Nebukadnezzar mang
2
1 Nebukadnezzar inlal kum hninaaa chun zan khat chu mang a nei a, a mang chun a lungril a sukbuoi leiin a in nawk thei ta naw a. 2 Lal chun mitdawivaihai, aikei thiemhai, dawi thiemhai le arasi hmanga aisan thiemhai chu a mang chu hril dingin a ko khawm a, an hung a, a hmaah an ngir a. 3 Lal chun an kuomah, “Ka lung sukzingtu mang ka nei a, iem a na ka mang umzie hriet ka nuom a nih” a ta.4 Arasi rawn mihai chun Aramik trongin, “Aw laltak, kumkhuoin dam rawh. I mang chu i siehlawhai hi hril la, a hrilfiena chu hril kan ti che” an ta. 5 Lal chun an kuomah, “Hi ka thu tlukna siem nghet chu a nih: Ka mang le a hrilfiena in mi hril thei naw chun sat nawi vong ning in ta, in in khom hmunhnokah inchangtir ka tih. 6 Ka mang chu in mi hril a, a hrilfiena in mi hril bok chun thilpêk le lawmman le chawimawina ropui tak keimaa inthokin dong in tih. Chuleiin ka mang chu mi hril unla, mi hril fiepêk bok ro” a ta.
7 Anni chun, “Lalin a mang chu a siehlawhai hi mi hril phot sien la, a hrilfiena chu hril el kan tih” an ta. 8 Lal chun an kuomah, “Ka thu tlûkna siem kha in hriet leiin hun in pot sei tumna mei mei niin ka hriet tah. 9 Ka mang in mi hril thei naw a ni chun in tuok ding pakhat char a um. Ka thrangna ka thlâk thei beiseiin ka hmaah khêl inzawt kuol ding thu hmang lo in phan khawm mei mei a ni hi. Chuleiin, ka mang chu mi hril phot unla, in hril fie thei le thei naw hre el ka tih” a ta.
10 Arasi rawn mihai chun lal kuomah, “Lal thil indon hi a thaw thei ding khawvelah tu khom um naw ni hai. Hieng ang thil hi ieng anga lal ropui khomin mitdawivaihai, aikei thiemhai le arasi hmanga aisan thiemhai kuomah an indon ngai nawh. 11 Lal thil indon hi a harsa taluo. Hieng thil hi pathienhai chauh naw chun lal kuomah tu khomin hril thei naw ni hai, anni hlak chu mihriem laia chêng an ni ve si nawh” an ta.
12 An thu hril chun lal chu namên loa a suklungsen leiin Babulon rama mi var po pohai chu sukhlum vong dingin thu a pêk a. 13 Chuongchun, mi varhai sukhlum dinga lal thupek chu an insuo a, Daniel le a ruolhai khom chu sukhlum dingin an zong a.
14 Mi varhai sukhlum dinga inthok suok, lal vêngtu kawmandar Ariok chu Danielin var tak le thiem takin a lo inbiekpui a. 15 Lal vêngtu pawl kawmandar kuoma chun, “Iengti dana chuong anga thupêk khauh chu lalin a’n suo am a na?” a ta. Ariok chun Daniel kuomah iengkim chu a hrilfie a. 16 Chu phing leh Daniel chu lal kuomah a fe a, a mang chu a hrilfie theina dinga hun iemani chen bĕk la pe dingin a hni a.
17 Daniel chu a inah a’n lawi a, a ruolhai Hanania le Misael le Azaria kuoma chun thil um dan chu a hril a. 18 Babulon mivarhai ruola ama le a ruolhai khom chu sukhluma an um ve nawna dinga thu inthup chungchanga van Pathien kuoma zangaina hni dingin a ngĕn tawl a. 19 Zana chun thu inthup chu Daniel kuomah inlarnain a hung inhriettir a, Daniel chun van Pathien chu inpâkin,
20 “Pathien hming chu kumkhawtluongin,
Inpâkin um zing raw se;
Varna le thilthawtheinahai chu,
Ama tâ vong a ni si a.
21 Hun le hun bihai thliekin,
Lalhai siein a kei thlak a.
Mi var kuomah varna a pêk,
Man riltu kuomah hrietna.
22 Thu ril le thil inthuphai,
Ama chun a puong lang a,
Thima thil um a hriet a,
Amaah var a chêng hlak.
23 Aw ka thlatuhai Pathien,
Lawmthu hrilin ka’n pak che;
Varna le theina mi pein,
Ka hni i mi’n hriettir a,
Lal mang i min hriettir tah”
tiin lawmthu a hril a.
Danielin mang a hrilfie
24 Babulon mi varhai sukhlumtu dinga lalin a ruot Ariok kuomah Daniel chu a fe a, a kuomah, “Babulon mi varhai hi sukhlum naw rawh. Lal kuomah mi thruoi la, keiin a mang chu hrilfiepek ka tih” a ta. 25 Ariok chun Daniel chu lal kuomah a fepui nghal a, a kuomah, “Juda saltanghai laia mi, lal mang umzie hrilfie theitu ding mi pakhat ka hmu ie” a ta.
