2 “Tuhin thudik chu hril ka ti che. Persia ramah lal pathum hung suok an ta, a palina chu a danghai nêkin nasa takin hausa lem a tih. A hausakna hmanga a hung hrât hle hnung chun Grik ram do dingin cho a tih. 3 Chun, lal hrât tak hung inlang a ta, a hrătna nasa tak chu hmangin a nuom ang angin thawng a tih. 4 A hung inlal hnungin a ram chu khoi dar ning a ta, kawl kil liah sem dar an tih. A thlahai kutah pĕk ni naw ni a, a ram chu làkpèka mi dang kuoma sem dar a ni tak leiin, ama tluka thu nei nasa um ta naw nih.

5 “Sim tieng lal chu hung hrat a ta, sienkhom a kawmandarhai laia pakhat chu ama nêkin hung hrat lem a ta, a ramah thu nei takin inlal a tih. 6 Kum iemani zat hnungah sim tieng lal chun hmar tieng lal chu inzomna siempuiin, a naunu chu nuhmeiah inneitir a ta, sienkhom lal naunu chun thuneina chel zing naw ni a, hmar lal le a thlahai khom inlal sawt naw ni hai. Chuong hun lai vek chun lal naunu chu a pa le a siehlaw hung somhai chu that vong an tih.

7 Chu hnung chun lal naunu sungkuo laia pakhat chu hung inlal a ta, hmar tieng lal le a sipaihai chu do a ta, an kulah hlukhum a ta, bei a ta, hne’ng a tih. 8 An pathienhai, an milim sunghai, tangkaruo le rangkachaka siem an bur le bel thra tak takhai chu sim tieng ramah hawn a tih. Kum iemani zat chu hmar tieng lal chu bei nawk ta naw nih. 9 Chu zoah hmar tieng lal chun sim tieng lalram chu rûn a ta, sienkhom lo hnot kìr an tih. 10 Hmar tieng lal naupa chu sim tieng do dingin insingsang an ta, sipai tam tak khawm a ta, tui lien sang dang ruol lo angin an kul inhuol a tih. 11 Sim tieng lal chu lungsen êm êmin mi tam tak leh inthok suok a ta, hmar tieng lal chu sipai tam tak leh lo thrang a ta, sienkhom tlawm a tih. 12 Hmar tieng sipai tam tak a thruoi hmang leiin sim tieng lal chu insuong hleng a ta, mi tam tak that a ta, sienkhom hnèna chu chang zing naw nih. 13 Hmar tieng lal chun a hmaa nêka tam lem sipai khâwm a ta, kum iemani zat hnungah ralthuom kima inthuom sipai tam tak leh hung bei lêt a tih.

14 “Chu huna chun sim tieng lal chu do dingin mi tam tak hung ngir suok an tih. I chihai laia thisen insuo hmanghai khom inlàrna sukpuitling dingin hel veng an ta, sienkhom hlawtling naw ni hai. 15 Chu phing leh hmar tieng lal chu hung a ta, kul inhuolna dingin muol pawng siem a ta, kula inhuon khawpui chu lang a tih. Sim tieng sipai hratna chun dang zo naw ni a, an sipai hrat takhai khom che thei naw ni hai. 16 Rûntu chun a nuom ang angin thawng a ta, tu khomin kal ngam naw nih. Ama chun Ram Mawiah umhmun khuor a ta, a kutah sukram theina kol a tih. 17 A hratna po po leh hung inthok a ta, a ram a suksiet theina dingin sim tieng lal leh inremna siem a ta, a ram a suksiet theina dingin sim tieng lal chu ruol thraa siem dingin a naunu inneitir a ta, sienkhom a tum chu hlawtling naw ni a, hlawkpui bok naw nih. 18 Chu hnung chun tuipui kam ramhai chu bei a ta, tam tak lang a ta, sienkhom a kawmandar laia pakhat chun a chapona chu suktawppek a ta, ama chungah bun lêt a tih. 19 Chu zoah ama rama a kul umna tieng kir nawk tum a ta, sienkhom petekin tlung a ta, chu chu a tawpna ning a tih. 20 Ama thlâktu chun a lalna chu ropui taka kengkaw zing tumin sie inchawi luitir dingin sienkhontuhai tir suok a ta, sienkhom kum sawt naw teah lungsen lei le indo lei khom ni loin lal chu suksietin um a tih.

21 A hmuna chun mi rilo deu el pakhat hung inlal a ta, dàn anga lallukhum inkhumtir khom ni naw ni a, dawha hmangin, a ram mipuiin muonga an inngai lai chu hung rûn thut a ta, lalna chu hung hluong a tih. 22 Ama chun ama kaltu sipai tam tak chu tui lien angin hrût hrep a ta, lĕn hmang a ta, chuonghai lai chun thuthlungtu lal khom thrang a tih. 23 Vervek taka inruol thratna thu hnam danghai a thlungpui hnungin anni chu hlĕm a ta, a zuitu mi tlawmte leh hung ngir suok a tih. 24 A ram sunga biel hausá sàhai chu an inring naw lai rûn thut a ta, a pa le a puhaiin an thaw ngai lo chu thawin, a hnungzuituhai chu râllâk thil le sum a rokhai chu sem a tih. Kul nei khuohai lak dan ding phierrûk a ta, sienkhom hun sawt dai naw nih.

