Danielin inlărna a hmuh
7
1 Babulona lal Belshazzar inlal kum khatnaah Daniel chu khuma a zăl laiin a mangin inlârna a hmu a, a mang chu a tlângpui a ziek thlăk a.2 Daniel chun, “Zana inlărna ka hmu a, ka hma tieng ka hei en a, kawl kil lia inthokin thli a hung hrang a, tuipui chu a sukso buon buon a. 3 Tuipuia inthok chun sakol lien tak tak pali, inang lo seng hi, an hung suok a. 4 A pakhatna chu sakeibaknei ang a na, mupui thla ang a nei a, ka en zing lai chun a thla chu an pot kol a, hnuoia inthokin an kei tho a, mihriem angin ke pahniin an inngirtir a, mihriem lungril an inputtir a.
5 Chun, ka hmaa chun sakol pahnina chu a lo ngir a, savom ang a na, a ke hnung tieng chauin a ngîr a, a baua chun nâkru pathum a sè put a. Rawl hung suok chun, “Tho la, i khop tawkin sa fa rawh” tiin a hril a.
6 Chu hnung chun ka hang en a, sakol dang a hung inlang nawk a, keite triel ang a na, a hnung tieng vate thla ang thla pali a nei a, lu pali a nei bok a, a kuoma chun rorêl theina thuneina an pĕk a.
7 Chuonga zăna inlarna ka en zing lai chun ka hmaah sakol palina, pangzatum tak le tribaium tak, hromhraw êm êm el chu a hung inlang a. Thîr ha lien tak a nei a, a sa sehai chu a pot chen a, a dol zung zung a, a fak mahla po chu a chìl sop hrep a. Sakol dang ang loin kî khom sawm zet a nei a.
Tienlai mi rorèlna
8 A kihai ka en zing lai chun ki dang chikte hi a hung mawng nawk a, a ki hmasa pathum chu an phawi a. Hi ki mawng thar hin mihriem mit ang mit a nei a; sakol bau chun uongna thu ngot a sak suok a.
9 Chuonga ka thlir zing lai chun,
Lalthrungpha an hung rem a,
Tienlaimi a hung inthrung a,
A silfen vûr angin a var a,
A sam, sahmul var angin.
Lalthrungpha chu mei anga êngin,
A ke kuolhai a chok puot puota.
10 A hmaa inthokin meiling,
Vadung ang a luong suok a.
A sâng tĕlin a rong an bawl a,
A sîng tĕl a hmaah an ngir.
Rorêlna chu an hang tran a,
Lekhabu chu an phar a.
11 “Ka en zing lai chun, chapo taka a ki chu a trong a trong leiin sakol palina chu an that a, a ruong chu an chan phit a, meia chun an pei a. 12 Sakol danghai thuneina khom an lăkpêk vong a, iemani chen an la dam ruok chu an phalpĕk a.
13 Zana inlarna ka hmu chu ka en zing a, ngai ta, van sûm laia inthoka hung thla mi pakhat, mihriem naupa ang hi ka hmu a. Tienlaimi chu a hung pan a, a hmaa chun an hung thruoi a. 14 Thuneina hai, ropuina hai le thilthawtheina hai chu a kuomah an pĕk a, mi tin, hnam tin le trong tina mihai chun an chawibiek a. A lalna chu lalna hlun, ral ngai lo ding a na, a lalram chu tu suksiet thei ngai lo ding chu a nih.
Inlărna hrilfiena
15 Kei, Daniel hi, zana inlarnaa ka thil hmu chun a mi sukthlaphâng a, ka lungril a chokbuoi hle a. 16 Hieng thil umziehai po po hi mi hril fie dingin chu taka ngîr laia pakhat chu ka va pan a, ka’n don a, thil um dan le a hrilfienahai chu a mi hril a: 17 ‘Sakol pali i hmuhai kha hnuoia lalram pali la hung ngir dinghai chu an nih. 18 Amiruokchu, Chunghnungtak mi thienghlimhai chun lalram chu la chang an ta, kumkhuoin nei an tih, a nih, chatuona inthoka chatuon chenin” a ta.
19 Chun, sa palina, a danghai nêka danglam bik, tribaium tak el, a hahai thîr, a tinhai dâr, a sa sehai pot nawi a, dol zung zung a, a fàk bànghai sir de tlat hlak chungchang thu umzie tak chu hriet ka châk ta a. 20 A lua ki sawm um chungchang dam, ki dang a hung inder suok hnunga ki hmasa pathum a tlong dan dam, ki mit nei le a baua uongna thu inpawt suok zing chungchang thu khom chu hriet ka châk bok a. 21 Ka en zing a, ki chun mi thienghlimhai chu a do a, a hne a. 22 Sienkhom Tienlaimi chu a hung a, Chunghnungtak mi thienghlimhai chu hnèna a’n changtir ta lem a, lalram an hluo hun chu a hung tlung ta a.
23 Sakol palina chungchang chu hieng ang hin a hril a: “Hi sakol palina hi hnuoia lalram hung ngir ding palina chu a nih. Lalram danghai nêk khan danglam a ta, hnuoi pumpui hi dol a ta, a kein sir sop a ta, râwt năwi a tih. 24 A ki sawmhai chu hi lalrama inthoka lal sawm hung suok dinghai chu an nih. Anni hnunga hin lal pakhat hung suok a ta, a hmaa lal pathumhai chu tukdol a tih. 25 Chunghnungtak chu kalin hril se bor bor a ta, mi thienghlimhai nêksawr a ta, hun bi ruot le dàn hai chu thlakthleng vong tum a ta, mi thienghlimhai chu hun khat le a chenve a kuta pĕk ning an tih.
26 “Amiruokchu, rorêlna um a ta, a thuneina chu lăkpêk an ta, kumkhuoin sukbohmang an tih. 27 Chu zoah vankhup hnuoia lalramhai chunga inlalna hai, thuneina hai le ropuina hai chu Chunghnungtak mi thienghlimhai kutah pe’ng an tih. A lalram chu lalram kum hlun ning a ta, rorêltuhai po po chun chawibiekin a thu chu zawm an tih.
28 Hi hi thil tawp dan chu a nih. Kei, Daniel hi, ka hmai dâng hiel khopa triin ka thil hmuhai chu ka ngaituo a, lungrilin ka pai rŭk ta zing a.