“Aw LALPA, Pathien ropui le trium, ama hmangaitu le a thupêk zawmtuhai chunga a hmangaina thuthlung vong tlat hlaktu, 5 i lakah thilsuol thawin i poi kan tawk a. Kan rilo a, kan hel a, i thupêk le dànhai kan nghatsan a. 6 Nangma hminga kan lal hai, mi lien hai, pa hai le a ram mipuihai kuoma thu hung hril hlaktu i siehlaw zawlneihai thu chu kan ngaithlăk nuom bok nawh.

7 “Aw LALPA, nang chun indik takin thil i thaw hlak a, keini ruok chun i hmaimawkna ding ngot kan thaw lem hlak. Judai rama mihai, Jerusalem le Israel rama mihai po po le ram hla le hnaia i hnot darhai hi i lakah kan ringum ngai si nawh. 8 Aw LALPA, keini le kan lalhai, mi lienhai le pahai hi i lakah kan suol leiin inzaknan kan sip a ni hi. 9 LALPA kan Pathien, nang chu ngil i nei a, i lakah hel hlak inlang khom, nang chun i mi ngaidam hlak. 10 LALPA kan Pathien thu kan zawm naw a, a siehlaw zawlneihai hmanga dan a mi pĕkhai khom chu kan vong bok nawh. 11 Israel mi po poin i dàn an bawsiet a, an nghatsan che a, i thu an awi nuom si nawh. Kan suol tlat si leiin i siehlaw Mosie Dan bua inziek trongsie po po le i hming sâl meua kan chunga thil thra naw intlungtir dinga i lo inkhămna po po chu kan chungah bun thlâkin a um tah a nih. 12 Keini le kan lalhai chunga thil hung tlung dinga i hrilhai chu hung hlenin, sietna râpthlăk kan chungah i hung intlungtir a. Jerusalem tluka naa i soisak khuo hi vankhup hnuoiah tu khuo khom a um nawh. 13 Mosie Dana inziek angin, hieng sietnahai hi kan chungah hung tlung sien khom kan suolhai sima thutak tieng ngaisak dingin LALPA kan Pathien ditsakna kan zong nuom si nawh. 14 LALPA kan Pathien chun iengkim indik taka i thaw hlak leiin, kut kei loin kan chungah sietna i hung intlungtir a ni si a. Chuong sà khom chun i thu kan awi nuom chuong si nawh.

15 “Aw LALPA kan Pathien, Aigupta rama inthokin i kut hratin i mihai i thruoi suok a, tu chen hin hming i ser a. Keini ruok chu i chungah kan suol a, i poi kan tawk a nih. 16 Aw LALPA, i felna po po leiin i lungsenna le intŭrna chu i khawpui Jerusalem, i tlâng thienghlima inthok hin la hmang ta dingin ka ngĕn che. Kan suolna lei le kan pahai bawsietna leiin Jerusalem le i mipuihai hi kan kawl le kienga mihai nuizatbŭr kan inchang zo ta si a.

17 “A nih, tuhin aw Pathien, i siehlaw trongtraina le hnina hi lo ngaithla hrăm rawh. Aw LALPA, nangma zâr bêkin i Hmun Thienghlim ram ta hnung hi ditsakna mitin hung en nawk hrăm raw khai. 18 Aw Pathien, i nâ mi dawpêk la, mi ngaithla la, i mit mengin i hming puttu khawpui hang ram tăk dan hi zuk en ta. Kan felna leia i hmaa dawvan hung kai kan ni naw a, i zangaina ropui tak lei lema hung kai kan nih. 19 Aw LALPA ngaithla la, aw LALPA ngaidam rawh; nangma lei bêkin aw ka Pathien, che nghâl la, sâwt riel ta naw rawh, i khawpui le i mipuihai hin i hming an put si a” tiin.

20 Chun, keima suol le ka mi Israelhai suol thupha chawiin ka trongtrai pei a, LALPA ka Pathien kuomah a tlâng thienghlim indin thar nawk dingin ka hni a. 21 Chuonga ka trongtrai lai chun, kha hmaa inlarnaa ka hmu tah Gabriel chun zan tieng pumraw thilhlan hun lai vel hin hrât taka vuongin a mi hung pan a. 22 Thurawn mi pein ka kuomah, “Daniel, sungril mit varna le hriet thiemna lungril pe ding chein ka hung a nih. 23 I hnî hlima inthok khan a donna pĕk i ni tah ti ka hung hril che a nih, ngaisak i hlaw hle si a. Chuleiin, ka thucha hung hawn hi ngun takin ngaituo la, inlàrna i hmu chu a umzie hre chieng rawh.

24 “I mihai le khawpui thienghlim hi bawsietna le suolnaa inthoka inthiel faina ding dam, rîtlonaa inthoka inthien faina ding dam, chatuon felna lak lutna ding dam, inlarna le hril lawknahai hlenna ding dam le mi thienghlimtak hriek nalna ding damin hapta sawmsari ruot a nih. 25 Jerusalem tungding le bawl thra dinga thupêk insuo a nia inthoka Hriek Nal lala a hung inthrung chenin hapta sari ning a tih ti hre fie rawh. Harsatna tam tak kârah Jerusalem kotthlĕr le a tren khurhai chona dingin hapta sawmruk le pahnih ning a tih. 26 Hapta sawmruk le pahni hnunga chun Hriek Nal chu that ning a ta, mi tu khom nei ta naw ni a, lal dang hung suok a ta, a sipaihai thruoiin khawpui le tempul chu suksieng a tih. Tawpna chu tui lien angin hung a ta, a tawp chenin indona um a tih, sukramna chu tlung dinga ruot sâ a ni si a. 27 Hapta khat sung chu mi tam tak thuthlung siempui a ta, sienkhom hapta chenve-ah hlanbiekna le thilhlânhai chu suktawp a tih. Tempul sîr khata chun sukramtu tirdakum sieng a ta, a tawpna hun dinga ruot a tlung phaa a chunga lungsenna bun thlâk a ni chenin tempul chu hluong a tih” a ta.