Hun tawp hun
12
1 “Chu huna chun i mihai vêng hlaktu hotu ropui tak Mikael chu hung suok a tih. Hnamhai an uma inthoka la tlung ngai lo buoina nasa tak tlung a tih. Amiruokchu, i mihai, lekhabua hming chuong taphot chu san himin um an tih. 2 Hnuoi pilvuta zal tah mi tam tak chu hung tho an ta, threnkhat chu chatuon hringnaah, threnkhat ruok chu inzakna le chatuon muolphonaah, lût an tih. 3 Mi varhai chu vana var angin êng an ta, felnaa mi tam tak thruoi lûttuhai chu arasi angin chatuonin var ta’ng an tih. 4 Sienkhom aw nang Daniel, thu ziekna bu chu ziel la, tawpna hun a tlung chenin chăr tlat rawh. Hmun tinah mi tam tak tlân vĕl ruoi an ta, hrietnaa a la pung ding a nih” a ta.5 Chun, kei Daniel chun ka hang en a, ka hmaa chun mi pahni an ngir a, pakhat chu vakam khing tieng, a dang chu ral khing tieng. 6 Vadunga tui chunga um puon zai inhmia inthuom kuoma chun pakhatin, “Hieng thilmakhai tlung kimna ding hin kum ieng zat am la ngai a ta?” a ta. 7 Puon zâi inhmia inthuom, va hnâr tienga um chun a kut chang tieng le voi tieng chu van tieng a phar a, chatuona hring hming chu sâlin, “Hun khat, hun hnih, hun chenve sungb ning a tih. Pathien mihai an sukdùdàna a tawp phâ leh hieng thil po po hi hlen kim ning a tih” a ta.
8 A trong ri chu ka hriet a, a umzie ruok chu ka hriet nawh. Chuleiin, “Ka lalpa, hieng po po tawpna chu iem ning a ta?” tiin ka’n don a. 9 Ama chun, “Daniel, fe ta rawh, thuhai chu a tawp hun chena dinga chăr a ni tah. 10 Mi tam tak thlit fǐm le sukthieng le fâi vara siem ning an ta, sienkhom mi rilohai chu rilo zing an tih. Mi rilo tu khomin hre thiem thei naw ni hai a, mi varhai ruok chun hre thiem an tih. 11 Ni tina pumraw thilhlân suktawp a nia inthoka sukrautu tirdakum sie a hung ni hun inkarah ni 1,290 tlâng a tih. 12 Nghak hràm hrám a, ni 1,335 nghâk tlungtu chu a eng an thawl. 13 Nang chu a tâwp chenin fe pei rawh. Chun, chawl i ta, i nihai tawpna a tlung pha leh i rochana ruot chu dong dingin tho nawk i tih” a ta.