Lal ina inphierna thu
7
1 Israel tungding ka tum pha leh,Efraim suolna ngot ka hmu a,
Samaria suolna po po leh.
Inhlèm tuo ngot an chîng a,
Mi inah lûtin an rok a,
Tuol pârah mi an suom a;
2 An suol thaw ka hriet vong ti,
Ngaituona châng an hriet nawh.
An suolnan a chìm vĕl a,
Ka hmaah a’n lang zing si.
3 Rîtlonan lal an suklawm a,
Khêl hril thiemnan mi lienhai;
4 An rêngin uire an na,
Bei siemtu’n bei a ur a,
A bei ur puom hma poa,
Mei a ti hlut hlut ang hin,
Suol thaw châkin an sahăl.
5 Lalin ruoi a thrè chângin,
Mi lienhaiin zu an inrui a,
Lal khom nuizatbûra insiemin,
Ama nuisawtuhai lai a thrang.
6 An lungril chu thuk ang a na;
Dawhaa lal an phierrŭkna chu,
Zăn khuo’n an lungrilah a’n ăi a,
Zing tieng a hung chok suok a.
7 Thuk angin an chok phut a,
An lalhai an tlu thal rum a,
Tu khom mi ko an um nawh.
Israel le hnam danghai
8 Efraim chu hnam danghai le
Zawlpuon inzawn mi a na,
Bei phĕk inlet lo ang a nih.
9 Ram dang mihaiin a thâ,
An sor chău ti a hriet naw a,
A lu-ah kĕlsam a tro tah,
Ti hrim hrim khom a hriet nawh.
10 Hmaisana Israel hêktu chu,
A chapona hi a na,
Chuong chu a ni sà khomin,
LALPA a Pathien chu zonga,
Hung kìr nachang a hriet nawh.
11 Efraim chu thrûva lungmawl,
Hlĕm bawl olsam ang a na,
Aigupta tieng a ko khêk vak,
Asuria tieng a thle nâwk thŭl.
12 An fèna taphotah lĕnin,
Anni chu inkhum ka ta,
Vate anga khal khâwmin,
An vuong bŭm ti ka hriet pha,
Lĕnin man khawm tawl ka tih.
13 An chung a va pik ngei de!
Ka kuom a’nthok tlân hmanga,
Ka laka an hel tlat leiin,
Sietna an chungah tlung raw se!
Intlan suok ka nuom hlea chu,
Thukhêl ngotin an mi bei si.
14 Lungril takin an mi ko nawh,
Khum laizawla inchiek an nih.
Bu le uoiin an dit lei a,
Hung inhawr khawm chauh an na,
Ka laka helhai an nih.
15 Zirtirin ka sukhrat tawl a,
Sienkhom ka lakah thil thra lo,
Anni chun an phan rûk si.
16 Chunghnungtak kuom tieng panin,
An hung ngha kir nuom naw a,
Thalngul kăwia kâwi an nih.
An hotu, trong chapohai chu,
Kawlhnâmin sâm thlung an ta,
Hi lei hin Aigupta ramah,
Nuizatbûr inchang an tih.