
Lal in ropui tam tak a bawl a;
Juda chun kul nei khaw tam,
Indin bel treuh sienla khom,
Khuohai chu raw vong ka ta,
An khaw kulhai kang ram a tih.