Tigris kama Daniel inlarna hmu
10
1 Persia lal Kura inlala inthoka kum thumnaa chun Daniel (Belteshazzar tia ko bok) kuoma chun thu a hung tlung a. Chu thu chu thu indik, indona ropui tak chungchang thu a nia, a thu umzie khom inlàrnaa chun a hril fiepek a. 2 Chuong lai chun kei Daniel hi hapta thum pumhlum lusûnin ka um a. 3 Bu ka fâk dukdak naw a, sa amanih uoiin amanih ka bauah a lût naw a, hapta thum a tlingtlak hma chun hriek khom ka’n nâl bok nawh.4 Chun, thla khatna ni sawmhni le pali chun vadung lien tak Tigris kamah ka lo ngìr a. 5 Ka hang en a, mi pakhat puon zai inhmia inthuom le a kawnga rangkachak hlîr kawngchùn inzem hi ka hmu a. 6 A taksa chu beril lung ang, a hmêl chu kawlphe anga var, a mit chu meiser chok ang, a bân le kehai chu dâr nawt tle sèt ang le a rawl chu mi tam tak rawl ang a nih. 7 Chu inlàrna chu kei Daniel chauh hin ka hmu a, ka bula umhai chun inlàrna chu an hmu ve naw a, sienkhom chuong ang thil tribaiumin a tuom lei chun inbikna ding zongin an tlanse a. 8 Chuongchun, keima chauh ka ni ta a, inlàrna rapthlak tak chu ka hmason a, tha hrui hrim ka nei naw a, mithi ang elin ka hmêl chu a dâng a, ka zoi thla vong a. 9 Sienkhom a trong ri chu ka hriet a, ka ngaithlăk lai chun ka bâwka hnuoi sikin ka lo in innghil ta dĕr a.
10 Chun, a kutin a mi hung chel a, ka kut le ke a’n thin hlop hlop a. 11 Ama chun ka kuomah, “Aw Daniel, Pathien ngainat mi i nih. Tu hin ngîr inchang la, ka thu hril ding chê hi fimkhur takin ngaithla rawh, i kuoma tir ka ni si a” a ta. Chu thu chu a hril zoin inthin pumin ka ngîr suok a. 12 Ama chun, “Daniel, tri naw rawh. Pathien hmaa inngaitlawm ding le hrietthiemna lungril put dinga lungril i siem nia inthok khan i thuhai chu ngaithlakin a um a, chu leia hung chu ka nih. 13 Persia ram hotu ruok chun ni sawmhni le ni khat a mi dodal a. Persia lalin a mi chăr dê tlat leiin mi san dingin an hotu lien laia pakhat Mikael a hung a. 14 I mihai chunga thil la hung tlung dinghai chu hril ding chein tuhin ka hung a nih, inlàrna i hmu kha thil la hung tlung ding thu a ni si a” a ta.
15 A hril lai chun hnuoi sikin ka bokkhup a, ka trong thei naw a. 16 Mi pakhat, mihriem ang deu hin ka hmùr a hung them a, chuongchun ka bau ka ka a, ka hmaa ngir kuoma chun, “Aw ka lalpa, inlàrna ka hmu chun a mi suklungngai a, thahrui hrim ka nei nawh. 17 Ka lalpa, i siehlaw kei hin iengtin am ka biek ding chê a na? Thâ hrim ka nei naw a, ka’n thuok dèp dép chauh a ni hi” ka ti a.
18 Chuongchun, mihriem ang deua inlang chun a mi them nawk a, a mi sukhrăt a. 19 Ama chun, “Tri naw rawh, nang Pathien ngainat hlaw! Thlamuong takin um rawh! Tuhin hùng hrât ta rawh, hùng hrât ta rawh” a ta. Chuonga a hril lai chun ka hung hrăt a, “Ka lalpa, hril pei rawh, i mi sukhrăt ta si a” ka ta.