Daniel: sakeibaknei pŭkah
6
1 Daria chun a lalram biel za le sawmhnia optu dinghai a thlang a. 2 Optuhai chunga chun hotu pathum a ruot a, chuonghai laia pakhat chu Daniel a nih. Lal ditzawng anga biel optuhaiin ro an rĕl theina dingin hotu pathumhai chu an mawphurna biel ding seng a ruotpek a. 3 Daniel chu mi thei chungchuong a ni leiin hotuhai lai chun a thaw thra tak a, lal chun a ram pumpuia rorêltua sie a lungril a. 4 Hi thil lei hin a thokpui hotuhai le biel optuhai chun suksiet tumin a thaw suol an inchàn a, sienkhom an hmu thei si nawh. A ringum a, a hlemhlè ve naw a, thil ngaizal mi a ni naw leiin a’n dik nawna an hmu zo si nawh. 5 A tawpa chun chuong mihai chun, “A Pathien dan zawm thu le inzom thil a ni ngot naw chun ama awkna remchang ding thil hmu ngai naw’m ei nih” an ta.6 Chuongchun, hotuhai le biel optuhai chu lal kuomah a honin an fe a, a kuomah, “Aw lal Daria, kumkhuoin dam rawh. 7 Lal hnuoia hotuhai, thuneituhai, biel optuhai, thurawn petuhai le optuhai po po chu ni sawmthum sung, aw laltak, i kuoma chauh naw chu pathien amanih mihriem tu khom kuoma thil hni taphot chu sakeibaknei pŭka thlăk ni sien ti thupek hi insuo le kengkaw ni sien ti kan remti tlang a. 8 Tuhin aw laltak, thupêk chu puongin ziek ngeiin insuo la, Media le Persia dan danglam ngai lo anga thupêk hi thlak danglam a ni nawna dingin lalin a hming ziekna suoi ngei nam raw se” tiin an hril a. 9 Chuong angin thupêk chu Daria chun ziek ngeia insuoin a suoiin a nam nghet a.
10 Thupêk chu insuo a ni tah ti Danielin a hriet charin in sawng tienga a pindan, Jerusalem tieng ngha tukver umnaa chun a’n lawi a. A hmaa a thaw dan ang bokin, Pathien kuomah dingthrathruona lawmthu hrilin ni tin voi thum a trongtrai zie a. 11 Chun, hieng mihai hi a ruolin an hang fe a, Pathien kuoma thil hnia a trongtrai lai chu an hmu a. 12 Chuongchun, lal kuomah an fe a, lal thupêk chu hrilin a kuomah, “Aw laltak, ni sawmthum sung chu nangma kuoma chauh naw chu pathien amanih mihriem amanih tu khom kuoma hnǐna siem taphot chu sakeibaknei pŭka pei ding ti khapnaa khan i hming ziekin suoi i nam a ni naw maw?” an ta.
Lal chun, “Media le Persia dan thlak danglam thei a ni naw angin ka thupêk kha a la ngîr zing” a ta. 13 Anni chun lal kuomah, “Aw laltak, Juda mi saltanghai laia mi Daniel khan a poisa naw che a, khapnaa i hming ziek khom kha a poisa bok nawa, ni tin voi thum a la trongtrai zing a nih” an ta. 14 Lalin chu thu a hriet chun nasa takin a beidong a, Daniel chu san suok a tum tlat a, ni tlâk chenin theitawpin a bei a.
15 Sienkhom mihai chu a honin lal kuomah an fe a, a kuomah, “Aw laltak, Media le Persia dànin khapna amanih, dan amanih lal takin a nam nghet tah chu sukdanglam thei a ni nawh ti hre rawh” an ta. 16 Chuongchun, lal chun thu a pêk a, Daniel chu an thruoi a, sakeibaknei pŭka chun an pei a. Lal chun Daniel kuomah, “I Pathien, a rong i bawl rop hlak khan sanhim a ti che” tiin a hril a. 17 Chun, lung an hung lak a, pûk kotkhar chu an khăr a. Daniel chungthu chu sukdanglam a ni nawna dingin ama kutsebi ngeiin le a mi lienhai kutsebiin suoi an nam khum a. 18 Lal chu lal inah a’n lawi a, bu a nghei a, mi sukhlimtuhai a ko naw a, zankhuoin imu a hmu bok nawh.
19 Lal chu zingkâr inhma takin a tho a, sakeibaknei pŭka chun inhmaw takin a fe a. 20 Daniel an thlăkna pŭk kawl a tlung chun trap rawlin, “Aw Daniel, Pathien hring siehlaw, i Pathien, a rong i bawl rop hlak chun sakeibaknei laka inthokin a san suok thei che am?” tiin a ko khêk a. 21 Daniel chun lal kuomah, “Aw laltak, kumkhuoin dam rawh. 22 Ka Pathien chun a vantirkohai a hung tir a, sakeibakneihai bàu a sukchìp a, ieng khom an mi law naw ie; a mithmua chun soisel boin ka um si a. Chun, aw laltak, i chungah ieng poi khom ka tawk bok nawh” a ta. 23 Lal chu a lawm ĕm êm a, Daniel chu pûka inthoka la suok dingin thu a pêk a, chuongchun an lak suok a, Pathien a ring tlat leiin hliemna hlek khom a nei nawh.
24 Chun, lal thupekin Daniel hêktuhai chu an hung thruoi khawm a, an nuhmei le nauhai leh sakeibaknei pŭka chun an pei lut a. Pûk truong khom tlung hman loin sakeibakneihai chun an lo pot chen a, an ruhai khom an se hâwp vong a.
25 Lal Daria chun a ram sung po poa mi tin le hnam tin le trong tina mihai kuoma chun lekha a ziek a:
“In rênga chungah hmuingilna nasa takin pung raw se.
26 “Ka ram op sung po poa hin mihaiin Daniel Pathien chu tria inzà dingin hi thupêk hi ka siem a nih:
Ama chu Pathien hring a na,
Kumkhaw dai Pathien a na,
A ram chu suksiet ruol lo,
A lalna tawp nei lo a nih.
27 San suokin a sandam a,
Van le hnuoiah inchikna,
Thil makhai a thaw hlak a,
Sakeibaknei kuta inthokin,
Daniel a san suok a nih”
tiin.
28 Chuongchun, Daniel chu Daria inlal sung le Persia mi Kura inlal sung po po chun a hmuingil ta hle a.