Sim nuom lo Israel
6
1 “Hung ro, LALPA kuomah kir ei tiu.Mi lo kei nawi tah sienla khom,
A mi sukdam nawk ding a nih;
Mi lo inhliem tah sienla khom,
Ei hliemhai tuom dam a tih.
2 A kuoma cheng thei dingin,
Ni hni hnungah mi kei harin,
Ni thum niah mi tungding a tih.
3 LALPA chu hrieng ei tiu khai,
Hre dingin thaw pei ei tiu.
Hnuoi chăr sukhnawngtu dinga,
Zing ni suok anga inkhêl lo a,
Thrâl ruo a sûr hlak ang hin,a
A la hung inlang ding a nih.
4 “Efraim, iem ka law ding che?
Juda, iem ka law ve ding che?
In mi hmangaina chu trieusûm ang,
Zing daidaw ral nawk el ang a nih.
5 Chuleiin, ka zawlneihai hmangin,
Ka râwt hlak cheu a ni kha.
Ka trong bausuok thu hmangin,
Ka sukhlum hlak bok cheu a,
Ka rorêlna chun trêk tla angin,
A hung dĕng hlak cheu a nih.
6 Hlanbiekna nêka ka dit lem chu,
Hmangaina detindo a na,
Pumraw thilhlân inhlàn nêkin,
Pathien hrietna ka dit lem.
7 “Sienkhom Adam ang bokin,
Ka thuthlung an bawsiet a,
Chu chun ringum lo takin,
Ka lakah thil an thaw si.
8 Mi suol khawpui Gilead chu,
Thisen insuotu hniekin a sip.
9 Roktuhan mi an inchân angin,
Thiempuhan mi an lambun a,
Sekem lampuiah mi an that a,
Thil suol râpthlâk tak an thaw.
10 Israel sungkuohai lai hin,
Thil pangzatum tak ka hmu a,
Efraim nawchizorna chun,
Israel a sukporchè zo tah.
11 Ka mihai chanvo tungding a,
Ka sukhmuingil nawk pha chun,
Nang ngei khomin aw Juda,
I thaw ra la sîk i tih.