Banga kutziek
5
1 Lal Belshazzar chun a mi lien sangkhat ruol ta dingin ruoi ropui tak a thre a, uoiin an dawn tlang a. 2 Belshazzarin uoiin a dawn lai chun a nuhmei hai, a hmei hai le a mi lien hai le uoiin an dawnna dingin a pa Nebukadnezzarin Jerusalem tempula inthoka tangkaruo le rangkachak bûr le bèl a hung lakhai laia mi chu hung la suok dingin thu a pêk a. 3 Jerusalem tempula inthoka an hung lak rangkachak no mawihai chu an hung chawi a, lal le a nuhmei le hmeihai le a milienhai chun chuong nohai chu hmangin uoiin an dawn a. 4 Chuonga uoiin an dawn lai chun rangkachak dam, tangkaruo dam, thîr dam, dâr dam, lung dam le thing dama siem an milim pathienhai chu an chawimawi a. 5 Chuong lai tak chun mihriem kutpar a hung inlang a, lal ina khawnvar siena bula bang zŭt năma chun thu a hung ziek a, a ziek lai chu lal chun a thlir zing a. 6 A hmai chu a hung dăng a, a tri êm leiin a khûp le khûp invaw tuo hlop hlop khopin a’n thin a, a ke tieng po chu a zoi thla vong a. 7 Lal chun a aikei thiemhai, arasi hmanga aisan thiemhai le dawithiemhai chu a’n kotir a, chuong Babulon mi varhai kuoma chun, “Tu khom hi thu ziek hi tiema a hrilfiena mi hril thei chu puon senduk insiltir ning a ta, rangkachak thri inhlitir ni bok a ta, a rama rorêltu lien tak pathumnaa siem ning a tih” a ta.
8 Lal mi varhai po po chu an hung lŭt a, sienkhom ziek chu an tiem thei naw a, an hrilfie thei bok nawh. 9 Lal Belshazzar chu a thlabar zuol a, a hmai khom a hung dàng zuol a, a milienhai chu an chi-âi hle a.
10 Lal le a milienhai ri chu hrein lalnu chu ruoithrèna pindana chun a hung lut a, “Aw laltak, kumkhuoin dam rawh. Thlabâr naw rawh. I hmâi khom dâng naw raw se. 11 I lalrama hin mi pakhat, pathien thienghlimhai thlarau nei a um a. I pa, laltak hun lai khom khan chu mi chun pathienhai tluka thu inril hriet theina le varna a kol ti hriet suok a ni ta a; i pa, lal Nebukadnezzar ngeiin dawivai thiemhai, aikei thiemhai, arasi hmanga aisan thiemhai le dawi thiemhai hotu takah a siem a. 12 Ama Daniel, i pain Belteshazzar tia a ko chu mi lungril hrât, hrietna hau le hriet thiemna nei mi, manghai hrilfie thiem, thu khirkhàn hrilfie thei mi le harsatna hrang hrang sut kieng theitu a nih. Daniel chu inkotir la, thuziek umzie chu hrilfie thei a ti che” a ta.
13 Daniel chu lal hmaa chun an hung thruoi a. Lal chun, “Nang Daniel, ka pa laltakin Judai rama inthoka saltang a hung thruoi laia mi chu i ni maw? 14 Nangmaah pathienhai thlarau a um thu le sungril mit varna nei, lungril hrât tak le var chungchuong i ni thu ka lo hriet a. 15 Hi thu ziek hi tiema a umzie mi hrilfie dingin mi varhai le aikei thiemhai an hung thruoi a, sienkhom tu khomin a umzie an mi hril thei naw a. 16 Nang ruok chun thil harsahai khom hril fiein i sukfel thei ti ka lo hriet a. Hi thil ziekhai hi tiema i mi hril fie thei chun puon senduk insiltir ning i ta, rangkachak thri inhlitir ni bok i ta, ka lalrama rorêltu lû tak pathumnaah sie ni bok i tih” a ta.
17 Daniel chun lal kuomah, “I thilpêkhai chu nangma ta ni sien, i lawmmanhai chu mi dangin chang raw hai se. Sienkhom thil ziek chu lal hriet dingin tiem ka ta, a umzie hril fie bok ka tih. 18 Aw laltak, Chunghnungtak Pathien chun i pa Nebukadnezzar kuomah chunghnungna hai, inlalna hai, ropuina hai, chawimawina hai le mawina hai a pêk a. 19 Ngirhmun insang tak a pêk lei chun mi tina mi le hnam tina mi le trong tina mihai chun an tri a, a hmaah an inthin hlak a. Lal chun sukhlum dinga a tihai chu a sukhlum a, dama a hla nuomhai chu a hla a, a chawisang nuomhai a chawisang a, a suktlawm nuomhai chu a suktlawm a. 20 Sienkhom a hung chapo a, uongthuongnain a lungril a sukngar phing leh a lalthrungphaa inthokin a pei thlak a, a ropuina po po a lakpêk vong a. 21 Chun, mihriemhai laia inthoka hnot suokin, ramsa lungril a’n puttir a, ram sabengtunghai lai a khawsa a, ran angin hlo a pet a, van daidawin a tlăk khum a, Chunghnungtak Pathien chu mihriemhai lalram chunga thuneitu tak le a ditsak taphothai chunga lalna petu a nizie a hriet suok le pom hma chun chuong ang chun a khawsa a nih.
22 “Sienkhom a naupa nang Belshazzar chun hieng po po hi i hrieta chu inngaitlawm i tum nawh. 23 Inphăhnuoi nêk hmanin vana LALPA i cho a, a tempula bûr le bèlhai chu i kuomah i hung inlaktir a, i nuhmeihai le hmeihai le i milienhaiin uoiin dawnnain in hmang a. Rangkachak dam, tangkaruo dam, dâr dam, thîr dam, thing le lung dama siem i milim pathienhai, ieng khom hmu thei lo, ngaithla thei lo le hre thei lohai chu i chawimawi a, i hringna le i lampui po po a kuta koltu Pathien ruok chu inzà nachâng i hriet nawh. 24 Chuleiin ama chun hi thu ziek ding hin kut a hung tir a nih.
25 “Hi hi a nih a ziek chu: MENE, MENE, TEKEL, UPHARSIN. 26 A hrilfiena chu hi hi a nih: MENE: Pathienin i’n lal hun dinga a ruot chu a tawp tah. 27 TEKEL: Bûkin i um a, i tling ta nawh. 28 UPHARSIN: I lalram chu thrèin a um a, Media le Persia kuomah pĕk a ni tah” a ta.