Beramchal le kĕl
8
1 Lal Belshazzar inlala inthoka kum thumnaa chun kei, Daniel kuoma hin inlàrna dang a hung inlang a. 2 Inlarnaa chun Elam biela Susan lal in, Ulai tuikor kamah ka lo um a. 3 Ka hang ngha vel a, ka hmaa tuikor kama chun beramchal, ki pahni nei ngîr hi ka hmu a, a ki chu a sei hle a. Ki pakhat chu ki dang nĕkin a sei lem a, a sei lem chu a mawng nuhnung lem a nih. 4 Beramchalin thlang tieng le hmar tieng le sim tieng nora a’n phǐt lai chu ka hmu a, sa dang hrim hrim a cho ngam an um naw a, a kuta inthoka san suok thei an um bok nawh. A nuom ang anga chein a’n hrosa a, a hung ngĕng ta hle a.5 Ka thil hmu ka ngaituo lai chun khawthlang tienga inthokin kèl, a mit khing hni inkâra ki langsar deu nei hin hnuoi pum hlênin a hung inlang thut a, a ke chun hnuoi khom a tawk nawh. 6 Tuikor bula ngir beramchal, ki pahni nei chu lungsen êm êmin a hung pan a. 7 Beramchal chu na takin a baw a, a sik a, a ki pahnihai chu a siktliekpek a. Beramchal chun a ngam naw hle a, hnuoiah a sik thluk a, a sir ziel a, a kuta inthoka beramchal san suok thei an um hrim hrim nawh. 8 Kèlchal chu a hung ngĕng ta hle a, sienkhom a hrăt vanglai takin a ki hreu chu a tliek a, a hmunah ki pali, kawl kil li nghain a hung mawng a.
9 Ki pali laia ki pakhata inthok chun ki chikte a hung indawn suok a, tlawm taka intranin sim tieng le sak tieng le Ram Mawia tieng chun nasa takin a hung inzàr lien a. 10 Van lêngruol tong hiel khopin a’n thrang lien a, arasi bawr iemani zât zet chu hnuoiah a hol thlak a, a sir hmăt a. 11 Chuong van lêngruolhai lal anga insuklienin, ni tina pumraw thilhlânhai chu a lâkpĕk a, a Hmun Thienghlim chu a suksiet a. 12 Van mi thienghlim pawlhai laia helna leiin, van mihai le ni tina hlanbiekna thilhlanhai chu ama kuta chun an pĕk a, iengkimah a hung hlawtling a, thutak chu hnuoiah pei thlâkin a hung um ta a.
13 Chun, vantirko pakhat trong ri ka hriet a, a kuoma chun vantirko dangin, “Ni tina pumraw thilhlan chungthu dam, helna leia sukramna a tlung thu dam, sir de dinga hmun thienghlim le chu taka chenghai chu pek suok an ni thu dama inlarna hi hlen kim a nina dingin hun ieng chen am la’ng a ta?” a ta. 14 Ama chun, “Zing tieng le zan tieng voi sanghni le zathum sûng la’ng a ta, chu zoah Hmun Thienghlim chu inthien fai ni nawk a tih” a ta.
Inlàrna hrilfiena
15 Kei Daniel hin inlàrna chu thlira a umzie hriet ka tum lai chun, ka hmaah mi pakhat, mihriem ni awm tak hi a hung ngìr a. 16 Ulai tuikor kama inthok chun pasal rawlin, “Gabriel, hi pa hi inlàrna umzie chu hrilfie rawh” tia a hung hril ri ka hriet a. 17 Ka bul a hung hnai chun ka tri hle a, a hmaah ka bokkhup a. Ama chun, “Mihriem naupa, inlàrna hi hun tawp ding hrilna a nih ti hre rawh” a ta. 18 A trong lai chun hmaia hnuoi sikin indên takin ka lo in a, sienkhom a mi keihar a, a mi’n ngirtir a. 19 Ama chun, “Ngai ta, lungsenna ni a hung tlung phaa thil um dan ding chu ka hril ding chè a nih, inlàrna i hmu hi khawvel tawp ding thu hrilna a ni si a” a ta.
20 Ama chun ka kuomah, “Beramchal ki pahni nei i hmu kha Media le Persia lalhai tìna a nih. 21 Kĕlchal inhmul dum kha Grik lal tina a na, a mit le mit inkara a ki hrĕu kha an lal hmasa tak chu a nih. 22 A ki tliekna hmuna ki pali hung indawn suokhai kha, chu hnama inthoka ram pali la hung suok ding thu inentirna a nih; thilthawtheina ruok chu a ki hrĕu angin nei ta naw ni hai. 23 An inlal tawp tienga helhai an hung rilo tawpkhawk pha chun lal hmêl trium tak, thil phierruk thiem, hung suok a tih. 24 Nasa takin hung hrât a ta, sienkhom a thilthawtheina chu amaa inthok ni naw nih. Råpthlăk khopin thil sukram a ta, a thaw taphotah hlawtling a tih. Mi hrâthai le mi thienghlimhai suksieng a tih. 25 Inhlĕm chu thil hlâwkah hung inchangtir an ta, chu taka a pukhawi tak chu ama ning a tih. Muonga an inngai laiin mi tam tak suksieng a ta, lalhai Lal khing a ta, sienkhom mihriem kut thrang loa suksietin um a tih. 26 Zing tieng le zana inlàrna inhmutira i um tahai kha thudik a ni a, amiruokchu hun sawt tak hnunga la tlung ding chauh a ni leiin inlàrnahai kha chăr khum rawh” a ta.
27 Kei Daniel hin ka thil hmuhai chu ka chăupui phâ dĕr a, ni tam tak damloin ka zâl a. Ka hung tho inkăng thei chun lal sin chu ka sunzom nawk a. Inlàrna chu pangzatum ka ti hle a, hriet thiem phak ruol a ni si nawh.