Israel chungthu
5
1 Thiempuhai, hi hi hre ro!Israelhai, ngaituo ngun ro!
Lal sungkuohai, in na daw ro!
In chungthu hrilna a ni si a;
Mizpa tlangah châng in kam a,
Tabor tlang chen lèn in zar hi.
2 Helhan mi suom an uor a,
Anrêngin hrem tawl ka tih.
3 Efraim chungthu ka hriet vong,
Israel khom ka hmu tlang vong.
Efraim nawchi zor leiin,
Israel a porchĕ a nih.
4 An Pathien tienga kîr dingin,
An thilthawin a dâl tlat si.
Inzor an châk dop dop a,
LALPA hrim an hriet fŭk nawh.
5 Hmaisana Israelhai hĕktu chu,
An chapona hi a nih;
Israel le Efraim hai chu,
An suolnan a bûk thlŭk a,
An ruolin Juda khom a tlu ve.
6 An beram le bawng ruol leh,
LALPA hmu dingin feng an ta,
Sienkhom hmu zo naw ni hai,
An lakah a’n siekieng ta si.
7 LALPA lakah ringum loin,
Hnam dang sâwn dam an hring a;
Thla thar det pha an ram chopin,
An rêngin ram vong an tih.
8 Gibea-ah beram ki mut unla,
Rama khuoah tawtawrawt,
Beth-Avenah râlkhêl mut ro;
Benjamin, hnung tieng en rawh!
9 Hremna ni a tlung pha chun,
Efraim chu ram vong a tih.
Thil hung tlung ngei dinghai chu,
Israelhai kuomah ka hril a ni hi!
10 Judai rama mi lienhai chu,
Ramri lung sontu ang an nih.
Ka lungsenna chu an chungah,
Tui angin bun thlang ka tih.
11 Efraim chu nĕksawrin a um,
A thu tlukna siem a sietpui,
Iengkhom ni lo a bêl tlat leiin.
12 Efraim lakah hângthîm ang,
Juda lakah hmonna ka nih.
13 Efraim-in a natzie a hriet a,
Judan a hliem natzie a hriet.
Efraim chun thrangpuitu di’n,
Assuria lal a bĕl a,
Sienkhom, a sukdam thei nawh.
14 Efraim lakah sakeibaknei ang,
Juda lakah keipui ang ka nih.
Pot chen nengin fesan ka ta,
Anni chu fen hmang ka ta,
Tu khomin san ngam naw nih.
15 Suol sima an hung kìr hmâ khat,
Ka hmun tieng fesan ka tih.
Chuongchun ka hmêl zong an ta,
An rinum tuorna lei chun,
Namên loin mi zong an tih.