25 “A hratna le huoisenna chu chok thoin, sipai tam tak leh sim tieng lal chu bei a ta. Sim tieng lal khomin sipai tam tak le hrat tak leh lo do a ta, sienkhom an lo phierrukna lei chun hmar tieng lal chu ngam naw nih. 26 A ruoi hnienghnar kîltuhai ngei chun ama chu sukbohmang an ta, a sipaihai chu phìn dar an ta, indonaah tam tak thing an tih. 27 Hieng lal pahnihai hin insuksietna lungril put rân siin ruoi kîl tlàngin thukhêlin indawr an ta, sienkhom hlawtling naw vé ve’ng an ta, a hun ruotah la tawp vé vè tho an tih. 28 Rosum tam tak leh hmar tieng lal chu a ram tieng kir a ta, sienkhom a lungrilin thuthlung thienghlim chu thriekpek tum a ta, a nuom anga a thaw zoah a ramah kir a tih.

29 “Hun ruota chun sim tieng lal chu do nawk a ta, amiruokchu a hmaa ang ni ta naw nih. 30 Ama do dingin thlang tieng tuipui kam rama^a inthokin long ruol hung an ta, a lungril zâm a ta, lung hnuolin kir a ta, a lungsen hrìk thlakna dingin thuthlung thienghlim chu do a ta, thuthlung thienghlim kalltuhai chu hung ditsak a tih. 31 A sipaihai chu tempul inhuonna kul suosam dingin hung inthok an ta, hmun thienghlim chu sukporcheng an ta, ni tina pumraw thilhlân an thaw hlak chu suktawp an ta, sukrăutu thil tirdakum sieng an tih. 32 Thuthlung inphatsantuhai chu trongkam thluma inpâk derin sukporche’ng a ta, sienkhom Pathien thu zawmtuhai ruok chun nghet taka thrang tlatin ama chu do an tih.

33 “Anni laia mi varhai chun mi tam tak zirtir an ta, sienkhom iemani hun sung chu a thren kawlhnâm le meia sukhlum ning an ta, a thren lung inah khum an ta, a thren rok bok an tih. 34 An tluk pha thrangpuitu nei tlawm an ta, lungrila ti tak tak silo mi tam takin zui an tih. 35 Mi var threnkhat chu tawp hun a tlung chena thlit fìm a, sukthieng a, bal kâi loa an um theina dingin tuor bok an tih, hun ruot chu a la hung tlung ding chauh a ni si a.

36 “Lal chun a nuom dan ang angin thawng a ta, ama insukropuiin inchawisang a ta, pathienhai po po chungah insieng a ta, pathienhai Pathien kalin, hril trǐpa nei loin inpâwt a ta, lungsenna hrǐk thlâk zo a ni hmâ khat hlawtling a tih, ruota lo um ta sa chu a hung tlung ngei ding a ni si a. 37 A thlatuhai pathien chu poisa naw ni a, nuhmei ruol ngainat pathienhai le pathien dang hrim hrim khom poisa bok naw ni a, an rênga chungah insieng a tih. 38 Annihai nĕkin kul humtu pathien chu chawimawi lem a ta, a pi le puhai hriet ngai lo pathienhai chu rangkachak hai, tangkaruo hai, lunghlu hai le thil hluhai pein chawimawi a tih. 39 Ram dang pathienhai thrangpuiin kul nghet tak takhai chu bei a ta, tu khom ama pom taphot chu suklien a ta, tam tak chungah ro inrĕltir a ta, a ram chu man neiin sem a tih.

40 “Chun, tawpna huna chun sim tieng lalin ama chu hung bei a ta, hmar tieng lal chun tawlailir leh, sakor chungchuong mi le long tam tak leh ama chu do dingin thlipui angin inthok suok a tih. Ram tam tak do a ta, tui lien sang angin hrût hmang a tih. 41 Ram Mawi khom chu rûn a tih. A hmaah ram tam tak tlu’ng an ta, sienkhom Edom le Moab le Amon hnam thruoituhai ruok chu a kuta inthoka san suok ning an tih. 42 Ram tam tak chungah inlal a ta, Aigupta khomin pumpel bik naw nih. 43 Aigupta rama rangkachak le tangkaruo sie khawmna le a ram thil hluhai po po chungah thu hung nei a ta, Libya mihai le Ethiopia mihai khom a hnuoiah kûn an tih. 44 Sienkhom, sak tieng le hmar tienga inthoka rîva a hriet chun a lung thrâwng a ta, anni do ding le sukchimit dingin lungsen takin inthok suok a tih. 45 Tuipui le tlâng thienghlim le mawi inkara chun bûk khuor a ta, sienkhom a tawpna hung tlung a ta, tu khomin thrangpui naw ni hai.