26 Lal chun Daniel (Belteshazzar tia an ko bok) kuoma chun, “Ka manga ka thil hmu chu mi hrilin, a umzie i hrilfie thei ding maw?” a ta. 27 Daniel chun, “Mi var tu khom le aikei thiem amanih, mitdawivai thiem amanih le aisan thiem tu khomin lal thil indon, thu inthup tak chu hrilfie thei naw ni hai. 28 Amiruokchu, thu inthuphai puong theitu Pathien chu vanah a um. Ama chun lal Nebukadnezzar kuomah thil la hung tlung dinghai chu a’n entir a. Khuma i zal laia i mang le i ngaituona fangtu inlarnahai chu hieng hi a nih: 29 Aw laltak, khuma i zal laiin thil la hung tlung dinghai chu i ngaituo a, thu inthuphai puong langtu chun thil la hung tlung dinghai chu a’n hmutir che a nih. 30 Aw laltak, keima hin mihai nêka varna ka hau lem leia hi thu inthup hi ka kuoma inhriettir a ni naw a, lalin a mang chu hre a, a lungril fangtu inlarna umzie chu a hriet theina dinga puong a ni lem.
31 “Aw laltak, i hang dăk suok a, i hmaah milim lien tak a lo ngir a, a ropuiin a tle sur a, a hmêlin mi a râp a. 32 A lu chu rangkachak hlîra siem a na, a âwm le bânhai chu tangkaruo, a phǐng le a malpuihai chu dâr, 33 a ngalhai chu thîr, a keparhai chu thîr le pil raw chang inpola siem a nih. 34 Chuonga i thlir zing lai chun, mihriem kut thrang dêr loin lung a hung chim thla a, milim ke, thîr le pila siem chu a del a, a koi dar ta vong a. 35 Chu ruol chun thîr hai, pil hai, dâr hai, tangkaruo hai le rangkachak hai chu an koi dar vong a, nipui laia hrizawla bu si ang el an hung ni a, a hlek khom hla nei loin thliin a lèn hmang ta vong a. Milim deltu lung ruok chu tlang lien takah a hung inchang a, hnuoi pumpui hi a hluo sip a.
36 “Hi hi i mang chu a ni a, chu hrilfiena chu lal kuomah hang hril ei tih. 37 Aw laltak, nang hi lalhai lal chu i nih. Vana Pathienin lalram dam, thilthawtheina dam, hratna dam le ropuina dam a pêk che a. 38 I kutah mihriemhai le chunglĕng vatehai le hnuoilĕng ramsahai a sie a, an chĕngna hmun taphotah an chungah lalin a siem che a, rangkachak lu ang chu i nih.
39 “I hnunga hin i lalram nêka hnuoihnung lem lalram hung ngir a tih. Chu hnunga chun lalram pathumna, dâr ang chu, hung ngir a ta, hnuoi pumpui chungah inlal a tih. 40 A tawpah, lalram palina, thîr anga khauh chu hung ngir a tih. Thîr chun a vuok taphot vaw bong a, a vuok nawi angin, ama chun lalram danghai po po chu sir hmâtin vaw nawi a tih. 41 A kepăr chu a thren thîr, a thren pila siem a nih ti i hmu ang ngei khan, ram lungruol lo ning a ta; thîr le pil inpol a nih ti i hmu ang khan, thir khauna ruok chu iemani chenah la nei zing a tih. 42 Chun, a kepar chu a thren thîr, a thren pil a ni ang bokin, a ram chu hmun threnkhatah hrât a ta, hmun threnkhata ruok chu ongrop a tih. 43 Thîr le pil chang inpol a nizie i hmu ang bok khan, mipuihai khom hnam tin inchekpol ning an ta, thir le pil an inzom tak tak thei naw ang bokin, inzom zing thei naw ni hai.
44 “Chuong lalhai hun lai chun van Pathien chun lalram se thei ta lo ding chu hung indin a ta, chu ram chu hnam danghai hnuoiah sie ni ngai naw nih. Lalram danghai po po chu tukdolin suktawp vong a ta, kumkhuoin ngîr zing a tih. 45 Chu chu a nih inlărnaa i hmu, mihriem kut thrang loa lung hung chim thla, thir hai, dâr hai, pil hai, tangkaruo hai le rangkachak hai del nawi vongtu umzie tak chuh. Pathien ropui tak chun thil la hung tlung dinghai chu lal kuomah a puong a nih. Mang chu a tak ngei a na, a hrilfiena khom hi a’n dik bok” a ta.
46 Lal Nebukadnezzar chu Daniel hmaah a bokkhup a, inză takin chibai a bûk a, thilhlan le rimtuihai chu Daniel kuomah hung inhlàn dingin a mihai chu thu a pêk a.
47 Lal chun Daniel kuomah, “Hi thil inthup i puong theia inthok hin i Pathien chu pathienhai po po Pathien, lalhai Lal, thu inthup puongtu a lo ni chieng ngei el” a ta.
48 Chuongchun, lal chun Daniel chu ngirhmun insang takah a hlăngkai a, thilpêk tam takin a vur a. Babulon biel pumpui chunga rorêltu le a mi varhai po po chunga lû takah a siem a. 49 Chun, Daniel hnina angin lal chun Sadrak hai, Mesak hai le Abednago hai chu Babulon biel enkoltuhai lai hotuah a ruot seng a, Daniel ruok chu lal rorêlna inah a um ta zing a.